الست نعامة

خير اللهم اجعله خير

2011-11-21T15:01:00.001+02:00

حالة من الذهول والبلم والنكد نزلت عليا يوم السبت 19 نوفمبر 2011، ومش عارفة اخرج منها من كثرة الأحداث الغيبة والمريبة والأستهتار بعقلية الغابة المجيدة. والله الموفق والمستعان.

السهرة تحلى

2009-12-21T19:51:00.001+02:00

زي م قلت، النهاردة أول فصل الشتاء اللعين، كل سنة وانتم طيبين...وكمان يعدي على كتابة أول تدوينة للست نعامة 5 سنين :-) مع إني متوقفة عن الكتابة بقالي فترة بس قلت أكتب كده حاجة في السريع لأحياء الذكرى. وبهذه المناسبة أحب أن أهدي سلاماتي لأبو قردان والقرد حبيبي وطبعا زحلوف والتنين والكوالا وأكيد أبليس ومن بابا وماما وعمو وخالتو والدب واللاما والغزالة والفراشة والفيل أبو زلومة والحَمَارنب واللولفين طبعا كلهم بيسلموا ع الكتعوم والكتعومة وبيقولوهم اسمعوا الكلام واشربوا اللبن واغسلوا رجليكم قبل م تناموا والسلام ختام.

يا ليل يا عين

2009-11-08T23:07:00.001+02:00

يا حلو صبّح

2009-06-25T10:48:00.005+03:00

كل يوم بصحى بدري أوي شويتين تلاتة أربعة عشان أروح الشغل بدري.

فيه طريقين للذهاب للعمل، من داخل الغابة أو طريق يدور حلوها لزوم تجنب الزحام. أحب أنوّع ساعات عشان الملل برضو، المهم كل طريق له أصدقائه الصباحيين، يعني ناس بقابلهم في الطريق كل يوم في نفس الموعد، ولو مشفتهمش أعرف إني اتأخرت أو هما إللي اتأخروا. على الطريق إللي بيدور حول الغابة (الأرض تلفُ حول نفسِها) بقابل دايما ست موظفة بتبقى ماشية بتعجل وبفتح خطوة كده ومركزة في الطريق وفي خطواتها، بعرفها من ربطة ايشاربها الغريبة، وكمان أخدت بالي منها يوم كانت لابسة طقم زاهي الألوان. هى منتظمة في مواعيدها لدرجة إني عارفة النقطة إللي بقابلها عندها دايما.
في نفس الطريق ده فيه رجل شعره أبيض أوي، بياض ناصع، بس أشُك إنه كبير في السن، مكن أواخر الخمسينات مش أكتر من كده، دايما لما أعدي من أمامه بحس انه بيقولي برافو جيتي في وقتك تمام، ولما في يوم أسلك الطريق الآخر، اليوم إللي بعده بيقول لي كنت فين امبارح؟

الطريق الآخر إللي بيمر خلال الغابة الجميلة ويقطعها من النص، في ساعات الصباح الباكر بيكون فاضي كده وجميل جدا، هنا بقى بقابل دايما عدّاء، شاب في الثلاثينات من عمره بيمارس رياضة العدو، ويرتدي ملابس رياضية جميلة جدا، شكله كده داخل بطولة قريب، عشان شكله بيتمرن جامد وشادد حيله أوي الأيام ديه، نقطة مقابلتنا بتكون عند الميدان قبل الكوبري، النهاردة بقى هو اتأخر عشان قابلته وأنا نازلة الكوبري وهو لسه بيطلع، هاها كنت عايزة أقوله صحيت متأخر ولا إيه؟

ممكن يكون فيه أصدقاء طريق تانيين بياخدوا بالهم مني وأنا بكون مركزة في السواقة مثلا ومش متبعاهم بس كمان إللي عارفاه وعارفة انه عارفني هو عسكري المرور إللي ع الكورنيش، أهو ده بقى فعلا إللي متأكدة انه عارفني، عشان أنا دايما بمشي ع الشمال، وبقف وحظي كده دايما إني بقف في الأشارة على ناحيته وده بيكون الساعة 7 الصبح وقليل م تلاقي الاشارة زحمة الساعة 7، وشكلي يوم الأحد كده هنزل أسلم عليه هاهاها.

نهاركم سعيد

قالك البيض له زيت

2009-06-15T13:26:00.009+03:00

البرقوق المتلج أبو قشرة رفيعة كده ولونه داكن بيكون معسل أوي، ومهما اختلف حجم حبّة البرقوق فطريقة أكله عند معشر الزحاليف واحدة، بيطلقوا عليها طريقة التزليط، يزلطوا البرقوقة المسكينة على مرة واحدة تنزل على رأي سكينة مزلقان على طول. يا معشر الزحاليف الرفق بالبرقوق المسكين، قطعوه وكلوه بلاش تزلطوه.

بمناسبة الكلام عن الزحاليف...السيد زحلوف له عندي عزومة على أكلة صيني، طبخة من طبخاتي المعروفة. وإليكم طريقة عمل السويت أند ساور، لعلي لا أستطيع أن أفي بوعدي للزحلوف وأعزمه عليها لظروفه الحالية..فها هى المقادير، إللي يعرف يعملها يعزمه هو بقى ويعزمني معاه يا ريت.
خضار بكل أنواعه (كرنب أحمر، كرنب أبيض، جزر، فلفل أحمر، فلفل أخضر، فلفل أصفر، كوسة وممكن بطاطس يعني) يقطع الخضار إلي شرائح رفيعة ونحطه على جنب. زنجبيل أخضر مبشور (شوية حلوين كده)، كام فص ثوم مبشور، لحمة مقطعة شرائح رفيعة أو صدور فراخ مقطعة شرائح رفيعة أو جمبري وسمك أو ممكن الأكتفاء بالخضار فقط للنباتيين. زيت زيتون، عسل أسود، صوص الصويا الخفيف (الفاتح) وليس الغامق، عشان الغامق درجة ملوحته عالية جدا، فلفل أسود، وممكن اضافة شعرية صيني (رايس نودلز) أو عدم اضافتها.

طريقة الطهي:

ملوحظة (1): إذا وُجد القدر الخاص بطهي المأكولات الصينية خير، لو مش موجود نستخدم قدر غويط وحويط عشان الخضار بس كتير حبتين.
ملحوظة (2): مش لازم نسلق النودلز قبل استخدمها ممكن اضافتها على طول كده وهى هتتسلق مع الخضار.
ملحوظة (3): عدم استخدام الملح وذلك لأستخدام صوص الصويا عِوضاً عنه.

1- يتم تسخين زيت الزيتون المتين وعليه نحط الثوم المبشور والزنجبيل المبشور، المفروض تنبعث رائحة عطرة وهى رائحة الزنجبيل الأخضر.
2- يتم اضافة كل الخضروات التي تستغرق وقت في الطهي، مثل الجزر والكرنب بكل ألوانه والفلفل بكل ألوانه، ونقلب، نقلب، نقلب، الخضروات هتنزل مايتها وتتدبل، ممكن بقى نضيف قطع اللحم أو الفراخ أو الجمبري أو نسيبه كده. ونرجع نقلب، ونقلب، ونقلب.
3- بعد كده نضيف الخضروات الخفيفة إللي بتستوي بسرعة مثل الكوسة، ونرجع نقلب تاني.
4- وبعدين نضيف صوص الصويا والعسل الأسود والفلفل الأسود حسب التذوق ونضيف كمان النودلز (إن وُجدت) ونرجع نقلب تاني، لحد م نوصل لدرجة الطهي المطلوبة. لو بالحس الفني الطبيخي شعرنا أن الطبخة محتاجة شوية ماء، نديها على طول، بس شوية شوية.
نطلع الأطباق الملونة الأمورة وناكل بالهنا والشفا كلنا كده وننبسط.

وديه كانت القاضية

2009-06-02T09:32:00.003+03:00

لأول مرة من 1 نوفمبر 2006 يوم ولادة الكتعوم الجميل أحس إني أمّ فعلا، وان عندي كتعوم كده...يعني كنت أعيش حياتي عادي مع تغيير بسيط وهو ظهور مخلوق تالت في العش السعيد واختفاء كل ما كان يُزيّن العش من أحجار وأخشاب عشان سلامة الكتعوم...تغيرت ملامح العش جدا، ولما بتفرج على صور العش من 3 سنين أستغرب كده وأقول إيه ده الحاجات ديه كانت فين أصلا؟

الحياة كانت عادية جدا وفجأة أن أن أن تشششششششششش...بدأ الكتعوم في الهرش، مش مهم هو لما بياكل موز كتير بيحصله كده، أصله كان مشروع قرد وتحول إلى كتعوم في آخر لحظة. بس شكل الحساسية ديه مش طبيعية..وبعدين الحرارة شكلها برضو فيها كام شَرطَة زيادة..يا خوفي يا بدران يكون إللي م يتسمى الجديري المائي. احنا نروح للدكتور بومة، هو إللي هيجزم.

الدكتور بومة: ماله الكتعوم؟
النعامة: اشتباه جديري.
الدكتور بومة: طب نكشف عليه.
بعد الكشف...
الدكتور بومة: ده مش اشتباه، ده مؤكد.

يا حلاوة الدنيا يا حلاوة، مش وقته خالص أمراض الصيف. هنا بدأت أحس فعلا إن عندي كتعوم صغير وبدأنا مرحلة أمراض الطفولة النعامية إللي كل النعام الأمهات بتشتكي منها وأنا كنت بستمع لهن كده وخلاص ومش في بالي أبدا إن في يوم هتعدي عليا كل الحاجات ديه.

كلمت الدوك نعام الكبير، ضحك وقال لي ألف مبروك مرحلة جديدة، أو كان يقصد اشربي، علقة تفوت ولا حد يموت.

وآه ياني

الجميل النائم (منقول)

2009-05-27T11:03:00.008+03:00

قرأت تدوينة الجميلة النائمة عند صديقتي أميرة المسيري في المساحة بتاعتها. عجبتني عشان بتوصف نفس احساسي بالكتعوم مع فارق السن بينه وبين بنتها.

يا صفايح الزبدة السايحة

2009-05-21T09:13:00.003+03:00

كل سنة واحنا طيبين، بدأ اليوم فصل الصيف، يا حلولييييييي.

ومع بداية الصيف تنفرج الأسارير وتنطلق المشاعر المكبوتة وتلاقي نفسك كده نشيط ومش عارف تعمل إيه من كتر الطاقة الموجودة. أصحى الصبح بدري، نسمات صيفية فجرية جميلة تتخلل الرئتين تعطيني احساس بالحيوية، وتشجعني على الذهاب للعمل والأنطلاق من جديد. هو ده يومي في الصيف، بغض النظر عن فترة الظهيرة إللي بيكون فيها الجو حاااار ونار يا حبيبي نار ولكن ع المغرب يا حلاوة المغربية مع كوباية شاي كده في الفراندة (بلكونة يعني) وبعدين الأستعداد للأنطلاق الليلي والسهر والأنبساط.

بمناسبة الزبدة إللي بتسيح برة التلاجة بسرعة في فصل الصيف، كانت جدتي ومازالت بتجيب كور (جمع كرة) الزبدة البيضاء وتسيّحها عشان تطَّلع منها السمن البلدي الجميل إللي طعمه في الأكل بيبان، ولكن تأثيره ع المعدة مش ولابد عشان تقيل أوي. تجيب حلة الديك الرومي الكبيرة أوي وتحط فيها بقى كور الزبدة وتسيح الزبدة ع النار. هنا بقى تبدأ مرحلة المُرتة، وفيه نوعان من المُرتة، 1-مُرتة بيضاء؛ وبتكون ع الوش (زي القشدة ع اللبن كده) وديه بتكون ملح خفيف وطعم الزبدة باين فيها أوي، 2- مُرتة بني؛ وبتكون في قاع الحلة وديه بقى المتينة جدا، ملحها قوي أوي بس طعمها لذيييذ جدا، الله عليها بالعيش بالبلدي (إللي بخمس قروش ومتحمص ع النار)، لقمة ورا لقمة ورا لقمة تلاقي الطبق خلص وانت مش واخدة بالك، وبعد كده نشرب 7لتر ماء هاهاهاها. لسه السيد الوالد الدوك نعام بيقوم بهذا الطقس المتوارث، بس مش عشان السمن البلدي (ده سبب برضو) ولكن عشان بلاص المِش يتغذى كويس، هتكلم ع المِش ده مرة تاني عشان ده حكايته حكاية.

بيظهر في فصل الصيف برضو الذرة المشوي، تلاقي على كل ناصية وكل شارع عيلة قاعدة بتشوي درة، وسيلة للربح في فصل الصيف وتسلية برضو، أهو نتفرج ع الناس إللي جاية تشتري الدرة.

شخصية دخلت عليا دلوقت وأنا بكتب التدوينة ضيعت كل الأفكار من المخيخ بتاع النعامة الأمورة، سوف أنسحب الأن وأعود في وقت لاحق لأكمل كتابتي عن الصيف وجماله وحمام السباحة وقعدته والبحر ورماله.

عيب يا ذئب كده

2009-02-02T10:44:00.001+02:00

Fuchs, du hast die Gans gestohlen,
: Gib sie wieder her, :
: Sonst wird dich der Jäger holen
Mit dem Schießgewehr. :

Seine große, lange Flinte
: Schießt auf dich den Schrot, :
: Daß dich färbt die rote Tinte
Und dann bist du tot. :

Liebes Füchslein laß dir raten
: Sei doch nur kein Dieb :
: Nimm, du brauchst nicht Gänsebraten,
Mit der Maus vorlieb. :

قنديل القناوي

2008-12-21T14:35:00.001+02:00

النهاردة أطول يوم في السنة عشان النهاردة الذكرى السنوية يا ترى؟

لأ، النهاردة أول أيام الشتاء الحزين، هذا الفصل من العام مستفز ويثير الأعصاب بجد؛ ملل، وجو نكدي ولبس تقيل، وجزم طويلة، وتقشف في الأيادي والسيقان مع كل المحاولات لتلافي هذا التقشف الغتت، واستخدام كل أنواع الوصفات والمساحيق، ربنا يسهّل بقى وتنجح الوصفات البلدي المرة ديه.

وقنديل كان بيحتفل بعيد ميلاده من كام يوم، تعالي يا أم هاشم واتفرجي على قنديل بيعمل إيه. والكل كان منوّر مصطفى مستور وسهى البرشومي ومعاهم عبد السلام سمك قلبوا الدنيا بحكاياتهم عن الكنبة وقعدتهم عليها.

المهم ان محمد منير بقى بيدوّر ع اللولي يا لولي، وحبسوني وحبسوه.

كيفَك انتَ

2008-12-04T11:22:00.001+02:00

ملحوظة: للأستمتاع بالتدوينة ديه، لازم تكون فيروز بتغني كيفك انت في الخلفية.

تذكر أخر مرة شفتك سنته؟ تذكر وقته آخر كلمة قلته؟ تغني فيروز وهى قاعدة بتسمعها وتفتكر معاها حكايتها معاه. بتشوفه بس مش كتير، بتكلمه بس مش كتير برضو. مفيش جديد يتقال أو يتحكي عنه، مع انها كانت بتكلمه عن أي حاجة ممكن تحصلها ولو صغيرة وفي أي وقت، بس خلاص معندهاش طاقة عشان تطلعها ولا في قوة عشان تبذل مجهود، بتتكلم في مخها جوة دماغها كأنها بتتكلم معاه هو. حواليها ناس كتير وناس كويسين، بس خلاص مش قادرة. تحتفظ بداخلها بذكرياتها الجميلة معاه ونفسها تعمل حاجات تاني عشان يكون عندها ذكريات كتيرة ولكن ....

