استقلال القضاء حق كل المصريين

الست نعامة: ديسمبر 2004

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

اجازة

سوف أذهب وأصدقائي الجمل والقرد والزرافة لاستكشاف منطقة جديدة، عشان كده هاخد اجازة من الكتابة.
بس الدنيا هتبقى بررررررررررررررد جداً، أنا عارفة عشان روحت هناك قبل كده في بداية الصيف (يعني بداية الصيف كان برد أومال في منتهى الشتاء هتبقى عاملة ازاييييييي).
ربنا يستر بقى.
يارب إن شاء الله تبقى سنة سعيدة على الغابة والحيوانات تفهم بقى.
 10:13  4 هسهسات أرسليها بالبريد  

تساؤل

ليه كدّه؟
ليه لماّ حدّ يحب شخص تاني مش بيظهر له هذه المشاعر الجميلة؟
ليه مش بيعبّر عن حبه أو عن احساسه؟
ولماّ يتقابلوا يكون بارد وغريب.
 12:19  2 هسهسات أرسليها بالبريد  

الغباء في الغابة

حاجة تنرفز فعلاً وأنا خلاص مُستفزة جداَ.
أول امبارح كان القمر كبيييير جداً وشكله هايل، وانا كنعامة ذات مشاعر رهيفة وحساسة جداً، اخترت بقعة في الغابة عشان اتفرج على البدر الجميل.
ومرة واحدة وأنا لسه ماتهّنتش بجمال القمر طلعلي حيوان غريب على غفلة وقاللي: "ممنوع يا نعامة الجلوس هنا، امشي أحسنلك علشان ما حدّش ييجي ويمشيكي بطريقة مش لطيفة." الله أروح فين يعني أنا عايزة اتفرج على البدر، وبعدين هو أنا بعامل حاجة غلط؟ أنا قاعدة في مكاني باتفرج في سكون واتأمل البدر جمال السماء.
حتى الغابة مش لاقية فيها حتة هادية اتفرج فيها على القمر، اخس عليهم وعلى غباءهم.
بس على فكرة أحمد ربنا برضّه إن اليوم عدّى على سلام وجت على أد خناقة مع حيوان غريب، أحسن من الزلزال اللي حصل في نفس التوقيت في حتّة تانية.
 12:11  2 هسهسات أرسليها بالبريد  

حتى الفيل صديقي متآمر

آل ايه الفيل (المسؤل عن المرور) صديقي عامل نفسه بيفهم في كل حاجة،
أنا مش عارفة بيفكروا ازاي المسئولين عن المرور هنا في الغابة؟



في منطقة كده كنت على طول أذهب اليها لزيارة أصحابي؛ طريق الذهاب اليها سهل جداً (ممكن يكونوا قاطنوا هذه المنطقة متواطئن مع مسؤلي المرور علشان يستقطبوا الأصدقاء اليهم، وميعرفوش يرجعواتاني لعشهم) ولكن طريق العودة به معوّقات كثيرة، منها واحدة مهمة جداَ؛ إن أصحابي دول العش بتاعم على مرتفع شوية، وأنا نازلة لعشّي بقه، فيه حواداية كده بين العشش، كنت استغلها وأختصر الطريق.
من يومين كده وأنا في سكّتي وجدت أن الفيل صديقي الظريف، سدّ الحواداية ديه خالص علشان يقرفني وأنا مروحة، هل ديه كله مؤامرة علشان مازورش أصحابي؟
والله مش عارفة بقة ايه اللي هيحصل.
 11:33  0 هسهسات أرسليها بالبريد  

الدكتور بومة

وجعّ أسنان غير طبيعي، آلاااااااااام مبرحة.
الدكتور بومة ربنا يخليه للحيوانات كلهم ضجك عليا وفهمّني أن الحكاية سهلة خاااالص ومفيش مشكلة.
وعنها ذهبت للدوك بومة عشان أعالج درسي الغلبان المسكين.
وبدأت المعاناة؛ 5 حُقن بِنج (طبعاً عشان فكّ الست نعامة كبير شوية وهى كمان تتصف بالحساسة الشديدة)، وشدّ يا دوك شدّ يا دوك، أخيراَ الدرس اتخلع، ومافيش أي وجَع.
وحبّة وبدأ الهمّ والغمّ، آلام مبرحة ومش عارفين ننام والدنيا برد وحاجة تِئرف.
وأدوية ومسكنات ولسه هنشوف بقه النهاردة الدوكتور بومة هيعمل ايه، وهل سأستطيع الحديث والكلام بعد ذلك أم سوف حرم الجماهير من صوتي لفترة؟
 11:07  2 هسهسات أرسليها بالبريد  