"إرجع أنا وياك".."تذكر آخر مرة شو قلتلي...زعلت بوقته...هيدا انت"..."انت الأساسي وبحبك بالأساس" بتكمل سماع الأغنية وتتخيل لو كانوا مع بعض لحد دلوقت، يا ترى هيكونوا إزاي؟ ولما يكبروا ويتقدم بهما السن، هيكونوا زي الرجل والست العجوز إللي شافوهم مرة في وسط البلد وهما بيتمشوا وتخيلوا نفسهم في مثل هذا الموقف؟

وترجع بالذاكرة، أول يوم اتقابلوا أو شافته هى، قابلوا بعض في مكان ضيق، عدوا من جنب بعض وخلاص. بعد يومين اتقابلوا تاني قالتله صباح الخير ورد عليها وخلاص، مكانش هناك أي نوع من المشاعر، واحد بتشوفه كل يوم وخلاص، بس ظريف وغريب. هو كمان فكّر فيها نفس التفكير، واحدة ظريفة ييجي منها.

فجأة نشأت صداقة غريبة بينهم. إيه إللي حصل مش عارفين، بس كانوا أصحاب، وعلى طول مع بعض وبيعملوا كل حاجة مع بعض وابتدى يتصاحب على صاحباتها وهى كمان تتصاحب على أصحابه وتسمع حكياته إللي كانت بالنسبة لها غريبة وجديدة، وهو كمان بيسمع حكاياتها إللي مش بتخلص أبدا وعن ناس عمره م شافهم ولا سمع عنهم.

اكتشفوا ان فيه حاجة غريبة تجمعهم، حاجات كتير مشتركة بينهم وبين كل حاجة حواليهم. نفس الأهتمامات، نفس الحكاوي. اشتركوا في أنشطة جديدة مع بعض، رحلات واجتماعات وندوات. عرفوا ناس كتير مع بعض، وكمان بعدوا عن ناس كتير مع بعض. ناس راحت وناس جت وهما مع بعض. كبروا مع بعض، وفهموا بعض أكتر وأكتر. مواقف كانت بتحصل زمان، كانت هى بتزعل منها وتغضب، عشان لسه مَكَنتش فاهماه أوي، ولما يفضل ساكت مبقتش تسأله انت ساكت ليه، عشان عرفت انه مش لازم يتكلم، ممكن يسكت عشان هو مبسوط، مبقتش تزعل، نضجت، كبرت، فهمت. هو كمان كان بيزعل أو يسكت وميتكلمش، بس خلاص دلوقت مفيش كلام، سكوت على طول.

تحلم بحلم، تصحى الصبح تكلمه على طول وتحكي له، رد هو باستغراب، أنا كمان حلمت نفس الحلم!! اتخضت، سكتت، بس كانت حسّة وعارفة انه ممكن يحصل. وهو كمان كان عارف. كمان كانت أيام بتحلم بحاجة هتحصل وتكلمه تحكيله عنها ويقولها أيوة ده حصل لي امبارح، حلمك اتحقق. وصلوا لدرجة تواصل وتوارد خواطر وأحلام غير طبيعية. ساعات كانوا يسكتوا ولما يبتدوا يتكلموا، يبتدوا في نفس الوقت وبنفس الكلمة عن نفس الموضوع. في الشتاء، كانت تجري عليه وتقضي معاه ساعات طويلة من الليل، وتنام في حضنه عشان بردانة وتدفّى بحبه لها.

حلموا بجزيرة بعيدة، يعيشوا فيها مع بعض من غير مضايقات من حواليهم، ولا التزامات لأي حد. هما الأتنين بس، يعملوا كل حاجة هما عايزينها وفي أي وقت، كل حاجة نفسهم فيها موجودة، هما الأتنين بس. يكبروا مع بعض، ينضجوا أكتر مع بعض، يخلفوا أطفالهم، إللي كانت اساميهم متحددة لوحدها من غير تدخل من أي واحد منهم.

وجه اليوم إللي كانت هى خايفة منه، هو كمان كان بيفكر في اليوم ده، بس عمره م قال لها عن إللي كان خايف منه، ولا هى كمان. يوم الفراق. كان يوم صعب عليها وعليه. دموعها كانت بتسيل لوحدها، حتى لو هى مش عايزة تبكي. إزاي هتعيش من غيره؟ هتكلم مين أول م تصحى من النوم، هتكلم مين قبل م تنام بالليل؟ من إللي هتخرج معاه أو تقعد معاه في أيام الشتاء الباردة. من إللي هيكلمها عن حاجات عمرها م عرفتها قبل كده. يا ترى هو كان احساسه إيه، نفسها تعرف كان بيفكر في إيه يومها. يوم الفراق، مكنش فيه تواصل ولا توارد أفكار. كان يوم مبهم، السحاب كان كتير والدنيا مغيّمة. يا ترى السماء كانت عارفة ان ده اليوم الموعود؟

فضلت لوحدها، مش عارفة تبتدي تاني من جديد، بتحاول تتعرف على ناس تانية ومش قادرة، خلاص كل النشاط إللي كانت فيه راح معاه. وفضلت هى مع الذكريات من الماضي الجميل، تفكر في الجزيرة البعيدة وذكرياتهم هناك مع بعض وعن الذكرى السنوية الخاصة بهما هما بس.

إلاّ الكرسي...

2008-10-30T09:53:00.000+02:00

وصلني ع البريد الألكتروني هذه الفتوة، حتى الكرسي لم يسلم، والله ده حرام.

"الجلوس على الكرسي حرام وزنا!
أما أم أنس السلفية فانفردت بفتوى تحريم الجلوس على الكرسي. وإليكم نص الفتوى كما وردت على موقعها، قالت ''...إن من أخطر المفاسد التي بليت بها أمتنا العظيمة ما يسمى- بالكرسي- وما يشبهه من الكنبات وخلافها مما هو شر عظيم يخرج من الملة كما يخرج السهم من الرمية، نسأل الله العافية! وإليكم بيان حركة استخدام الكراسي واقتنائها والجلوس عليها، والنظر إليها وفق تأصيل شرعي من الكتاب والسنة، ومن لنا يا أمة الإسلام غير الكتاب والسنة ثم العلماء الربانيين الذي يعلمون ما لا تعلمون؟ الدليل الأول: إن السلف الصالح وأوائل هذه الأمة وهم خير خلق الله- كانوا يجلسون على الأرض، ولم يستخدموا الكراسي ولم يجلسوا عليها، ولو كان فيها خير لفعله النبي صلى الله عليه وسلم. قال جل من قائل ''وما آتاكم الرسول فخذوه وما نهاكم عنه فانتهوا''. الدليل الثاني: أن هذه الكراسي وما شابهها صناعة غربية، وفي استخدامها والإعجاب بها ما يوحي بالإعجاب بصانعها وهم الغرب. وهذا والعياذ بالله يهدم ركنا عظيما من الإسلام وهو الولاء والبراء، من أحب الكفرة حشر معهم. الأمر جلل يا أمة الإسلام فكيف نرضى بالغرب ونعجب بهم وهم العدو ''هم العدو فاحذرهم قاتلهم الله أنى يؤفكون''.
الوقفة الثالثة: وهي ما يجلبه الكرسي أو الأريكة من راحة تجعل الجالس يسترخي وتجعل المرأة خاصة تفرج رجليها، وفي هذا مدعاة للفتنة والتبرج، فالمرأة بهذا العمل تمكن نفسها من الرجل لينكحها، وقد يكون الرجل من الجن أو من الإنس، والغالب أن الجن ينكحون النساء وهن على الكراسي، فلكم من مرة شعرت المرأة بالهيجان والشبق الجنسي المحرم، وذلك بعد جلوسها على الكرسي، أي والله، ولكم من مرة وجدت المرأة روائح قذرة في فرجها، كما خبرت وكما حدثتني بذلك بعض الصالحات التائبات من الجلوس على الكراسي، لهذا فالجلوس على الكرسي رذيلة وزنا لا شبهة فيه، ولهذا وجب على الأمة حماية أعراضها وشرفها ودينها وعقيدتها قبل ذلك! الدليل الرابع والأخير: أن الجلوس على الأرض يذكر المسلم بخالق الأرض، وهو الله جل جلاله، وهذا يزيد في التعبد والتهجد والإقرار بعظمته سبحانه، قال العلامة الشيخ صالح الفوزان قدس الله ذكره: الجلوس على الأرض يجلب البركة والخير كله. اهـ.
أما الجلوس على الكرسي فهو ينسي الجالس خالق الأرض ويجعله يعجب بصانع الكرسي الغربي، مما يخرج من الملة، وقد سبق بيانه في باب الولاء والبراء، وبعد هذا البيان والتوضيح والتأصيل الشرعي لحكم الإسلام من الجلوس على الكراسي وما أشبهها- هل يرضى أحد أن يعصي أمر الله ويرتد عن دينه؟ قال تعالى ''ومن يرتدد عن دينه فأولئك الذين حبطت أعمالهم في الدنيا وليس لهم في الآخرة من خلاق''. والآن يا أمة الإسلام بعد أن بلغتكم الحجة الشرعية المؤصلة بالأدلة من كتاب الله وسنة رسوله وسير سلفنا الصالح من آراء علماء الأمة الربانيين- حين بلغكم ذلك ليس لكم عذر في الجهل، وقوموا بواجبكم الجهادي في الإنكار، بإرسال البرقيات إلى ولي الأمر وتكسير الكراسي في المدارس والمستشفيات والصالونات وغيرها من الأماكن التي يضع العلمانيون والفسقة والكفرة والملاحدة فيها الكراسي لإغواء الأمة وإفساد عقيدتها الصحيحة، وأن تكسيرها وحرقها من أعظم أبواب الجهاد وذروة سنامة- الله أكبر ولله الحمد وسبحان الله ولا عدوان إلا على الظالمين. حررت الفتوى لسبع ليال بقين من شهر شعبان- العلامة الداعية أم أنس السلفية- جزى الله خيرا من ساعد على نشرها"

يالا بقى نعمل كلنا ثورة الكراسي، ونقول "كلنا كرسي"

وماله يا خويا وماله نقول تاني

2008-10-23T09:34:00.001+02:00

قال لي صديقي القرد م تحكي تاني عن الغابة وما فيها. ف قلت نحكي منحكيش ليه. الغابة غابتنا والحيوانات ولاد عشتنا والأسد بيحب الغزالة والفيل مصاحب النعامة. ومحدش بيضايق حد ولا حتى ذكر بيغلس على أنثى ولا يبصلها بصة وحشة. ده حتى الذئب هرب من ليلى واتخنق منها.

وهى ديه حكايتنا، حكاية حيوانات غابتنا.

قالوها الحكماء

2008-10-07T11:33:00.000+02:00

إذا لم تكن تعلم أين تذهب ، فكل الطرق تؤدى إلى هناك

يوجد دائماً من هو أشقى منك، فابتسم

يظل الرجل طفلاً حتى تموت أمه، فإذا ماتت شاخ فجأة

عندما تحب عدوك يحس بتفاهته

إذا طعنت من الخلف فاعلم أنك في المقدمة

الكلام اللين يغلب الحق البين

كلنا كالقمر ..له جانب مظلم

لا تتحدى إنساناً ليس لديه ما يخسره

العين التي لا تبكي لا تبصر في الواقع شيئاً

المهزوم إذاابتسم أفقد المنتصر لذة الفوز

الجزع عند المصيبة، مصيبة أخرى

الابتسامة كلمة معروفة من غير حروف

اعمل على أن يحبك الناس عندما تغادرمنصبك، كما يحبونك عندما تتسلمه

لا تطعن في ذوق زوجتك، فقد اختارتك أولا

لن تستطيع أن تمنع طيور الهم أن تحلق فوق رأسك ولكنك تستطيع أن تمنعها من أن تعشش في راسك

تصادق مع الذئاب ....على أن يكون فأسك مستعداً

إنك تخطو نحو الشيخوخة يوماً مقابل كل دقيقة من الغضب

الذي يولد وهو يزحف، لا يستطيع أن يطير

نحن نحب الماضي لأنه ذهب، ولو عاد لكرهناه

من العظماء من يشعر المرء فى حضرته أنه صغير ولكن العظيم بحق هو من يشعر الجميع في حضرته بأنهم عظماء

المرأة هي نصف المجتمع، وهي التي تلد و تربي النصف الآخر

لكل كلمة أذن، ولعل أذنك ليست لكلماتي، فلا تتهمني بالغموض

لا تجادل الأحمق، فقد يخطئ الناس في التفريق بينكما

قائمة ال30

2008-09-29T12:25:00.001+02:00

فاضل 27 يوم وأجفّل العقد ال30 من عمري!!!! كبرتي يا نعامة ودخلتي عالم ال30. ياخوفي يا بدران من ال30 وتوابعها. المهم ننسى توابعها ونفكر فيها نفسها.
رقم برضو بس مش هكتب عن هذا الرقم غير لما أوصله، لسه فاضل كام يوم، ألحق استمتع بالعشرينات.

فيه حاجات كان نفسي أخلصها وأعملها قبل م أتم ال30 من عمري وعند قائمة منسدلة بالحاجات ديه.
نرجع للقائمة بتاعتي، الحقيقة مش فاكرة فيها حاجة، هاهاهاها مش عارفة ايه اللي حصل لي. كان فيها على ما أتذكر:

1-اشتري عربية (هع جبت واحدة من زمان)
2- أحوش فلوس واسافر رحلة طويلة (سافرت، بس رحلات قصيرة ومحوتش حاجة وعندي ديون)
3- أروح نيبال (ولا شكلي ههوب ناحيتها)
4- اتسلق الهيمالايا وافرست (عمر سمرة عملها قبلي في افرست وشكلي برضو ولا ههوب ناحيتهم)
5-أسافر أسبانيا لزيارة صديق عزيز (قريب إن شاء الله)
6- أحلق شعري زلبطة (لما طول رجعت في كلامي)
7- أخلص رسالة الماجيستير (هع)
8- أشتري حاسوب محمول (اشتريت واحد هايل ومبسوطة به)

مش فاكرة بقى بقية القائمة، هزود الباقي لما أفتكر.

عندي برضو فكرتين عشان احتفل بعيد ميلادي ال30، أصلي بحب الأحتفالات والمفاجآت كمان، بس لسه موصلتش لفكرة وكمان حالة الغابة وكل الأحداث السريعة المتتالية إللي بتحصل بسرعة أوي ومش بتلحق الحيوانات انها تفوق منها لا تشجع اطلاقا على الأحتفال.

كل سنة وأنتم يا أهل الغابة الكرام طيبين.

كمالة من عند أبوطارق

هزوّد كمان أمنيتين ملهمش علاقة بال30 بس هما أمنيتين بتوعي وخلاص:
1- أحضر حفلة ل بينك فلويد وده برضو من عاشر المستحيلات
2- أحضر حفلة لفيروز وأتمنى يحدث قبل م أتم ال70 من عمري وربنا يديها الصحة والنشاط والحيوية

What’s Up

2008-09-02T10:34:00.002+02:00

Twenty five years AND my life and still
I'm trying to get up that great big hill of hope
For a destination
I realised quickly when I knew I should
That the world was made FOR this
Brotherhood of man
For whatever that means

[Chorus:]
And So I cry sometimes when I'm lying in bed
JUST To get it all out what's in my head
AND I, I Am feeling a little peculiar
AND So I wake in the morning and I step
Outside AND I take deep breath
AND I get real high
And I scream from the top of my lungs
What's goin' on

And I SING hey-YEAH-YEA-EAH, EAH HEY YEA YEA
I said hey! what's goin' on
And I SING hey-YEAH-YEA-EAH, EAH HEY YEA YEA
I said hey! what's goin' on

OOOH, OO! OOH-HOO-HOO-HOO-HOO
OO-OOH-HOO-HOO-HOO-HOOOO
OOOH! OOO-AAH-HOO-HOO-HOO-HOO
OO-OOH-HOO-HOO-HOO-HOOOO

And I try, oh my God do I try
I try all the time
In this institution
And I pray, oh my God do I pray
I pray every single day
For a revolution

[Chorus:]
And So I cry sometimes when I'm lying in bed
JUST To get it all out what's in my head
AND I, I Am feeling a little peculiar
AND So I wake in the morning and I step Outside
AND I take deep breath
AND I get real high
And I scream from the top of my lungs
What's goin' on

And I SING hey-YEAH-YEA-EAH, EAH HEY YEA YEA
I said hey! what's goin' on
And I SING hey-YEAH-YEA-EAH, EAH HEY YEA YEA
I said hey! what's goin' on

And I SING hey-YEAH-YEA-EAH, EAH HEY YEA YEA I said hey! what's goin' on
And I SING hey-YEAH-YEA-EAH, EAH HEY YEA YEA
I said hey! what's goin' on

OOOH, OO! OOH-HOO-HOO-HOO-HOO
OO-OOH-HOO-HOO-HOO-HOOOO-AHH-HAA

Twenty five years of my life and still
I'm trying to get up that great big hill of hope
For a destination

أخيرا ربطت الشبه

2008-08-21T14:34:00.001+03:00

من أول يوم قابلت فيه مصطفى حسين وأنا بشبه عليه ومش عارفة هو شبه مين أعرفه. لحد امبارح بالصدفة بتفرج على أو تي برنامج عن البورصة المصرية، وكان ضيف البرنامج ماجد شوقي رئيس بورصتي القاهرة والأسكندرية. قلت بس عرفت مصطفى شبه من، ياااااااه أتاري أنا في مخي بشبه عليه وأنا مش واخدة بالي.

أول مرة تقابلت مع ماجد شوقي كان في كلية الأقتصاد والعلوم السياسية في أواخر تسعينيات القرن الماضي، كنت بدرس الأقتصاد وكان فيه محاكاة للبورصة المصرية، كان الأستاذ ماجد من المحاضرين. الحقيقة أُعجبت جدا بطريقة شرحه للبورصة ولقيت ان طريقة تفكيره كويسة وكمان بيفهم. وتخرجت من الجامعة ونسيته.

بعد سنين قابلت مصطفى حسين مش فاكرة امتى ولكن في بدايات القرن الحالي ومش فاكرة فين. لقيته بيدرس الطب النفسي وكان فيه حوار مشترك بيننا عشان أمي كمان طبيبة نفسية. وكمان تقابلنا اتقابلنا في معرض الكتاب في سنة من السنين ومن ساعة م قابلته وانا بشبه عليه.

ألوان

2008-08-14T11:15:00.003+03:00

دايما أصف الناس وأيام الأسبوع بالألوان.

مثلا يوم السبت لَبَني وتخين كده. يوم الخميس كحلي (ممكن عشان الخروج بيكون بالليل). يوم الأربعاء أحمر (أنا بحب اللون الأحمر بس مش بحب يوم الأربعاء!) يوم الاتنين موف كده أو لون ملخبط، يوم الأحد أزرق على رمادي، يوم الثلاثاء رمادي أمّا يوم الجمعة بقى ف لونه أصفر أو حاجة منورة كده.

الناس بقى مش عارفة ليه لهم صفة الألوان، بس عندي صديق شفاف ملوش لون مش عارفة ليه، وصديق تاني بني زي القرد القرود. أما الغزالة ف لونها أخضر، أنا بقى لوني أحمر (هاهاها)، ولما بقابل حد لأول مرة ألاقيه داخل عليا باللون بتاعه ويفضل معاه على طول، زي الأنطباع الأول بالظبط. بس ده ملوش دعوة بحكمي على الشخصية ديه حاجة بيني وبين نفسي.

أمل وعمر

2008-08-07T13:43:00.002+03:00

درسنا في سنة أولى ابتدائي كتاب أمل وعمر واستمرت دراسة حياة أمل وعمر وبقية الأقارب لسنة ثانية ابتدائي أو ثالثة مش فاكرة الحقيقة. وكنت بعيش بقى مع أمل وعمر وسعاد وفريد قرايبهم إللي بييجوا يزوروهم في الأجازة.

وكان فيه درس عن ساعي البريد:

"افتح الباب فريد،انه عمي سعيد، انه ساعي البريد، انه جاء إلينا ....مرحبا عمي سعيد"

مش فاكرة البقية.

ودرس عن البطة إللي فوق الشجرة، هاهاها

وديه شوية صفحات من الكتاب إللي اختفى من مناهج التعليم في مرحلة التعليم الأساسي. ويُعتبر هذا الكتاب ثروة علمية ونادر الوجود الأن وإللي لسه عنده ومحتفظ به هيكوّن ثروة مع الزمن.

صباح البطيخ

2008-07-10T13:31:00.002+03:00

قريت هنا ان البطيخ مفيد جدا للبتنجان..وعلى رأي المثل "إذا أسمكتم ف ابطخوا".

الحنة

2008-06-11T15:50:00.001+03:00

هو نبات جذوره حمراء، أخشابه تستخدم لصبغ الشعر باللون الأحمر وللرسم على الجسم.

وفن نقش الحنة ده حكاية لوحده، ساعات بيخلطوا الحنة بالصبغة عشان تثبت على الجسم، بس ده بيسبب التهاب للبشرة الحساسة، وفي أحيان تانية بيستخدموا الحنة الخالصة.

تحتفل العروس قبل ليلة الزفاف بليلة الحنة، عادة كانت قبل الفرح بليلة واحدة، ولكن مع المجهود المبذول في هذه الليلة المفترجة جرت العادة على ان تكون ليلة الحنة قبل الزفاف بليلتين أو بفترة عشان العروس تستريح وتستعيد لياقتها.

وفي ليلة الحنة تضاء الأنوار وتعلق الزينة وتتبخر الملابس ويبقى منها القليل الخفيف الهفهاف ويعلو صوت الموسيقى لتتمايل الاجسام والعيدان النحيفة والممتلئة منها. واديها رقص طول الليل وتظهر المواهب المدفونة عند البنات والسيدات الحاضرات. ومعروف ان الليلة ديه مخصصة لصديقات العروس وأقاربها من الجنس اللطيف فقط، وبالتالي الأب ولو كان لها أخ بيتسربوا برة البيت عشان المعزومات يأخذن راحتهن.

كان زمان ليلة الحنة تييجي فيها سيدة سودانية ترسم للبنات والسيدات والعروس طبعا، وتقوم الصديقات بأحياء الليلة. بعد كده تطورت الليلة، بقى فيه فرقة تقوم باحياء الليلة مكونة من دي جي بنت طبعا وسيدة رسم الحنة وبنتين أو بنت واحدة لزوم الأستعراض وتكون الليلة مكونة من فقرات. تقوم بنتين الاستعراض بمساعدة العروس على تغيير الملابس، مرة تلبس توب سوداني وترقص ومعاها المساعدات (لو محتاجة مساعدة طبعا فيه مش محتاجين خالص) ومرة تلبس بدلة رقص شرقي، وفقرة لجلابية تحية كاريوكا وهكذا. وفي نفس الوقت بتكون سيدة الحنة بترسم للموجودات. وتفضل البنات ترقص لحد م رجليهم تفأفأ.

وتختلف أماكن الرسم من بنت للتانية، فيه بيرسموا على الكف، وفيه بيرسموا على العرقوب، على الدراع، على الصدر، على الظهر، على الكتف، وأي منطقة في الجسم ممكن يترسم عليها.

ليلتكم فل

راس العمل

2008-06-03T11:49:00.004+03:00

مكنتش هكتب عن هذه التجربة ولكن الأرنوب قال لي طب ليه متكتبيش، ف هاحكي عن الكعب ومغامراته.
من الأوراق المطلوبة للالتحاق بوظيفة جديدة "كعب العمل"، مش فاهمة هما ليه سموه كعب العمل مع ان الواحد بيكون لسه في البداية، ليه مايكونش راس العمل. المهم كعب العمل ده ورقة رفيعة طويلة كده فيها بيانات الملتحق بالوظيفة.
بما إني اشتغلت تاني وبالتالي لازم اعمل كعب عمل جديد، المرة ديه سهلة بقى أنا بقيت خبيرة في مكاتب العمل ومش هياخد مني وقت. طيب أروح الصبح بدري قبل الشغل، كنت هناك الساعة 8 ونص الصبح، الموظفة لسه بتفتح الباب.
صباح الخير، لو سمحتِ أنا عايزة أعمل كعب عمل.
مش هنا، في مكتب العمل.
معلش أومال أنا فين؟
أيوة، ده مكتب عمل بس الكعوب مش بتطلع من هنا. عارفة محطة اوتوبيس 166 هو هناك عمارة لونها احمر.
أخد بعضي وانطلق ع المنطقة إللي هى قالتلي عليها، وإللي أنا أصلا ماعرفهاش..ألف وأدور حولين نفسي، وأدخل في مجاهل البساتين. الشارع ضيق ومكسر، وماشي فيه ناس وعربيات واوتوبيسات ومايكروباصات وميني باصات وعجل وكل وسائل الأنتقال إللي عرفتها في حياتي.
طبعا اتخنقت و استفزيت ف أخدت بعضي ورحت ع الشغل.

يوم أجازة قررت أقضيه مع الموظفات في مكتب العمل، ألف وأدور من الأول في المنطقة، وسبحان الله تظهر العمارة الحمراء بقدرة قادر وتنور في الشارع الضيق ده. أدخل الشقة (مكتب القوى العاملة).
صباح الخير، عايزة أعمل كعب عمل لو سمحت.
ملحوظة: الجو حر والشقة خنقة والموظفة منقبة والدنيا زحمة عليها.
معاك صورة المؤهل؟
ماهو موجود ع الرقم القومي.
لازم المؤهل.
حضرتك، ماهو موجود ع الرقم القومي، والموظف إللي اصدر الرقم اطلع على المؤهل وأخد منه صورة.
أنا هدخله ع الكمبيوتر.
ماهو لو حضرتك كتبت رقمي القومي هيطلعلك اسمي وصورتي وكمان المؤهل.
لازم صورة المؤهل.
هو حضرتك بتجمعي ورق وخلاص؟
أيوة.
طب مع السلامة.
ومشيت أجرجر في رجليا وأنا محروق دمي.

كلاكيت تالت مرة.
يوم تالت عشان الكعب. معايا كل حاجة ممكن يسألوا عنها. وكمان الورق جوة ملف جديد.
صباح الخير، لو سمحت عايزة أعمل كعب عمل.
مليتي الأستمارة؟
أيوة، اتفضلي وصورة البطاقة وصورة المؤهل.
يا دينا طلعي الورق من الملف
الحق عليا أنا غلطانة عشان حطيت الورق في ملف المرة الجاية هجيبه كده.

واخدت الورق وبدأت تكتب في الكعب كل البيانات إللي انا كتباها في الاستمارة ومشفتش ولا البطاقة ولا صورة المؤهل. طب م كان من الأول أكتب أنا البيانات في كعب العمل وهى تمضي وتختم ونخلص.

وأخيرا زفت وطلع كعبي وكوعي وصباع رجلي.

ايه اللي جوة الشنطة

2008-05-28T12:43:00.004+03:00

زمان كنت باشيل شنط حسب المناسبة وحسب لون اللبس أو الجزمة وحسب المكان طبعا. ولو فتحت شنطتي تلاقي فيها:
-المحفظة (إللي كان فيها كل صور الأصدقاء تقريبا وكل الكروت إللي موجودة في العالم بتاعي وأي ورقة ممكن نتخيلها وطبعا كارنيه النادي وكارنيه الجامعة وفلوس (على أدّي) والبطاقة
-مراية صغيرة (بتتفتح وكان فيها كمان مشط أحمر جميل)
-روج أو ملمع للشفايف
-كريم مرطب
-برفان
-مناديل ورقية
-قلم
-ميداليات مفاتيح (مفاتيح أبواب العالم كله)
ولما ظهر التليفون المحمول كان بيكون جوة كمان.

ولما كبرت شوبة أضفت نوتة للشنطة، والمفاتيح قلت شوبة وبقت ميدالية واحدة بس على شكل هيكل سمكة وكمان المحفظة طلع منها الصور عشان 3/4 الناس اللي في الصور اختفوا من حياتي. طبعا زادت الكروت والكارنيهات.

ولما كبرت اكتر، هيكل السمكة اتكسر والميدالية بقت واحدة بس، والمفاتيح هى مفاتيح البيت ومفاتيح العربية وكفاية أوي كده. والروج هرب وملمع الشفايف أصبح وحيد، أما الكريم المرطب بقى مكانه تابلوه العربية ومعاه المناديل الورقية والقلم.

ولما كبرت تاني، مبقاش في شنطة لي أصلا عشان بقيت باشيل شنطة السيس وفيها محفظتي (إللي حجمها كبر وتضخم جدا) ومفاتيحي والموبايل وخلاص.

بسبوسة - ننوسة

2008-05-27T13:26:00.003+03:00

هى: بتحبني؟
هو: أيوة يا ننوسة.
هى: طب أد إيه؟
هو: أد البسبوسة.
هى: متحبنيش بالشكل ده.
هو: مبحبكيش بالشكل ده.
هى: أهو قاللي مش بيحبني، يا ناس يخلصكوم كده؟*

ـــــــــــــــــــــــــــــــــــــــ
*أشعار صلاح جاهين

استفزاز

2008-05-27T13:14:00.002+03:00

لو نتعمق في الكلمة وحروفها نلاقيها هى مستفزة أصلا. وتكوين الحروف مع بعض يبعث على مستخدم الكلمة أو قاريئها الاستفزاز؛ الألف وبعدها السين والتاء مع الفاء وتكرار حرف الزاي لوحده مستفز.
وهذا هو احساسي هذه الأيام، مش عارفة ليه؛ أي حاجة غريبة بتحصل أشعر بالاستفزاز الفوري!

استفز مستفز استفزاز

بوذا بابا والأربعين حرامي

2008-02-12T23:39:00.000+02:00

ذهبت وأمي والسيس إلى الحديفة اليابانية بحلوان، عرفنا انها تجددت ف فلنا نروح ونشم هواء ونستمتع بالشمس وفرصة السيس يلعب كمان.
أول مرة أروح هناك، سمعت كتير من ماما عن الحديقة زمان كانت ازاي وجمالها وحلاوتها في الشتاء وعن تمثال بوذا في وسط الحديقة وحوله تلاميذه ال44. المهم، وصلنا بالسلامة، أخدنا الكرة وترمس الشاي (أساسي) ودخلنا.
أخدنا لفة كده، ماما بتقول انها فعلا اتجددت وكمان عملوا فيها بحيرات.
نروح لمنطقة ملاعب الاطفال عشان السيس يتمرجح:
-مقفولة يا آنسة!! قال لي الحارس.
-ليه مقفولة والألعاب كلها جديدة؟
-المحافظ قافلها عشان ه يضيفها ع التذكرة.
-طب م يضيفها أو يفتحها لحد م يضيفها ع التذكرة..يعني هتفضل كده لحد م تصدي؟!
ناخد بعضنا ونمشي، نروح لتمثال بوذا وتلاميذه. أصبح التمثال محاط بسور وبحيرة صناعية، بس على مين برضو الأطفال الملاعين عرفوا ينطوا السور ويقفوا على التماثيل.
وقفت أصور السيس، وفجأة فقز طفل على تمثال من التماثيل وقال له: كده يا حرامي تسرق علي بابا.
طبعا استغربت، ماله ده ومال علي بابا؟؟!!!
-يا ماما، شفتي الولد؟
-أصل الأمهات بتفهم أطفالها ان ده علي بابا وإللي حواليه دول الأربعين حرامي، هاهاهاها. بس في الفيلم والحكاية عملوهم 40 وهما في الحقيقة 44. أنا سمعت واحدة جنبي بتقول كده لبنتها.
طبعا فضلنا نضحك كل م نفتكر الولد الصغير وهو بيضرب التمثال الحرامي.

تعالى يا بوذا وألحق تلاميذك.

آخر يوم وآخر يوم

2007-12-31T14:15:00.001+02:00

النهاردة آخر يوم في السنة وآخر يوم لي في الشغل!!!!
مظبطاها جدا..المهم احتفلنا بخروجي على قدميّ من الشغل ولسه في المساء هشوف بقى أخبار الاحتفالات ايه.