فريد الأطرش

مرت بالأمس الذكرى السنوية لوفاة الفنان فريد الأطرش ولم يتذكره أحد
(كالعادة يعني). أنا لست من محبي هذا الفنان العظيم :-) بس له كده بعض الألحان الهايلة جداً، مثل فوق غصنك يا لمونة، قلبي ومفتاحه وحاجات كتير تاني. وكمان يُعتبر فريد الأطرش ملك العود، وقد استمعت لعزف منفرد له على العود وكان هايل جداً، وأعتقد أن الفنان العراقي نصير شمّة يحاول أن يقوم بتقليده (هذا رأيي).
 09:58  5 هسهسات أرسليها بالبريد  

مكالمة

عندما تستقبل مكالمة لم تكن متوقعة، من شخص لم يكن متوقع أن يتصل في هذا الوقت أو أن يتصل
أصلاً.
احساس بالفرحة والانبساط، الواحد فمه يتفتح وماينفعش يتقفل من كُتر الفرحة :-)
اليوم يتغير مساره تماماً، بعد ما كان يوم ممل وعادي زي بقية الأيام، ينقلب رأساً على عقب ويصبح يوم سعيد وجميل وياريت يطول على طول.
بس للأسف المكالمة قصيرة ومش بطوّل هى دايماً كده، ولمّا نحط السماعة كل الكلام يطلع مرة واحدة وفي وسط المكالمة مافيش كل الكلام محبوس جوّه.
لازم حبوب الشجاعة تتباع بقه في السوق مش ممكن كده انقذووووناااااااااااااااا.

وبمناسبة المكالمات والتليفون شاهدت أول امبارح فيلم "كشك التليفون"، والله فيلم مش بطّال بس ماحبّش أكون في موقف بطل الفيلم.
 13:19  0 هسهسات أرسليها بالبريد  

النعامة

غلطتي من الأول إني لم أعرّف نفسي.
أنا الست نعامة، وأنا من أكبر الطيور، وأنا أطول من قامة الرجل، غير قادرة على الطيران، ولكن لي سيقان طويلة وقوية تمكنني من الجري بسرعة فائقة تتراوح بين 50-70كم من الساعة،أعيش في المناطق شبه الصحراوية والأودية، وخاصة تلك التي لا تنمو فيها الأشجار. أتغذى بشكل رئيسي على البذور والأعشاب.



ومن أهميتنا نحن معشر النعام أخذوا يطلقون علينا الأشاعات اللعينة ومن هذه الأشاعات حكاية دفن الرأس في الرمال، وقد أوضحت في كتابة سابقة أن هذا الكلام غلط.
وكمان في مؤامرات كثيرة منها هذه: مؤامرات كثيرة
وأيضاً هناك رواية للروائي المصري رؤوف مسعد اسمها بيضة النعامة.
ديه معلومات لنفسي علشان مانساش جمالنا يا نعام.
 01:53  2 هسهسات أرسليها بالبريد  

وبعد أول مرة

يدق القلب للمرة الأولى، أيوه هو ده حبيبي اللي هافضل معاه العمر كله. ونعيش الوهم،،ونحب على نفسنا ونعيش أسعد أيامنا.
ومرة واحدة، كل ده يختفي ولا كأن فيه حاجة خالص!!
يا ترى الحب ده كله راح فين؟
ومرة تانية تبتدي القصة من الأول وهى هى نفس النهاية.
لحدّ امتى؟ ماحدش عارف.
أفتكر ناس كتير بتعيش المرحلة ديه، وساعات بيفضلوا فيها على طول.
بس يا ترى مين الشخص المناسب؟ هى ديه الاشكالية.
ونفضل نقارن لحد في الآخر نفضل لوحدينا.
ويبقى اثنان فى النهاية، يا ترى من منهم هو الشخص المنتظر؟؟؟
 00:20  0 هسهسات أرسليها بالبريد  