رابع مرة أغيّر شغلي..احساس غريب جدا..مش عارفة المرة ديه مستغربة ليه..ممكن عشان أول مرة في حياتي أقفل مشروع مش استقيل واسيبلهم الشغل زي ال3 مرات اللي فاتت. والمرة ديه كمان أثبت إني مش بعمّر اكتر من 3 سنين في مكان واحد (أعتقد هو كفاية 3 أكتر من كده نكد). الحاجات الخاصة بي (2 قُلّة، سجادة، 2 زلعة، قُفّة، طبق فيه ورد مجفف وأدوات المكتب بتاعتي) حطتها في كراتين وهنقلهم آخر النهار..برضو مستغربة.

من بكرة هكون فاضية..أصحى براحتي (مش أوي برضو، السيس موجود وبيلعب أقوى الأدوار)..هخرج في الشمس..عايزة أعمل حاجات كتير...في مخي خطط بس مش عارفة هتتنفذ ولاّ تُدفن مع إللي قبلها.
وهل هسكن الكنبة زي صديقي ولاّ هكون نشيطة زي مانا دلوقتي؟ هشوف لسه.

كنت بفكر في سؤال السمكة والعصفورة..دايما كنت بسأل أصدقائي..تكونوا سمكة ولاّ عصفورة؟ أنا عايزة أكون سمكة...عالم البحار لسه لم يُكتشف بعد..فيه دنيا تانية خالص تحت الماء احنا منعرفش عنها غير معلومات قليلة..وبالتالي أحب أكون سمكة (بس قوية) عشان اكتشف العالم ده..بالنسبة للعصافير يعني ممكن أركب طيارة ولاّ صاروخ وهشوف هما بيشوفوا إيه من فوق.

كل سنة والناس طيبين

اجري بسرعة يا واد يا حسين

2007-12-21T22:31:00.000+02:00

(هذه التدوينة ملوخية)

السلطعون المائي والعقرب الهوائي أصبحوا أربعة (مع انهم اتنين مش عشرة)..ألف مبروك.

النهاردة قفّلت 3 سنين تدوين..مدة مش قصيرة ومش طويلة برضو..هى عمر طفل صغير لسه هيدخل الحضانة. كتبت حاجات كتير مش كلها عجباني الحقيقة بس أهي موجودة مش هشيلها.

النهاردة كمان بداية فصل الشتاء اللعين..دخل بالبرودة اللعينة والأنفلونزا الوغدة وهلوستها العجيبة مع ارتفاع في درجة الحرارة وانسداد المناخير وفتح الفم للتنفس مع جفاف في الحلق والشفايف واديها كريم وزبدة كاكاو وكام ازازة ماء حياة وهى تمشي وتتحسن.

وكمان ايه تاني النهاردة، الذكرى السنوية للغرباء السبعة (دول غير الأقزام السبعة ومفيش أميرة ولا حاجة فيه غابة بس).

آخر حاجة بقى قبل الرشفة الأخيرة من القرفة الجميلة بزنجبيلها الاذع..ينتعك يا لولفين بالسلامة بقى (خللتي أوي المرة ديه).

وكل عام وأنتم بخير وسلم لي ع الخروف والفروة.

تمثال لي ولكاميلا

2007-11-13T13:26:00.001+02:00

أول اصدار للحَمارنَب

جائزة نوبل لعام 2007

2007-11-05T14:06:00.000+02:00

ألف مبروك للدكتور شنودة

حدث في مثل هذا اليوم

2007-11-01T12:23:00.000+02:00

الساعة 4 وخمس دقائق عصرا بالظبط يوم 1 نوفمبر 2006 حدث شق طويل في بطن النعامة ليفسحوا المجال لواحد من أهم الحيوانات في الغابة وهو الكتعوم عشان يخرج ويقابل ناس كتير واقفة مستنياه..ويسيب أمه نايمة في البنج بيخيطوا بطنها يا حرام.

زف راء الخبر للغابة من 12 شهر بوصول الكتعوم
وبالمناسبة أشكر جدا الدوك راء على هذه التدوينة الرائعة (بالنسبة لي يعني).

مش عارفة اكتب ايه تاني النهاردة عيد ميلاد السيس بيس، اتولد..شوية وسند راسه..شوية وعرف يقعد، بعد كده زحف على بطنه زي الدودة، وبعدين بدأ يحبي، مرة واحدة قام ومسك في الترابيزات، وهوباااااااا عرفنا نمشي. وديه صور لمراحل مختلفة من عمره إللي هو 12 شهر :-)

اضافة:الصورة ديه بقى بعد م حلق شعره عشان بيفتكروه بنت دايما وكمان لسه مصوراها وهو عنده سنة

يا حلاوتهم

2007-10-29T14:18:00.000+02:00

اتعرفت على الموقع ده من خلال الصفحة ديه.

مش مصدقة جمال الحيوانات..الفيل وهو بيتصور ولاّ الزرافة..موديل يا خواتي. وفيه صورة توتالا (بورتريه يعني) للأسد مش سهل خالص.

اسيبكم تستمعوا.

الأرنب والتعلب

2007-10-25T11:19:00.000+02:00

أحب أهدي هذه الحكاية لصديقي الأرنب، ممكن نتعلم منها حاجات كتير. ونخلّي بالنا بكرة الجمعة.

القاف

2007-10-01T15:11:00.000+02:00

الحرف ده بقالي يومين بتأمل فيه..قوي جدا على فكرة. أخدت بالي ان الكلمات إللي فيها حرف ال"ق" بتكون مش سهلة خالص؛ زي مثلا قلقلة - قوي - حقيقة - عشق - قلب - قومية - قلم وكمان قرد وطبعا الكلمة إللي صديقي مشهور بها "استقطاب. باحس ان الكلمات فيها رقيّ وبتحتاج استجماع كل طاقتي عشان انطق الحرف، بيطلع من جوة كده. ومعنى الكلمات برضو جميل زي خُلُق وقناعة، طبعا فيه كلمات تاني كتير وكمان بقية حروف اللغة العربية لو تأملناها هنلاقي لها جمال برضو، بس هو ده إللى جه على مخي اليومين دول..أُعجبت أنا بال"ق".

لولو الصغيرة

2007-09-25T11:46:00.000+02:00

استنساخ لولو الصغيرة.

غباء مستفحل

2007-09-23T13:53:00.000+02:00

قاعدين مستنيين الاوتوبيس عشان يروحوا. سألته هى..هو انت مش هتتجوز؟ قالها مش عارف.
كانت عايزاه يقولها أيوة هتجوزك انت، بس مفهمش.

مرة تانية بيتمشوا ع الكورنيش، قابلتهم بائعة ورد، اشتري مني ورد عشان الأمورة تتجوزك. هو: بس هى ترضى. المرة ديه هى مفهمتش.

يوم واحد

2007-09-20T15:26:00.000+02:00

جازولين كحولي

2007-09-18T12:32:00.000+02:00

العربية محتاجة بنزين..أروح محطة بنزين "وطنية"، أفوّل العربية...شم شم شم، إيه ده! الريحة غريبة شوية.. ممكن فيه عربية بتسرب حاجة.

أخرج من البنزينة..الريحة لسه موجودة...ياخوفي ع المركبة أحسن تكون خربت ولا حاجة...تختفي الريحة شوية..طب كويس مش عربيتي بقى الحمد لله.

أعدي من جنب عربية وانا ماشية في الشارع،،شم شم شم إيه ده! نفس الريحة تاني!!! الله هو فيه إيه؟!

اسمع الناس بتتكلم عن غش البنزين بالسبرتو..ناس تاني تتكلم عن ان ديه هى ريحة البنزين الأصلية..أصل ده بنزين مش مغشوش..مش إللي احنا بنستخدمه طول عمرنا، قصة تالتة بقى تقول إيه؛ أصل ده بنزين مستورد من لبيا أو دبي، يا حلاوة يا ولاد.

وأنا مالي بقى بنزين نضيف ولا مستورد، ذنبنا إيه العربيات تخرب، ونتوه احنا بقى عشان نصلح والعيب منين وغلطة مين والكلام ده كله.

البوابة

2007-09-16T11:50:00.000+02:00

هي ديه بوابتهم

هاتوا الفوانيس يا ولاد

2007-09-12T10:34:00.000+02:00

مع رمضان بينزل عليا احساس بالانتعاش والنشاط، مع إني باكون مسهتنة على نفسي في أول كام يوم كده بس عندي احساس ان رمضان السنة ديه هيكون مختلف.

أنشطة رمضان السنة ديه كتيرة ومختلفة. أساسي الفانوس لا استغنى عنه كل سنة، لي صورة كده مع الفانوس ~~هحطتها لما ألاقيها~~ (أحب أصور نفسي).

في المعادي، فيه ميدان بنسميه في رمضان ميدان الشجرة، تزين كل أو أغلبية الشجر إللي في الميدان بفوانيس صغيرة وملونة، بيكون شكل الميدان جميل جدا. بدأت هذه الظاهرة تنتشر في المعادي، فبيكون شكل الشوارع جميل.

هنزف عريس يا ولاد...هنزف عريس.

كل عام وانتم بخير.

وردتي

2007-09-10T16:37:00.000+02:00

عندي من سنتين..وفي كل عام في نفس الميعاد بتظهر سوسن.
سوسن ديه وردتي الجميلة..إللي كل ربيع بتطّل عليا،، وتقعد معايا 3 أسابيع، وبعدين يتساقط الورق، وتموت سوسن عشان تفتح تاني السنة إللي بعدها.
السنة ديه سوسن فتحت ومعاها سويسنة..وردة تانية صغيرة. مش عارفة جت منين، العبي يا سوسن.
بس خلاص انتهى الربيع وانتهى الصيف وكمان كام يوم هيدخل علينا الخريف الكئيب.

اختفاء

2007-08-21T13:41:00.000+03:00

قررت اختفي عن الظهور (أنا أصلا قليلا ما أظهر) واعتكف واتقوقع في عشّي في الغابة. لا أعتقد ان حدّ هياخد باله من اختفائي عامة.

أنيمال

2007-08-15T13:07:00.000+03:00

شخصية أنيمال في المابيت شو كانت هايلة جدا. أصلا مش بيتكلم، هو كل إللي بيعمله في الحلقات إللي بيظهر فيها انه يكسر، يتخانق أو يعمل مشاكل وخلاص. ديه أكتر شخصية بحبها، وكمان بحب الرجلين العواجيز المتفرجين إللي بيتريقوا على كل حاجة ويضحكوا عليها. وطبعا الضفدع حبيب الملايين :-)
الحقيقة كل شخصيات المابيت شو مش سهلين خالص، بس أنيمال الحقيقة مفيش زييه.
كان المابيت شو بييجي زمان ع القناة التانية في التليفزيون المصري، افتقدها فعلا، الحلقة قصيرة وخفيفة. ومن أشهر الحلقات إللي انيمال أبدع فيها هى الحلقة ديه. حتى الأغنية بتاعتها مشهورة جدا ولسه الناس بتغنيها لحد دلوقتي، مع إن ملهاش معنى أصلا.

يجعل من الحبّة....فوطة

2007-08-14T12:43:00.000+03:00

شريط فيه حبوب، دواء؟ ممكن. ناخد حبّة من الشريط، نحطها في نص كوب ماء..هِنج بِنج فِنج..تطلع فوطة.

وحدي قاعدة في الغابة

2007-08-08T16:53:00.000+03:00

متكلمناش من أسبوع، وده غريب علينا احنا الاتنين..عادة بنتكلم كل يوم في التليفون أو نتقابل كمان.

سافرت الغزالة من أسبوع بالظبط..كنت فاكرة هنشغل بقى في حياتي والشغل والكتعوم، بس محصلش.

وحشتيني على فكرة.

الصحراوي رايح جاي

2007-08-05T16:21:00.000+03:00

بما إن الصيف دخل علينا من شهرين...وجَبْ علينا بقى زيارة البحر.
وبالتالي ناخد الصحراوي كل أسبوع رايح جاي.
الاسبوع ده بقى بيوزعوا نشرة اعلانية عن تحديث الطريق الصحراوي وتطويره ليكون مثل طريق القاهرة/العين السخنة؛ طريق مفتوح..اللهم صلي ع النبي. لما نشوف ده هيحصل امتى كده كمان خمس سنين ولاّ في السريع ع الصيف الجاي؟

ع الرصيف

2007-07-30T18:15:00.000+03:00

المفروض ان مكان عملي عبارة عن مبنى من 4 أدوار..ولكن لزيادة عدد الموظفين في المشروع إللي باشتغل فيه؛ انتقل المشروع إلى مبنى يقع خلف المبني الأصلي مباشرة..وبحكم عملي باتنقل بين المبنيين. في الطريق اقابل سيدتين، واحدة في منتصف العمر أو هى شكلها كده من الغلب وممكن تكون صغيرة السن، والثانية مسنة وده واضح جدا. ومن كثرة مروري بهما، اصبحنا أصدقاء..نصبح على بعض في الصباح ولو غبت يسألوني تاني يوم حضرتك مجتيش امبارح، خير؟
النهاردة بقى، وأنا رايحة للمبنى التاني ع الساعة 11 كده، كانوا بيشربوا شاي، عزمت علي السيدة المسنة بكوب من الشاي، كان شكله حلو جدا ومشجع، بس أنا كان عندي اجتماع، ف اعتذرت بأدب. وأنا راجعة بقى كانوا لسه بيشربوا شاي وكمان عائلة السيدة التانية (إللي شكلها كبير) وعزمت عليا بكوب شاي تاني، قلت في نفسي بقى مبدهاش، وأنا أصلا باحب الشاي زي عينيا وكمان شكله حلو كده وظريف، وقعدت معاهم ع الرصيف وشربت الشاي، اللله. أحب أنا الشاي إللي معمول في الكوز ده بيكون طعمه مختلف تماما عن إللي بنشربه في البيت الحقيقة.
أفتكرت لما كنت في زيارة من زياراتي لأسوان الجميلة، كنت في مقياس النيل في جزيرة أسوان، وعزم علي العسكري والحارس بكوب شاي أحمر تقيل، قعدت معاهم تحت الضليلة وفضلنا نتكلم ونشرب الشاي ببطء كده وتأني..كانت لطيفة جدا.
هروح أعمل شاي بقى.

مااااااااااااء

2007-07-29T14:39:00.000+03:00

عطشان يا صبايا دلوني على السبيل

والمَيّة في إيديكي وعدوية عطشان

كيف يشكو من الظمأ من له هذه العيون

المَيّة تروي العطشان وتطفّي نار الحران

وأملا كفوفي من النيل وأشرب حلوة المَيّة لو مصرية

باحب اتنين سوا المَيّة والهوا

جدّو علي عنده خروف مااااااء

محاسن..تزامنية..شهوات..مكالمة تليفون

2007-07-16T13:40:00.000+03:00

التدوينة ديه طويلة حبتين بس أحداث كثيرة حصلت من امبارح للنهاردة.

محاسن

سافر القرد إلى غابة بن الكبير..عنده شغل هناك وبعدين يتفسح..وكل شوية يقابل حدّ نعرفه..طب جميل..م هما سكان الغابة كده بيخبطوا في بعض في أي حتة..بس محاسن بقى تألقت هذه المرة بطريقة غير طبيعية..عِكوَة كمان في غابة بن الكبير..عادي الغابة كبيرة، كتير بيزوروها في هذا الوقت من العام. إذ بي أفوجأ برسالة ع المحمول من القرد..بيسأل هو عِكوَة موجود هنا؟ رديت وقلت آه أنا نسيت أقولك. رد تاني وسأل على اسم مراته..رديت وقلت اسمها كالابيستا..رد تاني وكانت الصاعقة "احنا قاعدين مع بعض عند صديق مشترك في نفس البيت!!!" اذبهليت وبلمت وقلت في نفسي لا لا لا لا الرحمة يا سُنسُن مش كده أبداً. بس هى ديه محاسن مش هتجيبه من برة يعني.

تزامنية

سافر زحلوف إلى غابة جزيرة الملك..عنده شغل برضو..ومن ساعة م قال يا سفر..والدنيا كلها بتتكلم عن الغابة ديه..حتى الأفلام والأعلانات..والكتب..والأفلاك التسجيلية..مش ممكن يعني ارحمونا برضو..والراديو شغّال موسيقى..إيه يا ولاد مالكم كده..بس مش متضايقين الحقيقة يعني :-)

شهوات

ده عنوان مقتبس من عند شموسة أو في الأغلب تكملة للتدوينة بتاعتها. عندنا في الشغل بيشجعوا المرأة وحقوق المرأة والحاجات ديه..المهم لما بيضة النعامة فقست..بنوا لنا حضانة عشان الكتاعيم الصغار..لطيف جدا، وحل مريح للنعامة والكتعوم. امبارح..وأنا مع الكتعوم بأكّلُه..فتحت إحدى مشرفات الحضانة موضوع الختان.
أ: تصوري؛ المفتي كذب حديث نبوي واصدر فتوى ان الختان حرام.
أنا: طب م هو حرام يا أ، من قالك انه حلال يعني.
دار حوار عن الحرام والحلال مالوش لازمة.
أ: أصل الختان لازم وضروري.
أنا: ليه؟
أ: أصل البنت إللى مَ تتخَتِنش تكون مجنونة ومش على بعضها.
استغربت طبعا ورديت: يعني شايفاني مجنونة اقدامك وماشية اقطع في هدومي واقفز ع الناس ولا إيه؟ إيه الكلام الغريب ده يا أ.

تتدخل ب في الحوار: أنا فاكرة يوم مَ طاهروني. كان عندي 11 سنة.
أنا: هو انت كمان يا ب؟؟
ب: آه طبعا، بس مش عارفة هما بيعملوا كده ليه!أنا متوجعتش ولا حاجة.. الدكتورة رشيتلي بينج كتير وبعدين اشتغلت. وبعد كده لفت الجلدة ديه في شاش بملح وعلقتها في ذراعي. وعقدت فتلة 7 مرات وربطتها في إيدي، ولا الوالدة تتدخل عليا ولا إللي بترضع، ولو واحد معاه لحمة نيّة أنا إللي ادخل عليه، عشان متشهرش. وعملولي زفة، وخالة أمي إللي مش بتتحرك، سافرت مخصوص عشان تبارك لي، وفضلت عندنا لحد السبوع.. وفي السبوع عملولي زفة تانية ونقوط، ولا كأنه فرح. جابولي دهب وهدايا، وكنت باكل زي الست الوالدة بالظبط فراخ وشوربة.
أ:أنا بقى كنت أصغر شوية، كان عندي 8 سنين..برضو محستش بحاجة. بس معملوليش فرح ولا حاجة..أمي وجدتي وأنا رحنا للدكتورة وخلاص..وعلى بالليل نزلت ألعب في الشارع عادي.
ب: أنا تعبت شوية ورقدت أسبوع في السرير..وكانوا ملبسنّي جلابية :-)
أنا: مش عارفة أقولكم إيه الحقيقة.
ودار حوار طوييييييل عن الختان وهل هو تقليد قديم متبع ولا فرض علينا.

مكالمة تليفون

من 3 سنين كتبت تدوينة عن مكالمة تليفون. النهاردة حصل لي نفس الموقف، بس اليوم كان عادي يعني مش وحش ولا ممل. كنت بافطر على شط النيل مع اللولفين، ورنّ المحمول، ورديت. انشكحت كده وتغيّر مسار اليوم، وأصبح مشرق وسعيد :-)

هى زيزي بس طاطا

2007-07-11T10:36:00.000+03:00

بعد زفاف الخبر السعيد بقدوم الكتعوم، جه عليا الدور عشان أزف إلى الغابة الحبيبة قدوم طاطا الأمورة إليها. طاطا هى أحدث مولود في الغابة. جاءت للغابة امبارح بعد يومين من العذاب وعدم الرغبة في الخروج مش عارفين ليه. نهنيء أم وأبو طاطا وتهنئة كبيرة جداً لظاظا.
ومن بابا وماما وجدو وستو وعمو وخالو وخالتو وعمتو وأولادهم كلهم زغروتة كبيييييييييييرة للمولودة السعيدة لولولولولولولوولولولوللللللللللللللللللييييييييييييييييييييييييييييييييييي.
وسوف تقام الأفراح والليالي الملاح لمدة 40 يوم، وتعلق الزينة، وتفرش الأرض بالورد البلدي، ويعطر الجو بالعطر الطيب.
والحاضر يبلغ الغايب.

الفرعون الموعود

2007-06-27T16:49:00.000+03:00

غزالة..نخلة هى واحدة

2007-06-19T16:53:00.000+03:00

عرفتها من شوية كتيييير..ماكناش بنتكلم خالص..ادخل المكتب ألاقيها بتكتب على لوحة المفاتيح ببراعة وهى وشها في الشاشة تك تك تك. اصبّح واقعد مكاني.
هى مش صاحبتي، هى زميلتي في الشغل..وزميلتنا التالتة في المكتب هى إللي كانت صاحبتي..عرفت بعد كده انها كانت بتستغلسني وتستتقل دمي (زي كل الناس). وفي يناير 2001 قررنا نسافر إلى الواحة التي أعشقها الفرافرة، كانت البطة هتيجي معايا، البطة هى الصديقة المشتركة بيني وبين الغزالة، وبالتالي الغزالة هتسافر معانا برضو.
وهناك في الفرافرة اكتشفنا بعض..أول م وصلنا، نلزنا من العربية ومرة واحدة قفزنا على بعض ومن ساعتها واحنا على طول مع بعض في كل حتة.
اشتغلنا مع بعض سنة ونص مثلا، كانت البطة والغزالة والنعامة ثلاثي لا يفترق، معروفين ثلاثي الألماني، ساعات بنكون غلسين عشان بنتلكم قدام الناس بالألماني، بس الموقف بيحكم علينا، هنعمل إيه؟
وسافرنا كتير أوي بعد كده، وعملنا حاجات كتير مش ممكن أحكيها هنا عشان هى أكبر من انها تتكتب في تدوينة، وكان لنا حوادث مع بعض منها الحادثة الشهيرة وواحدة تانية مش بنحب نفتكرها.
كان زحلوف والغزالة والنعامة مثلث غريب، ياااه ده عمر برضو يعني مش هاعرف اكتب حاجة عنه هنا. عدّى علينا ناس كتير، منهم موجودين ومنهم ركبناهم القطار وسابونا. عمري م تخيلت إني هوصلك المحطة وأركبك القطار.
هتوحشيني أوي أوي.
الفيلم ده مختصر كده عشانها.

حفلة غنائية

2007-06-18T13:30:00.000+03:00

عادة مش باعمل دعاية ع المكتوب بتاعي بس المرة ديه قلت أغير وكمان عشان أنا باحب إللي هيغني في الحفلة ديه؛ انه إيهاب عبده (الدرفيل الجميل)..ممكن مش كتير سمعوا عنه ولكنه صوته جميل وبيغني أغنية اسمها "لحظة رضا" هايلة جدا الحقيقة. كلماتها:

لحظة سكون لحظة صفا
لحظة سلام لحظة رضا

جوايّا دوشة
صراع مرير

لحظة سكون لحظة صفا
لحظة سلام لحظة رضا

لحظة سعادة ممكنة
جوايا جنة

أنا بحبها أوي ولحنها هايل، ممكن تسمعوها وتشفوها هناك، أول مرة سمعناها كنا في الكرم بين الجبال والشمس ساطعة والصحبة أحلى وأحلى كانت رأس سنة 2005، يااااه زحلوف والفراشة والدرفيل والقرد واللاما، والغزالة عملت لي مفاجأة وجت لنا تاني يوم..كانت حلوة جدا.

المهم إيهاب بقى حفلته الجاية يوم اللأثنين 2 يوليو 2007 في ساقية الصاوي الساعة الثامنة مساءً. أشوفكم هناك

المرتبة

2007-06-13T10:32:00.000+03:00

أحب مرتبة السرير تكون ناشفة..مليش أنا في الطري :-)

يا سلام كمان لو المرتبة قطن مش اسفنج..حلاوتها المرتبة القطن يا سلام عايزة أنام أنا.

وإيه بقى لو السرير لسه مفروش بملاية نظيفة ومشدود كده وساقع، والأوضة ضلمة كده وطراوة..خخخخخخخخخخخخخخ.

نمت خلاص.

مزيكا

2007-06-12T14:17:00.000+03:00

من زمان وأنا باحب الموسيقى جدا.
كان جد أمي مايسترو في الأوبرا..وكان جدي لأمي عازف كمان وبيانو بجانب كونه فنان (مش عارفة ممكن أصفه فنان تشكيلي ولا إيه)..بس مش عشان كده باحب المزيكا. ممكن المدرسة؟

نبتدي من المدرسة.
من سنة رابعة ابتدائي نبتدي ندرس موسيقى بجد..من أول كيفية فتح حامل النوتة إلى قراءة النوتة والعزف على الآلات المختلفة.
اخترت آلة الفلوت ماعرفش اسمها ايه بالعربي بيقولوا عليها بالانجليزي ريكوردر. المهم كنت باحبها أوي الآلة ديه (ومازلت أحبها)..واشتريت فلوت بتاعتي أنا وبعد شوية تطورت في العزف وأصبحت بارعة الحقيقة (مش غرور بس أنا فعلا كنت كويسة جدا) وتكوّن رباعي
الفلوت، وكنت باعزف على الفلوت السوبرانو..جربت برضو الباص بس كانت كبيرة أوي عليا ومحتاجة أصابع يد طويلة عشان تسد الخروم :-)..وفي سنة من السنين مش فاكرة سنة 1993 أو 1992...اشتركنا في مسابقة المدراس الألماني في دول حوض البحر الأبيض المتوسط..كنت خايفة جدا، أول مرة نعزف في مسابقة وكمان المقطوعات إللي كنا بنعزفها كانت صعبة جدا..فيها نوَت موسيقية بتتلعب بسرعة ورا بعض..كان بيجيلي تقلص في عضلات الكف من كتر السرعة وحركة نقل الأصابع السريعة..كسبنا وحصلنا على المركز الثالث..كنا طبعا عايزين الأول بس أصلنا عكينا شوية كده في عزف احدى مقطوعات موتزارت.
ساعتها بقى كنت باعزف على الفلوت الخشبي، وده له معاملة تانية غير البلاستيك..عشان لازم اسخنه الأول قبل العزف عشان الصوت يكون دافىء
وجميل؛ الأول افضل انفخ فيه شوية..هيتكون بخار، هيكوّن نقط ماء صغيرة..يشربها الخشب يسخن..شغلانة كده..أمّا البلاستيك..فيه مش بيفهموا ويفضلوا
ينفخوا فيه..طبعا مش هيشرب الريالة..فتلاقي الفلوت بتاعتهم وهما بيعزفوا بتنقط سائل كده (قرف أوي).

وفي نفس الوقت بقى اشتركت في فريق الكسليفون (برضو مش عارفة اسمه إيه باللغة العربية)، وكنت أعزف برضو على السوبرانو وكان معي في نفس الفريق اللولفين، الحقيقة هى إللي ابتدت الأول وبعدين أنا التحقت بالفريق بعدها.
فيه طبعا أنواع كتير من الكسليفون، .فيه منه المعدن ومنه الخشبي، المجموعة كان اسمها "انسمبل" طبعا مش عارفة حاجة عن اسمها بالعربي برضو، وكارل أورف هو إللي أسس "الأنسمبل". بس ديه قصة طويلة، في الآخر يعني
اتعلمت الكسليفون والفلوت وشوية بيانو ومن البيانو عزفت على الأورج.

المهم، كنا بندرس إيه بقى، نستمع إلى مقطوعات موسيقية ونحاول نعرف ما هى الآلات التي تعزف، وبالتالي عرفنا نميز أصوات الآلات المختلفة..وكمان برضو كنا
بندرس السيرة الذاتية للموسيقيين العالميين (بيتهوفن، موتزارت، باخ، شتراوس، هايدن، برامز، وغيرهم كتير).

وفي سنة من السنين كنا بندرس مقطوعة شهرزاد من تأليف ريمسكي كورساكوف، المطلوب منا ان نتخيل كل إللي بيحصل في القصة مع الموسيقى؛ يعني موسيقى السلطان الشرير وازاي بتعبر عن الشر، وبعدين تدخل
شهرزاد وتتحول الموسيقى إلى رقة وحنية وهكذا، وده برضو كان بيوسع الخيال عندنا، والله كانت أيام.

أحب كمان بوليرو من تأليف رافل مع إن فيه ناس بيقولوا عليها مملة، بس لو الواحد سمعها بتمعن كده هنكتشف حاجات كتير، وممكن برضو نتخيل الجمال وهى ماشية في الصحراء طابور كده، القافلة يعني.
مش بقول إني سميعة موسيقى كلاسيك بقى وكده بس فيه حاجات الواحد يحب يسمعها من حين لآخر.

وفي آخر سنة بقى في المدرسة أي ثانوية عامة، طبعا اخترت امتحن موسيقى، يااه على الامتحان العملي هاههاها، نعزف بالأصابع الصحيحة السلم الموسيقي على البيانو،
ونعزف على أي آلة، ونغني أغينة. المهم عزفت على ريكوردر وكنت باقرأ من النوتة، والمفتشة أو إللي بتمتحني قالت لي باستغراب: " انت بتقري نوتة بجد؟؟؟!!" وأخدت مني النوتة تتفرج عليها. وامتحان العملي برضو كان سهل، ونجحت
وخلصت، برافو عليا.

و تبقى عندي معلومات عن الموسيقى، ولسه باعزف على الفلوت بس مفيش عندي كسليفون عشان أعزف عليه.

يوم البيئة

2007-06-05T09:07:00.000+03:00

النهاردة يحتفل العالم بيوم البيئة.

والمفروض ان السنة ديه أول مرة كل محافظات مصر كمان بتحتفل..لما نشوف هيعملوا إيه بقى النهاردة..آخرهم استعراض لعربيات خضراء وعيال لابسين أخضر زرعي.
اقترحت الأمم المتحدة 77 طريقة للأحتفال بيوم البيئة العالمي، منها اقتراح لأصحاب المركبات عدم استخدامهم لها وركوب العجل بدلا منها (هأوووو)، واقتراح تاني لو مش هينفع قصة العجل ديه، يزرعوا 10 شجرات (هأووين).
أهو يوم وهيعدي زي بقية الأيام لا جديد.
هتلاقي النهاردة الكلام عن الأحتباس الحراري والتغير المناخي كتير (ماهو النهاردة هو يوم الكلام ده).

أقترح أحد أساتذة كلية الزراعة، جامعة الزقازيق اقتراح عجبني جدا، وهو لخفض درجة حرارة الجو في مصر 5 درجات مئوية (وديه حاجة حلوة جدا وياريت تحصل بالفعل) وهو ايه بقى الأقتراح!!
أن يتبرع كل مواطن بجنيه فقط لوزارة الزراعة، وتقوم الوزارة باستخدام هذه الأموال لزراعة 750 مليون شجرة كافور أو جزولين (إللي تمن الشجرة منهم 10 قروش يعني ولا حاجة) ويتم زراعة هذه الأشجار حول المدن الجديدة والمحافظات الصحراوية.
والله اقتراح هايل، بس نضمن منين ان الفلوس ديه فعلا هتستخدم لشراء الأشجار؟؟

وكل عام وأنتم بخير.

النشرة الجوية

2007-05-31T11:29:00.000+03:00

النهاردة يسود طقس ربيعي معتدل هايل جدا مع نسمات صيفية لطيفة حتى الأن..مش عارفين ع الساعة واحدة هيكون إيه النظام.
أمّا في المساء فمتوقع هبوب رياح غربية من فوق المرتفعات تلطف من حدة سواد الليل وبالتالي ينصح بالذهاب لركوب الفلوكة مع الأصدقاء.