النقاب

كنت أفكر في ظاهرة النقاب المنتشرة هذه الأيام بطريقة ملفتة للنظر. وخطر على بالي السؤال ده: "ليه الستات بتتنقب؟ علشان يخبّوا جمالهم الخلاب ولاّ علشان أجوازهم فرضوا عليهم لبس الخيمة؟"
ده لو كانوا متجوزين، وأعتقد ان كل المنقبات أو الأغلبية منهن متزوجات :-)
ما علينا نييجي للأجابة، ممكن علشان رجالتهم يتصفون بالأنانية ومش عايزيين حدّ تاني حتى لو كانوا ستات زييهم يشوفوا جمالهم وأشكالهم، ديه برضه فكرة تانية. الفكرة بالنسبة لي كنعامة متفتحة على العالم الخارجي لسّه مش واضحة أوي، ممكن اتعمق وابحث والاقي الاجابة في يوم من الايام.
 14:02  11 هسهسات أرسليها بالبريد  

صاحب الأشجار وطالع النخلة والست نعامة

استيقظت الست نعامة كعادتها الصبح ولعبت ألعابها أو ما يسميه قريبها الأنسان تمرينات الصباح.
الشمس كانت طالعة وبتضحك لها، ومرة واحدة اختفت الشمس الدنيا غيمت والبرد دخل بكل قوته.
جه صاحب الأشجار عشان يطمّن على أصحابه الشجر ونسي الست نعامة اللي واقفة في البرد لوحدها.
مين كمان جه بسرعة علشان يطمّن على أصحابه؟ طالع النخلة وبرضه نسي صاحبته القديمة الست نعامة.
وبدأ حوار كده على جنب بين صاحب الأشجار وطالع النخلة، "تعرف منين أجيب مخدة ريش نعام يا صاحبي يا طالع النخلة؟" سأل صاحب الأشجار. " والله ممكن ننتف كده فى ريش نعامة، علشان ريشها زيادة شويتين." ردّ عليه طالع النخلة. وأضاف طالع النخلة: "أنا عايز مروحة ريش نعام ممكن برضه نستفاد من الريش الكتير."
كل ده والست نعامة واقفة وسمعاهم. طيب تعمل ايه؟ تعمل ايه؟؟؟ راحت هوبّا مرة واحدة قفزت عليهم وطاخ طيخ وجريت وراهم. طبعاً معرفوش يهربوا منها علشان هى سريعة جداً. ودلوقتي آل ايه بيحاولوا يصالحوها بس على مين.
وخلاص كده انكشف صاحب الأشجار اللي عامل نفسه صديق البيئة وكمان صاحبه طالع النخلة اللي بيحب النخل.
وفضلت الست نعامة الحلوة الجميلة الظريفة تجري وتلعب في الشمس الجميلة الجريئة زي ما هى عايزة من غير ماتخاف من حدّ تاني.

فاضل بقى مؤامرة حيوانات الغابة اللي لسه مالهاش حل.
 13:52  1 هسهسات أرسليها بالبريد  

ومرّ العام سريعاُ

يمر اليوم عام على رحيل جدي. أنا متأثرة جداً، أفتقد الحكايات التي كان يحكيها لنا عن تجاربه وذكرياته مع مختلف البشر.
يااااه الوقت فعلاً بيجري بسرعة ولكن سرعته أكبر من سرعتنا نحن النعام.
 16:18  0 هسهسات أرسليها بالبريد  