موبايلات ... موبايلات

2007-05-15T16:24:00.000+03:00

ظهر التليفون المحمول من فترة مش فاكرة كام سنة بس من زمان يعني من وأنا في الجامعة أعتقد سنة أولى.

وطبعا في الأول الخط كان غالي ولم استطع ان أحصل على خط..وبعد فترة دخلت شركة جديدة في سوق الاتصالات وهى كليك. نزلت أسعار الخطوط إلى 800 جنيه أنا فاكرة كويس عشان اشتركت مع اللولفين في خط والنمرة كانت هايلة جدا..طبعا مش فاكراها.

وبعد شوية تحسنت حالتي المادية وحصلت على خط خاص بي لوحدي وكمان عدّة خاصة بي. واتسرق التليفون المحمول بالخط وتحولت كليك إلى فودافون ومعاها اشتريت تليفون جديد ونمرة جديدة.

حياتي كانت التليفون المحمول..على طول الخط مفتوح..على طول بيرن تررن تررن. مش بلاحق على المكالمات ولا على الكروت (لسه كرت مدفوع) وبعدين اكتشفت ان الكرت مش مفيد بالنسبة لحالتي..حوّلت فاتورة. وكانت الصدمات مع كل فاتورة (مازلت بأصدم الحقيقة). وعمري ما كنت باقفله، حتى وأنا نايمة..أو كنت باقفله ساعات يعني بس لو متوقعة إن فيه حد ممكن يكلمني يبقى لا لغلق التليفون، بس دلوقتي خلاص يغلق التليفون لو وقت النوم جه الحقيقة. وياسلام بقى لما كان الواحد يكون في خروجة والتليفون بتاعه يرن، مش مهم من المتصل ولكن فيه حد بيكلمني ع الموبايل (مهمة طول عمري). ولما ظهرت الرنات المجسمة أوعى بقى..كل واحد يمسك الموبايل ويفضل يسمع الأغاني والرنات دوشة للأبد.

وظهرت خدمة الرسائل المجانية. وديه كانت ابداع في حدّ ذاتها، ترسل الرسالة من غير ماتكلف نفسك مكالمة (مع انها نفس سعر المكالمة) بس هى كده، علشان ممكن تكتب في سطر واحد إللي ممكن تقوله في أكتر من 5 دقائق.

أول ما ظهرت خدمة الرسائل القصيرة، كان مسموح بارسال 100 رسالة مش فاكرة في اليوم ولا الأسبوع مجانا..كنت في رابعة جامعة على ما أظن أو سنة تالتة، وكنا طول المحاضرات نفضل نبعت لبعض رسائل لحد ما تخلص ال100 رسالة المجانية ونكلم الشركة في التليفون ونعمل أفلام عشان يفتحوا الخدمة تاني.

وراحت الأيام وعدت وجه اليوم إللى زهقت فيه من الموبايل ونفسي اتخلص منه بس مش عارفة..خلاص اصبح جزء من الأشياء التي أحملها معي، ولو نسيته ارجع ألاقي ييجي 50 مكالمة ورسالة والناس تقلب الدنيا انت فين إيه إللي حصل اتخضينا عليكِ. طب ماحنا قبل الموبايل كنا عايشين برضو يعني ونعرف نوصل لبعض..وبرضو بنخرج ونتقابل من غير ما لما نوصل نرن أو قبل ماننزل نرن..لما أقرب من بيتك أرنلك عشان تستعدي وتنزلي..والحاجات ديه إللي كلنا بنعملها. وكنا بنوصل في المعاد ونلاقي بعض بسهولة.

والغلاسة بقى لما واحد في الشغل يستغبى ويوزع نمر الموبايل بتاعة الموظفين على العملاء مثلا..يييه تلاقي مكالمات غريبة في مواعيد أغرب..طبعا أرد بسخافة وغلاسة على إللي بيكلموني في غير مواعيد العمل أخليهم يندموا انهم عرفوني في يوم أصلا :-)

امتى اخلص منه وارتاح؟؟

رأيت في المنام

2007-05-14T16:20:00.000+03:00

خير اللهم اجعله خير..ان فيه فرح في الغابة..الكوالا هتتجوز، ألف مبروك مع انها متجوزة بس هتتجوز تاني أو هيعملوا فرح تاني.

الفرح كان فين بقى، في كوكي بارك (فاكرين كوكي بارك يا ولاد؟) وبعدين كان مقسم فقرات كتير على الجنينة كلها، يعني فقرة في الجنينة وفقرة في المراجيح أما فقرة البوفيه فكانت في حتة في الجنينة وكان فيه ترابيزات طويلة جدا وعليها اطباق.

ذهبت للفرح لوحدي منتظرة الزحلف يظهر عشان هو اللي هروح معاه..وظهر بعد شوية (على بال متحرك من مكانه بقى) وشوية وطلعت لنا الكوالا لابسة ملاية السرير على دماغها وعملاها فيونكة كبيرة (قال يعني الطرحة).

تخيلوا الكوالا بالطرحة الملاية والفيونكة الكبيرة

حيوانات تاني ظهرت في الحفلة، واختفى الزحلف وبقيت لوحدي ماعرفش حد..اتمشيت في الجنينة ورحت المراجيح هاهها.

بس ده إللي أنا فكراه من الحلم.

ابريق الشاي

2007-05-08T14:55:00.001+03:00

إيه الحلاوة ديه.

إيه الجمال ده.

في منه خزف، وفي منه فخار وكمان ألمونيوم وممكن علبة بيروسول وإقلب.

يا حلاوته وهو ع البوتاجاز مليان ماء بيغلي.

يا حلاوته وهو ع الترابيزة مليان شاي بالنعناع.

تييجي النعامة تصب الشاي وتشربه بمزاج عالي، تعلى الدماغ ويتكتب أي كلام هنا.

أغنية ابريق الشاي إهداء مني لصاحب الأشجار.

شغل؟ يع!

2007-05-03T14:26:00.000+03:00

زهقت من الشغل جدا.
نفسي أصحى براحتي.
أنام براحتي.
أعمل أي حاجة في أي وقت.
أتنح في البيت أو في الشارع أو في أي حتة.
أمشي شعري منكوش.
مش عايزة أشتغل خلاص.

عايزة أنااااام.

أنا باحب الرنجة

2007-04-10T14:25:00.000+02:00

افتكرت حاجة قبل ماكتب التدوينة ديه؛ أغنية من تأليف عدوية شعبان عبد الرحيم على غرار أغنية العنب:

"فسخاني وباحب الرنجة
لا تقول لي لا موز ولا مانجة
بصراحة أنا عليه باغيير
بيسلك المناخير

هو إيه
البصل البصل البصل

أحمر أخضر
أحمر أخضر"

أرجع للتدوينة بتاعتي:

شم النسيم بالنسبة للقبيلة عندنا عيد نحتفل به، وله طقوسه طبعا زي كل عيد ما له طقوس. واحنا صغار لازم كنا نحط بصل أخضر تحت المخدة أو نعلقه على باب الأوضة ليلة شم النسيم عشان الشمامة(هى وحش بياكل الرجلين ليلة شم النسيم) متعرفش .تدخل الأوضة وتشم رجلينا
بس بطّلنا القصة ديه لما كبرنا، وكنا نشتري هدوم جديدة (برضو بطّلنا، غلب بقى)، وليلة شم النسيم بقى نلون البيض ونتباهى مين رسمه أحلى من التاني ونستنى الصبح عشان نتفرج ع البيض الملون وناكل الطعمية السخنة والخلطبيصة والترمس والفول وتتوج هذه المائدة الكبيرة الحاجة رنجة هانم كعب الغزال.
يا سلام ع الرنجة وجمال الرنجة..يا حلاوتها لما شويتها.
الله جعت أنا دلوقتي بقى..ننزل حتتك بتتك ع الرنجة والبصل الأخضر ونلعب لعبة البيض (نكسر البيض في رأس بعض). السنة ديه بقى أضافت عمتي ضيف للمائدة وهو الفطير..آآآه حدث انقلاب وهجوم زائد من القبيلة على المائدة بسبب الفطير الخطير.

وشوية ويهجم النعاس على أفراد القبيلة المتخمين بالمأكولات ولكن يلحقوهم بالشاي والذي منه، يفوقوا تاني ولا كأن حاجة حصلت ويفضل أفراد القبيلة يتكلموا ويحكوا الذكريات ويحكوا عن ناس انقرضوا في الأغلب من زمان.
وينتهي شم النسيم على خير.

ولاحظت أن يوم شم النسيم غالبا الجو بيكون هايل جدا..وديه حاجة ظريفة برضو..السنة ديه كان أحلى وأحلى شمس ساطعة ونسمة لطيفة فيها شعرة برودة كده تخبط في الواحد مع الرنجة والبصل تعمل عمايل.

نشوفكم السنة الجاية.

حرامية رجب

2007-04-04T10:19:00.000+02:00

المشهد الأول
الست نعامة تذهب لمحل النضارات لأستلام النضارة الجديدة بتاعتها وتلبسها وتحط القديمة في جراب الجديدة وتمشي.

المشهد التاني
الست نعامة عايزة تشتري شوية حاجات من البقال الكبير إللي اسمه اولاد رجب، معها الكيس إللي فيه النضارة، تسلمه للأمانات وتاخد رقم وتدخل البقال الكبير وتتبضع.

المشهد الثالث
خرجت الست نعامة بعد م اشترت كل إللي عايزاه. تذهب بالرقم للأمانات لأستلام كيس النضارة. وكانت المفاجأة أن أن أن تشششش.

النعامة: اتفضل الرقم.
العامل: الدرج فاضي حضرتك.
النعامة: يعني ايه فاضي فين الحاجات بتاعتي؟
العامل: ماعرفش بس الدرج رقم 7 فاضي. حضرتك متأكدة انك سبتي الكيس هنا؟
النعامة: يعني انا جبت رقم من بتنا عشان اتبلى عليكم هنا يعني ولا إيه؟
العامل: هو الكيس كان فيه ايه؟ أكيد حد أخده بالغلط وهيرجعه بكرة.
النعامة: وياخده بالغلط ليه؟ وازاي يستلم الكيس وهو مش معاه الرقم أصلا؟
العامل: اصل فيه زباين بتقول الرقم ضاع مني.

يدور نقاش حاد حول الأمانة وانهم مشغلين قرآن طول النهار والليل وآيات قرآنية قبل الدخول والبضاعة المباعة لا ترد ولاتستبدل إلا بالوصل وحاجات من ديه . وبعدبن يتكلموا عن شخص مجهول سرق حاجة.

النعامة: هل هو الشخص إللي سرق الكيس بتاعي؟
العامل: لأ ده واحد تاني؛ أصل حضرتك هنا بيحصل حاجة؛ العمّال بيخبّوا مسروقات في أكياس ويخرجوا بها على انها بتاعة زباين، ودلوقتي حضرتك هتشوفي كمين لواحد من العمال.
النعامة: يا حلولي وبتقول لي الكلام ده دلوقتي وانا حاجاتي مسروقة..يعني انتم بتشغلوا عندكم حرامية بقى.
عامل آخر: بس حضرتك المفروض كنت تاخدي بالك من أخد منك الكيس.
النعامة: يا سلام، لأ طبعا. انا مش ملزمة إني أبحلق في الناس، أنا اديته الكيس وهو اداني رقم أعرف منين انه حرامي؟ ومن تاني اصلا بيقف هنا غيرك؟
العامل: ماحدش والله!!!
المدير يتدخل: هدّي نفسك حضرتك، حقك هيوصلك لحد عندك.

المشهد الرابع:
كمين للعامل الحرامي إللي سرق ملابس داخلية وخارج بها. والست نعامة واقفة تتفرج ومحروق دمها والضغط عليّ عندها وصدعت وتعبت من الخناق.

المشهد الخامس والأخير:
المدير: حضرتك ممكن تنتظري لحد بكرة وبعدين لو مفيش حاجة رجعت هندفع لحضرتك الفلوس.
النعامة: أنا عايزة أعمل محضر، كده حقي هيضيع.
المدير: بلاش يا هانم محضر، انا هحلهالك ان شاء الله بكرة.

النعامة واقفة جنب الأمانات وتحذر الناس من ترك أشيائهم. واحد عايز يسيب كيس عيش، النعامة تقوله: ليه حضرتك تسيبه؟ خده معك أضمن من هنا..وهكذا وهكذا.

الست نعامة تاخد مشترياتها وتقف تسأل العاملين، يا ترى من الجاني، عامل الأمانات، ولاّ زبون محترف ولاّ النعامة نفسها؟

الجاني هو....

إذا عرفتم الحل اتصلوا ب 747120 إذاعة.

تحديث

حتى هذه اللحظة مازال الجاني حر طليق يتمتع بالنظارات بتاعة النعام ويشوف كويس وغيره يا حرام حولان.

كتاكيتي

2007-04-03T14:29:00.000+02:00

لاحظت ان كتاكيتي بتتركني شوية بشوية وهفضل أنا هنا لوحدي :-(

من شهرين طار طائر الرَخ الأسطوري إلى غابة اسكندنافية..وبعده هرب الراكون إلى حتة بعيدة برضو كده. وشوية والغزالة هتجري بعيييد..وكمان النمر يوسف برضو بدأ يتحول إلى حيوان غريب مشفتوش قبل كده.
ليه يا كتاكيتي بتجروا بعيد عني؟ خليكوا في الغابة الأليفة.

يا ترى ايه تاني هيحصل!!

لحظات تقرف

2007-03-21T15:00:00.000+02:00

إذ بي أفوجأ بمسلسل غريب كده على تليفزيون دبي اسمه لحظات حرجة. ايه حكايته ده..نسخة مصرية من المسلسل الأمريكي غرفة الطوارىء (ER)
طبعا متخيلين بقى النسخة المصري عاملة ازاي..وبعدين سؤال؛ هل احنا في مصر عندنا اصلا غرفة طوارىء؟ م هو الاستقبال في المستشفيات هو الطوارىء الحقيقة (ده إللي انا أعرفه ممكن أكون مخطئة). ولكن حسب تجربتي مع المستشفيات وبما إن النعام الكبير عندنا كلهم أطباء وبيشتغلوا في مستشفيات، محدش أبدا حكى عن غرفة الطوارىء ديه.
إللي يغيظ بقى انهم نسخوا المسلسل الأمريكي ومثلوه بالعربي..يااه على الفقع، وطريقة الكلام..تمثيل فعلا، وبعدين من امتى الممرضات عندنا بالنظافة ديه والاهتمام والرعاية ده كله؟ ده انا الممرضة كانت هتموتني وبعد الفقس.
وبعدين في المسلسل الأمريكي الواحد بيحس انهم فعلا دكاترة وبيفهموا ولكن في لحظات القرف ديه ابدا خالص كافيش معلومة حتى..ناس حافظة وبتسمع.
اتفرجوا واحكولي بقى.

مكان اسمه الوطن

2007-03-21T14:35:00.000+02:00

من فترة وانا متابعة قناة أوه (مش عارفة اكتبها ازاي) بيزيعوا كده مساء كل سبت فيلم تسجيلي.
من حظي اتفرجت على فيلمين من اخراج تامر عزت (هل هو أخو عمرو عزت؟ اصله يشبهه تمام). امبارح بقى كان فيلم من انتاج اليونيسكو واسمه "مكان اسمه الوطن". وتتميز أفلام تامر عزت بالكآبة غير طبيعي الحقيقة. أول فيلم شاهدته كان عن أحوال المصريين المقيمين في أمريكا بعد أحداث 11 سبتمبر.
أما هذا الفيلم بيصور معنى الوطن بالنسبة ل4 أشخاص: همس (المصرية العائدة بعد فترة طويلة من الخارج وبتتكلم عربي مكسر، ولكن معجبة بحياتها الجديدة في مصر)، ميريام (الفتاة المسيحية إللي كانت بتحب محمد المسلم ولما اتكشفت قصة الحب قررت الهروب)، محمد (البالغ من العمر 32 وبيكسب 2500 جنيه في الشهر ومش عارف يحوّش عشان يتجوز، ونفسه يغني بس المنتجين مش بيعجبهم أغانيه وبيساعد والده في مصنع الجبن بس عايز يسافر عشان مافيش فايدة هنا) وأخيرا معتز(إللي ابوه توفى ترك له أخوه الصغير وامه عشان يرعاهم وهو خاطب ونفسه يلاقي شقة صغيرة يعيش فيها، بس مش عايز يسافر).
بيجيب كل شخص على حده وحياته ازاي ماشية..والناس حول كل شخص. وفي الآخر تقرر ميريام الهجرة إلى كندا ومحمد يقدم ورق هجرة إلى استراليا بس لسه لم يقرر مصيره ايه..همس تتزوج من حبيبها الاجنبي بعد اشهار اسلامه لأقتناعه بالدين الاسلامي..يكت معتز كتباه على سلمى وينتظر الشقة.