أول مرة لسّه

عندما يبدأ الأحساس بالآخر،
بتبقى في الأول لسّه حاجة جديدة حلوة،
نكتشف بعض ونعرف حاجات جديدة مش عارفِنها عن بعض،
وكمان بنعمل حاجات تخللي اللي بنحبه يعبر عن المشاعر المدفونة بداخله.
ذهبوا للعشاء سويا وبعد كدّه قاموا يرقصوا مع بعض شوية. الدنيا زحمة جداً،،بيقربوا من بعض،
لسّه فيه مسافة مش مشكلة، وكمان بيقربوا تاني، أفكار تدور في دماغ النعامة الصغيرة، وممكن كمان في راسه هو الآخر، أصابها التردد والتوتر، ومع ذلك برضُه مستمرة :-)حاجة بتقولها ياللا أكملي ما بدأتي، وحاجة تانية بتجذبها بعيداً. وفجأة قررت تتخلص من كل القيود وتعمل اللي هى بتشعر به، ولا يستوقفها شىء, لقد حان الوقت للمشاعر أن تتدفق :-)
وجاء وقت العودة :-( لازم ييجي يعني، بس كلاهما مش عايزيين يمشوا، عايزيين يفضلوا كدّه على طول،
قرروا الذهاب معاً الى مكان بعيد ومافيش حدّ يزعجهم ويقضوا بقية الليل فيه معاً،
ذهبوا لعشه لأنه بعيد، ليكملوا الليل هناك،
جلسوا جنب بعض وتبادلا أطراف الحديث وكمان كملوا الرقص على الموسيقى المفضلة لديهم، موسيقى النعام الجميلة :-)
وبدأت الأحاسيس كلها تظهر دلوقتي؛
قُبُلات حارة وأحضان قوية، حرارة عالية جداً،
لسّه مستمرين!!!! يا بختُهُم :-)
الموقف الأن تجرُِد من كل حاجة،
خلاص كدّه، الأن بيعرفوا كل حاجة عن بعض، كل صغيرة وكبيرة.
الأن تستطيع أن تعرف ما تريده هى من مجرد نظرة عينيها اليك.
تستطيع حتى أن تعرف متى ستضحك ومتى ستبكي، وماذا ستفعل الأن.
ياترى هل سيستمر الحال على هذا المنوال، وللا هييجي يوم ويضجروا من بعض؟
ديه حتّة من قصة نعامة صغيرة. بس الحكمة اللي نطلع بيها من هذه القصة "أجمل حاجة هو التخلص من كل القيود واتباع القلب في التعبير عن المشاعر".
 14:04  0 هسهسات أرسليها بالبريد  

الحيوانات في الغابة عاملة مؤامرة

أكتشفت ان كل الحيوانات في الغابة عاملة مؤامرة ضدي، حتى ملك الغابة الأسد اللي فاكر نفسه عامل التليفون مشترك معاهم في المؤامرة -ياعيني علينا... هنروح فين منهم- وكمان القرد المرعب انسان الغاب طويل الناب اللي متنكر في شكل رجل الأمن في المترو برضُه مشترك في المؤامرة (حاجة غريبة جداَ) وآل ايه مطّلعين عليا أوشاعة اني بادفن راسي في الرملة،، طبعاَ لازم ادفنها في الرملة عشان ماشوفش وجوهكم الجميلة وأكتفي برؤية الديدان تحت الأرض :-) تعبتوني وميعاد الأفطار جه لازم أمشي علشان الأسد مايهجمش عليا ويفترسني، بس المؤامرة لسه مستمرة وأنا برضه لسه مستمرة
 10:40  5 هسهسات أرسليها بالبريد  

بداية القصة

حاجة غريبة بتحصل مش عارفة إيه؟ شعور غريب ولكن جميل ولذيذ. باحب واحد جميل. أريد أن أكون معه طول الوقت. نقرأ مع بعض. نسمع موسيقانا الجميلة. نتكلم شوية. وممكن كمان نقعد كده مانعملش أي حاجة، بس نبص لبعض وخلاص. أيه رأيك؟ أيوه دي فكرة هايلة. وممكن كمان هوبّا كده ونلعب مع بعض، وللا ايه؟ ده إحساسي بالأمسية الجميلة مع حبيبي والطريقة التي أريد أن أقضي معه بقية عمري. دي بداية حكاية الست نعامة.
 14:56  2 هسهسات أرسليها بالبريد  

أخيراَ قررت

ياسلاااااااااااااام حاجة ظريفة جدا، الُخلل كله هنا :-) والبقية تأتي
 13:15  5 هسهسات أرسليها بالبريد  
في مرمى البصر
على أشكالها تقع
من الذاكرة