بتعجبني افلام تامر عزت هى بتتناول الواقع بكآبة شوية بس لطيفة. مش عارفة أنا مين تامر عزت ده بس أفكاره عجباني الحقيقة..استمر يا تامر:-)

ورجعلي الريش

2007-03-08T15:26:00.000+02:00

ممكن مش كل الغابة كانت ملاحظة -وديه حاجة لطيفة جدا- إن ريشي وقع مني :-(
بس ده مش بسبب القرد إللي كان عايز ينتفه ويعمل منه مخدة (مش هاتقدر يا ملعون تنول مرادك)؛ ولكن بسبب فِرة كده يا ولاد حطت على النعام الجميل وماحدش كان عامل حسابه لليوم ده.
المهم، أحب أفكركم بشكل النعامة المجنونة. ممكن تغيروا الزي الأحمر ونخليه ملون، كل حسب رغبته.
والسلام عليكم ورحمة الله وبركاته
نعناعة

لقطات تلغرافية

2007-03-07T15:20:00.000+02:00

بما إن الأحداث كتير ومش عارفة أكتب عن ايه ولا ايه، وبناءً على نصيحة بندق أفندي هاكتب لقطات تلغرافية كده:
تلغراف 1:

حمدالله على سلامة وصول السنجعام إلى الغابة الأليفة. ويجب شكر الدوك راء لزفه للخبر.

تلغراف 2:

قال إيه هايزودوا أرقام التليفون رقم عشان الفويس أوفر أي بي!!!! حقيقي ده ولا إيه؟ وعلى رأي أحد الحيوانات الغلابة "يشيلوا رقم يزودوا رقم مافيش فايدة"

تلغراف 3:

انقطاع الماء لمدة 3 أيام في المعادي مما سبب طفح البالوعات (قصة طوييييلة أوي)

تلغراف 4:

بعد اختطاف الثور الأحمر الناري للغزالة تم زفافهم وعاشوا في تبات ونبات

مش فاكرة حاجة تاني الحقيقة من كتر الأخبار..لما أفتكر بقى هاكتبهم بالتفاصيل.

ضحكة ع الماشي

2006-10-02T13:34:00.000+02:00

ممارسة اليوجا مهمة جدا وخصوصا في وقتنا الحالي.

ده بقى تدريب جديد جربوه وهاتشوفوا الفرق.

انتظروا المزيد.

الكفار

2006-09-25T09:00:00.000+02:00

المسئولين في الاذاعة والتليفزيون عرفوا منين ان الكفار كان شكلهم زي ما بيظهروا كده في الأفلام والمسلسلات الدينية؟
شعرهم طويل وذقنهم طويلة وملابسهم ألوانها غريبة ولابسين سلاسل ذهبية وفضية وخواتم وممكن كمان حلقان، وحواجبهم غليظة كده وساعات لازقة في بعض وشكلهم مش مستحمي!!! عرفوا منين كل ده؟ هل هناك رسومات أو زخارف أو أي حاجة تدل على شكلهم ده؟ وبعدين لمّا يدخلوا في دين محمد وهو الدين الاسلامي بقى يلبسوا أبيض في أبيض وشعرهم يتسرح ويبقى شكلهم نضيف (مش قصدي أي اساءة للدين الأسلامي انا بس باتسال).

كل مسلسل ديني وانتم طيبين

ذات الرداء الأحمر

2006-08-28T17:02:00.000+03:00

طول عمري أعرف ان القصة اسمها "ذات الرداء الأحمر"، وبتحكي عن بنت صغيرة أكل الذئب جدتها ونام في سريرها عشان ياكل ذات الرداء الأحمر وللقصة بقية مش هاحكيها دلوقتي.

المهم إذ بي اكتشف ان القصة معروفة عند الناس باسم تاني وهو "ليلى والذئب" !!!اشمعنى ليلى يعني؟؟ مين ليلى ديه؟

ماعلينا، وصلتني رسالة على التليفون المحمول عن ليلى والذئب دول بتقول ايه بقى:

"رأت ليلى الذئب في الغابة وراء شجرة. قالت له: انت الذئب؟ قال: نعم. ثم رأته خلف ضخرة، فقالت له: انت الذئب؟ قال لها بانزعاج: نعم. ثم رأته في مغارة بعيدة، فصرخ وقال: ايوة، أنا الزفت، هو الواحد مايعرفش يعمل تواليت في أم الغابة دي!!!"

طبعا هى المفروض نكتة، بس ليه يا ليلى كده تزعلي الذئب منك وتخليه يطفش من الغابة؟ لأ زعلت منك قوي بقى.

الأردن - عمّان

2006-08-22T12:10:00.000+03:00

الطفو في البحر الميت 26 أبريل 2005

في عمّان قابلت العصفورة تاني وذهبنا للطفو فوق مياه البحر الميت..احساس غريب أول مانوصل هناك ونشوف البحر الميت. كأنه بحيرة كبيرة، مافيش امواج مافيش اي حاجة غير مياه راكدة ورملة وشماسي ومحلات على الشاطىء لبيع منتجات البحر الميت. الشاطىء ربعه أو أقل طين والباقي رملة عادية.
وصلنا وكان فيه مجموعة من السياح يطفون في البحر وبيضحكوا مافهمتش بيضحكوا على ايه..بس جالي احساس بالرهبة كده من البحر الميت ده مش عارفة ليه!! وكنت خايفة انزل أصلا. بس تحدثت مع اتنين من السياح قالولي لازم تجربي. وعنها رحت نازلة البحر...هاهاهاهاهاهاا كوميديا غير طبيعية. اول ماترفع رجلك عن المياه هوبّا تتحول إلى فلة تطفو هاهاهاهاه مش ممكن ولو شاطرين اغطسوا في الماء..فيه مقاومة فظيعة مش ممكن حاولت اغطّس كتفي عشان اغسله من حمام الطين مافيش فايدة..احرّك رجلي هوبّا اتقلب على وشي أو على ظهري..كان لطيف جدا.

بالليل بقى قابلت اصدقاء الفراشة الظرفاء وذهبنا إلى مادبا أو مأدبة مش عارفة..اتعشينا هناك وبعد كده عدينا على جبل نيبو اللي فيه مدفون النبي موسى حسب الديانة اليهودية والمسيحية. ولكن الوقت كان تأخر والكنيسة كانت قفلت اتفرجت عليها من برة وشوفت العصاة الكبيرة الطويلة المصنوعة من النحاس على شكل أفعى.
وكمان رحنا منطقة فحيص، وهناك نشوف من على بعد أطول علم في العالم، دخل موسوعة جينيس للأرقام القياسية.

البتراء - وادي رمّ الخميس 27 أبريل 2006

لم يتبقى لي سوى يومين وأعود لمصر المحروسة..اروح البتراء بقى. سمعت عنها كتير وقالولي إللي راح الأردن ومازرش البتراء يبقى ماعملش حاجة. ركبت من الصبح بدري عشان المشوار طويل ووصلت أخيرا منطقة البتراء بس لسه في تمشية حلوة لحد ما أوصل للبوابة واقطع تذكرة. عند شباك التذاكر..لو كنت طالبة التذكرة ب10 دينار لو معايا اقامة التذكرة بدينار واحد، وبما إني مصرية ومش بادرس حاليا أي حاجة هادفع تذكرة كاملة ب21 دينار!!! مش مهم مش بازعل على الحاجات الصغيرة ديه.
ودخلت، وابتديت أمشي في السيق.

ومرة واحدة تظهر الخزانة

وهو ده أحلى مشهد، من داخل السيق الضيق الملتوي تنفتح الدنيا على الخزانة. بس غير كده لم انبهر الحقيقة..كله آثار ومقابر للجنود النبطيين زي إللي عندنا تمام.
بعد الخزانة نروح على المحكمة وهى عالية شوية ومحتاجة تسلق للجبل..مش مشكلة نتسلق وماله.

منظر الجبال واختلاف الوان الرمال ده برضو كان جديد عليا..غير مناظر الجبال إللى عندنا في سيناء.

قضيت 4 ساعات في البتراء، وكان يجب الرحيل لمقابلة الفراشة والكتكوت في
وادي رمّ. المسافة بين البتراء ووادي رمّ مش طويلة بس متعبة شوية..وصلت مكان المبيت، وهو عبارة عن بيت شعر كبير، مطبخ، دورة مياه ومساحة متوسطة لاشعال النار والجلوس وممكن كمان المبيت فيها لمشاهدة النجوم. المكان جميل وشكل الجبال هايل جدا والنجوم كانت باينة طبعا. قضينا أمسية رائعة في الخلاء وصحينا الصبح عشان نكمل استكشاف وادي رمّ. ذهبنا إلى جبل الخزعلي وجبل أم عشرين (اسمه كده عشان فيه عشرين بنت انتحرت من فوقه أو في مقولة تاني واحدة ست قتلت عشرين راجل فوقه).

وقررنا بعد كده الذهاب للعقبة. وهناك نشوف حدود مصر المحروسة وإسرائيل وفلسطين.
لم أعجب بالعقبة خالص..هى مشروع لإنشاء مدينة زي شرم الشيخ بس لسه بدري شوية محتاجة مجهود أكتر.

وجاء موعد الرحيل إلى مصر المحروسة..وعدت بسلام إلى أرض الوطن.
وألف حمدلله ع السلامة.

دمشق - حِمص

2006-07-16T14:53:00.000+03:00

سوريا - حِمص الأثنين 24 أبريل 2006

وصلت دمشق من حلب بعد منتصف الليل..كانت الساعة واحدة ونص تقريبا..مش عارفة ليه طريق العودة استغرق وقت أطول من الذهاب..المهم نزلت من الباص في موقف غلط..المفروض شادي هاينتظرني (تعب معي قوي الحقيقة)، أدور عليه مش موجود والدنيا برد مش عارفة أعمل ايه..كلمته في التليفون المهم اتقابلنا اخيرا.
كان معاه صديقه فهد أبو قويق (طبيب).
حمدالله على السلامة. هاتعملي بكرة ايه بقى؟
أنا: عايزة أروح حِمص. ماتييجي معايا يا شادي.
شادي: معلش المرة ديه انا مش فاضي.
أنا: طيب ايه رأيك يا فهد؟ (أول مرة أشوف فهد يعني)
فهد: والله ممكن بس الساعة كام؟
أنا: الطريق ساعتين من دمشق، نتحرك على 10 الصبح كده ونوصل هناك الساعة 12، كده حلو قوي. يبقى عدّي عليا الصبح نركب الباص ونروح على حِمص، وأنا معايا الخريطة.

قابلت فهدالساعة 10 الصبح..الدنيا كانت بتمطر جامد جدا وأنا مش عاملة حسابي ان الجو هايكون برد، ومش معايا غير جاكيت قطن كده فضلت لابساه على طول.
ركبنا الباص..الطريق لطيف بس المطر شكله كده مطوّل معانا.
وصلنا حِمص..بلد صغير مافيهاش حاجة وأحسن مانضيّعش فيها وقت أحنا لسه هانروح قلعة الحِصن (هو ده الهدف أصلا)، ركبنا مايكروباص..الطريق من حِمص إلى قلعة الحِصن ساعة أو زيادة شوية.
أخيرا وصلنا القلعة، نتفق مع السائق يعدّي علينا وهو راجع تاني المدينة، هايعدي الساعة 5 عصرا.
المطر مازال مستمر وسحاب كثيف، بس مش هايؤثر على استمتاعنا باليوم.

القلعة كبيرة جدا...هاتاخد وقت طويل على فكرة بس هانخلصها كلها..ناخدة لفّة حول السور وبعدين ندخل.

مش هاعرف أوصف الجمال من فوق القلعة..مناظر طبيعية هايلة جدا..والمطر والسحاب والأخضر. ومش هاعرف أحط كل الصور عشان أشرح. استغرقنا ساعتين أو ثلاثة عشان نخلص السور بس!!!

طب كفاية كده على السور ندخل جوة شوية. القلعة من الداخل مثل بقية القلاع يعني..غرف كثيرة وأماكن للرماة وشبابيك مختلفة. وكان فيه اسطبل وكمان وجدنا جامع.

على سطح القلعة، يوجد مطعم سياحي، للأستمتاع بالأكل الشامي الجميل والمنظر الروعة.
المهم خلاص بقى كده الدنيا برد قوي وموعد المايكروباص كمان يالا ننزل.
في طريق العودة السائق سلك طريق آخر غير طريق الذهاب...وتوقف بنا كي نستمتع بالمنظر الطبيعي.

ووصلنا دمشق، المطر جامد جدا، مش عارفة هاسافر بكرة ازاي. واقترح علي شادي أن اجرب الكنافة بالجبنة..بلاش يابني أنا مش باحب الحاجات الغريبة، وبعدين ازاي كنافة بالجبنة؟ بس جربي كده. المفروض أجرب قطعة صغيرة. ولكن الأحجام عندهم عملاقة، وياللعجب أكلت القطعةالكبيرة جدا لوحدي!!!
وكان ده آخر يوم لي في سوريا الجميلة وسوف أعود غدا إلى عمان، لأبدأ رحلة ثانية مع بلد تاني.
يتبع

إلى معلمي

2006-07-15T16:10:00.000+03:00

كنت استكمل قراءة كتاب قرأت الجزء الأول منه معك منذ فترة طويلة..وتذكرت يوم أن بدأت قراءته معك. كأني أول مرة أقرأ.
كلام غريب علي؛ معاني ومفردات أغرب. وكنت أسألك عن معاني كثيرة.

ياااه حدث هذا من 5 سنوات أو اقل قليلا.

تعلمت منك الكثير في مجالات مختلفة ومازلت اتعلم الكثير، ومع ذلك تنكر أنك معلمي.

أردت أن ابعث إليك بهذا الشكر في ذكرى مولدك ولكن...

شكرا.

عودة أبو قردان لدنيا الغربان

2006-07-13T15:55:00.000+03:00

عاد أبو قردان تاني لحياته الطبيعية، وبدأ يشتغل شغلانة روتينية. وبما إن الصيف (الأمور) دخل فالشغل قليل. يروح الشغل يلاقي بقية الغربان طاروا على عششهم.
طيب يعمل ايه في وقت الفراغ، يذهب لمقهى في منطقة راقية ويقضي فيه وقت ويتحادث مع عملاء آخرين في بلاد بعيدة بيقلب رزقه معاهم (على رأيه). المهم كان متنرفز ومستَفَز وأنا باكلمه. وحكى لي عن قصته مع المانجة:

النعامة: مالك يا أبا قردان؟
ابو قردان: هم بيعلموهم السماجة ولا بيختاروهم كده؟
النعامة: هم مين؟
ابو قردان: هنا في القهوة.ابتسامة صفراء غلسة وتخلف حضاري؛ قال إيه... عايز يحط لي كريمة على المانجة.
كاتك نييلة.
عايز حد يردحله ويعرفه مقامه.
بيضحك على الكتاكيت اللي في القهوة إكمنهم محدثين.
لا والنبي واحد جوافة بالكاري.
طبقة تخنق؛ مُدعو الـ"كلاس"، والكلاس منهم براء، منتشرين في كل مكان
يخلقون العادات الجديدة الغريبة المتخلفة.
جاي بابتسامته الرخمة يقول لي: إيه أخبار المانجة؟
قلت له : حادقة!
قال لي: دي طبيعيّة.
ماهو باين.
قال لي: خلاص المانجة؟ ومسك الكباية عايز ياخدها مني. وكمان جايبلي شفاطة مع المانجة القطع!!! قتلني خلاص.
ايه يا ست نعامة إللي بيحصل هنا، الغربان لبست شورت وكشفت بطنها!
بس لسه غربان، ماهو أصل الغراب غراب ولو لبس شبشب أو قبقاب.
وكمان بيلبسوا المدعو "فليب فلوب". أنا مش فاهم ازاي بيعرضوا صوابع رجليهم للتراب والماء.

أنا ممكن أموت لو أصيبت أصابع قدميّ بالتراب أو المياه. ممكن يعذبوني في السجن بوضع أصابعي في شبشب بصباع!! تتجمع فيه الأتربة والعرق. مع إني صوابعي قبيحة لكنني أحافظ عليها من الشباشب.
للحديث بقية طويلة.مش مهم دلوقتي.

بس معي رسالة لزحلوف من أبو قردان بيقول له أنه منتظره.

إللي نطلع به من هذه القصة الطويلة..أن الغراب مهما عمل فهو برضو غراب وبلاش تزوروا دنيا الغربان كتير عشان المانجة هناك حادقة. ونخلّي بالنا لو هانلبس شبشب بصباع ماندسش في التراب عشان صوابعنا تفضل نظيفة.

سلاماتي.

فرقع لوز

2006-07-03T21:12:00.000+03:00

الصيف دخل يا جماله ويا حلاوته، أحلى الأيام.
وخرجت الحيوانات من الجحور وانطلقت في الغابة..بس فيه حاجة عكننت عليهم فرحتهم بالصيف ومش عارفين يتخلصوا منها ازاي.
قاعدين الحيوانات مع بعض يتسامروا في ليالي الصيف العظيمة ونازلين نميمة ورغيّ وشغلانة ومشاريب سخنة ومشاريب ساقعة. ومرة واحدة سمعوا صوت غريب على الغابة، صوت مش معروف.مين يا ترى وايه الصوت ده!!
أتاريه فرقع لوز..أن أن أن تشششش.
فرقع لوز بيقفز على كل حيوانات الغابة ومش عاتك حدّ..مرة على الأسد ومرة على الفيل، الفيل أعصابه ما تستحملش القفز ولعب العيال ده كان هايدوسه أو ينفخ فيه بالزلومة. وفرقع لوز نازل قفز حوالين الحيوانات وقارفهم في عيشتهم وانا منهم طبعا، حاجة تخنق.
نتخلص منه ازاي ده؟ آه ساعات نتفرج عليه ودمه يكون خفيف بس كفاية كده بقى تعبنا من القفز ده. طلع لنا منين ده.
الرحمة.

دمشق - حلب

2006-07-02T14:38:00.000+03:00

سوريا-حلب الأحد 23 أبريل 2006

سهرنا على جبل قاسيون لحد متأخر أوي وأنا كنت تعبانة من السفر (صاحية من الساعة 6 الصبح) ومانمتش خالص وطول النهار برم في المدينة..تعبت.
روحت مع سارا ونمت زي الفسيخة.
يدق المنبه عشان استيقظ لأسافر إلى حلب الشهباء. قابلت شادي ووصلني إلى موقف البرامكة (تاني)
عشان أركب الباص إلى حلب. تدخل الموقف بقى تجد اعداد كثيرة من الباصات إللي بتروح جميع أنحاء سوريا. مش هاتعب أركب أي واحد وخلاص.
اخترت شركة كان شكل الباص تبعها لطيف وركبت.
جلست في مقعد جنب رجل..السواق جاء إلي وقال لي حضرتك متأكدة ان ده الكرسي بتاعك؟ قلت له أيوة. قال لي ممكن أشوف التذكرة؟ اتفضل. طلع طبعا مش مكاني. وبعدين السواق مال علي وقال لي: احنا مش بنقعد صبايا جنب شباب.
الطريق من دمشق إلى حلب طويييل أطول من رحلة عمان-دمشق. ورمت في الأوتوبيس. بيوزعوا مع التذكرة كوب بلاستيك ويملأه السواق بالماء وبونبونة عشان نسلي نفسنا في السكة الطويلة. نمت وصحيت كذا مرة وابتديت اجوع بقى مش قادرة.

أخيرا وصلنا حلب، انزل فين بقى؟ مش مهم انزل مطرح ما هايقف الباص واكلم حسّان يجيلي.
مافيش حس ولا خبر وهاموت من الجوع وحسّان لم يظهر بعد. واخيرا طل علي حسن الوجه حسّان :-)
مرحبا أهلا فيكي، حمد لله على السلامة :-)
حسّان انا جعاااااانة. طيب نروح نفطر عند قلعة حلب وبعدين نلف المدينة.
وياسلام على الأفطار الجميل والقعدة الأجمل (مطعم مفتوح تحت سفح القلعة)والحديث الطويل الذي لا ينتهي ابدا.

حسّان طبيب طوارىء في حلب وبيحضر الماجيستير (أعتقد هذا) ويخطط للسفر لبلاد الفرنجة عشان يشتغل هناك. فضلنا كتير نتبادل اطراف الحديث واخدنا بالنا ان الوقت جري بسرعة. طيب نروح على القلعة..كان يوم أجازة عيد بس مش فاكرة ايه (حد النور أعتقد) وكل ناس أجازة والدنيا زحمة بس برضو جميلة.

دمشق زي القاهرة كده في زحمتها وخنقتها..أمّا حلب فهى مثل الأسكندرية؛ الجو جميل ونظيف وتعطي انطباع ان البحر موجود في مكان ما (مع إن مافيش بحر هناك اصلا)، وفيه شارع طويل يطلقون عليه الكورنيش (زي كورنيش المقطم كده) كل الشباب والصبايا بيتقابلوا هناك ويخرجوا.
لون مدينة حلب أبيض (باتخيلها كده) أمّا دمشق لونها أصفر.

خلصنا القلعة..وطلعنا على سوق المدينة، هو سوق كبير زي سوق الحامدية (الأسواق هناك مسقفة) يختلف عنه انه فيه خان لكل بضاعة؛ يعني خان الأحذية، خان الجلود، خان اللحوم، خان الملابس ...إلخ، المهم خلصنا السوق ودخلنا على المدينةالقديمة، وكان من حظي ان السنة ديه بيحتفلوا بحلب عاصمة الثقافة الاسلامية أو حاجة كده مش فاكرة دلوقتي أوي.
حسّان قال لي انهم نضفوا المدينة وجملوها عشان المهرجان وكمان أعملا الترميم على ودنه..زرنا المسجد الأموي الكبير، ومشروع إحياء مدينة حلب القديمة والمعرض الدائم في مبنى مدرسة الشيباني (تم تنظيمه بين مديرية المدينة القديمة والوكالة الالمانية للتعاون الفني)..واتمشينا في المدينة القديمة، تمنيت لو اني أعيش هناك (حلم طبعا).
قابلنا مازن صديق حسّان، وذهبنا في جولة اخرى لحلب القديمة ودخلنا حمام يلبُغا بس للأسف عشان موعد الباص بتاعي مانفعش ادخل آخد حمام منعش :-(

وذهبنا لمقهي قديم، وأخذنا صاحب المقهى في جولة للقبو. اول دور تحت الأرض كان للتصنيع، تاني دور للتخزين، ونحس بفرق درجات الحرارة، تحت الدور تاني ابرد كتيير. وكمان اكتشفوا سرداب يوصل إلى القلعة ذات نفسها، كانوا بيستخدموه في الهرب. وقال لنا صاحب المقهى إن الدور الأول هايعملوه مطعم ايطالي (طبعا مش هاكون موجودة لما يفتح).
وبما إني في سوريا وجب الترويج لمصر وصحراء مصر، كلمتهم عن صحارى سفاري وعن الجولات والأنشطة. وهما كمان حكوا لي عن مجموعتهم إللي اسمها "الأرض" بيعملوا جولات في سوريا ويعسكروا في مناطق مختلفة واتفقنا على تبادل مجموعات بين الأرض وصحارى سفاري.

وجاء موعد العودة إلى دمشق :-( مش عايزة امشي، بس لازم ارجع. وتركت حسّان ومازن ووعدته بلقاء قريب في القاهرة أو حلب مرة أخرى.

يتبع

القاهرة - عمان - سوريا

2006-06-27T16:31:00.000+03:00

كتبت هذا الجزء من شهر ونص ومكسلة أكمل..ده أول جزء من الرحلة والبقية تأتي.

كنت وصديقتي العصفورة نحتسي الشوكولاتة الساخنة في المعادي، وكانت تحكي لي عن أختها التي تعيش في الأردن.
كمان الفراشة تعيش في الأردن، إيه ده!!! طيب يالا نسافر مع بعض، انت تروحي لأختك وأنا أروح للفراشة.

وحددنا ميعاد السفر.

وكلمت الفراشة عشان أظبّط معاها..بس هى هاتكون في الهند ام العجايب خلال أول 3 ايام من رحلتي، مش مهم هاتسيبلي المفتاح مع زميلتها في الشقة.
غيّرت الخطة، أصل عمان أرتاح وأطلع على سوريا أقضي كام يوم وأرجع اتفسح مع العصفورة والفراشة في عمان.
وصلنا يوم الخميس (20 أبريل)العصر، الجو كان حرّ، زي القاهرة بالظبط. في الطريق لمنزل أخت العصفورة اخدت فكرة سريعة عن عمان؛ بلد هادي، عدد السكان قليل، جبلية، اللون الأخضر موجود بكثرة وينتشر بها الحدائق وكمان الغابات.
مش بطّال ممكن نقضي فيها كام يوم حلوين.

عمان الجمعة 21 ابريل 2006

طبيعة أهل البلد غريبة، بعض منهم ظريف ومتفائل والبعض الآخر دمه ثقيل كده شوية ومش بافهم بيهزروا ولا بيتكلموا جد. يُقام في عمان كل يوم جمعة من الساعة السابعة صباحا حتى المغرب سوق الجمعة، قلت طيب فرصة نتفرج على وسط البلد وكمان بالمرة اشوف سوق الجمعة ده عامل ازاي. وانا نازلة من التاكسي حصلت لي حادثة بسيطة، باب التاكسي قفل على صباعي، السائق اتخض مش عارفة ليه وقالي نروح على المستشفى، يا سيدي مالوش لزوم، ابدا، طيب يالا على المستشفى. قسم الطوارىء الاسعافات الاولية، وانا مش واخدة بالي هو فيه ايه ده صباع عادي، أشعة وأدوية وحاجات غريبة، المهم ربطولي الصباع ومشيت مع السواق إللي فضل طول الطريق للمنزل يلعن الحظ إللي ركبني معاه وليه عرض علي أنزل اتفرج على سوق الجمعة (صباعي ده عمل شغل بعد كده جامد جدا). غريب جداالسواق. ساعتها قررت أذهب إلى سوريا على طول. اتصلت بعمرو فحّام (أحد المدونين السوريين) عشان ينتظرني في الموقف في الشام(دمشق)؛ ويصطحبني خلال اقامتي هناك.

سوريا -دمشق السبت 22 ابريل 2006

وصلت موقف العبدلي بعمان عشان اركب مواصلة إلى الشام. ركبت تاكسي تكلفته 8 دينار أردني والطريق يستغرق 3 ساعات بالوقوف على الحدود والجوازات والشغلانة ديه. حزروني من معاملة الظباط الجافة على الحدود الأردنية وخصوصا إني بنت ومسافرة لوحدي، ولكن العكس تماما ما حدث. السائق ساعدني في تخليص اوراقي وكمان صباعي المربوط ده بقى كان له تأثير هايل ودفتر التوفير المصري (جواز السفر) ياااه برضو كان له تأثير.

لم نستغرق وقت طويل على الحدود الأردنية. ودخلنا الحدود السورية. المعاملة أحسن وأحسن. انت مصرية؟ (باللهجة الشامي طبعا) أهلا فيكي. وابتسامة عريضة ترسم على وجه الضابط. ايش؟ ماله صباعك؟ وابتدي احكي الحكاية. برضو لم نستغرق وقت على الحدود السورية. وصلنا بالسلامة لموقف البرامكة. اتصلت ب
عمرو فحّام (ماعرفش شكله ايه اصلا، انا عرفته عن طريق صديقي أ.غ.) المهم لقينا بعض في الآخر. حضر عمرو (طالب في السنة النهائية في كلية هندسة) وصديقه علاء (محاسب في شركة انبي المصرية في الشام).
وبدأت الجولة. زرنا قلعة صلاح الدين (ممنوع الدخول إليها).

وبرمنا في الشام القديمة كلها وقصر العظم وشارع الثورة إللي شبه شارع رمسيس بالظبط والمسجد الأموي وسوق الحامدية وأكلنا البوظة العربي.

بعد كده ذهبنا لحجز غرفة في بنسيون عشان اقضي فيه الليلة واسافر لحمص اليوم التالي. حجزت في فندق الربيع غرفة رقم 12 التي تطل على حديقة جميلة.
وقت الغذاء. عندهم بيوت قديمة زي بيت الهرواي وزينب خاتون بس مازالت محتفظة بالمعمار، الدور الأرضي بيكون مطعم والأدوار العليا غرف للسكن فكرة لطيفة وكمان تظل البيوت مستخدمة وتدر عائد.

بعد الغذاء والحديث الطويل عن القاهرة ودمشق والاحوال السياسية وأحوال المدونين المصريين وما يحدث ومدى تشابه سوريا بمصر في الخمسينيات، ذهبنا لمقابلة سارة تقي الدين (مهندسة صوت) وهى صديقة لعلاء وعمرو وسوف تكمل معي الجولة. عرضت علي سارة أن اقيم عندها بدلا من الفندق لأنها تقيم بمفردها في شارع الجسر الأبيض (وديه حاجة غريبة في الشام)، طيب نروح الفندق آخد الشطنة بتاعتي ونرجع نحطها عندك في البيت. بعد كده جولة شارع الحمرا وبقيةالشوارع الكبيرة المعروفة في الشام. وكمان أغرب محل في دمشق ورجعنا البيت تاني، اتصل عمرو عشان نتقابل ونتعشى ونطلع على جبل قاسيون نتفرج على دمشق من فوق. قابلنا عمرو مع صديقه شادي بقى المرة ديه، شادي مقيم في السعودية مع والديه ويعمل مهندس وهو دلوقتي بيحضر للماجيستير. اخدنا الأكل وطلعنا فوق جبل قسيون، حديث طويل بيننا احنا الأربعة، وهدوء جميل ومنظر أجمل، ومرة واحدة يظهر برق وتاني وتالت. قلنا بس اليوفو هايهجموا علينا، بس يا خسارة ماحدش هجم ولا حاجة :-(
موعد وضع خطة الغد، اروح حلب واقضي ليلة وبعدين اطلع على حمص ومنها العودة إلى دمشق، ولاّ العكس؟ حمص - حلب- دمشق؟ شقلبنا الدنيا خالص، عشان ماعنديش وقت طويل قوي، أروح حلب وأرجع تاني دمشق واروح حمص وارجع وبعدين اطلع على عمان تاني. طيب حلو قوي، موعد الأوتوبيس الساعة 7 الصبح، شادي (ياختي عليه) هايوصلني الصبح للموقف وهناك هاينتظرني حسّان (طبيب). اتفقنا.
يتبع.

مختلفين

2006-06-27T14:55:00.000+03:00

مع مرور السنين بنقابل ناس كتير.

موسيقى

ممكن نبقى أصحاب ونبني علاقة صداقة قوية، وممكن نكون مجرد معارف وخلاص. نتقابل وقت مانتقابل ويمر وقت ولا نسأل على بعض.

وفيه ناس بيفضلوا موجودين على طول..ويمر عليهم الوقت وهما زي ما هما.

وناس تاني بيختفوا ويظهروا بعد فترة، ولما تتقابلوا تكتشفوا انكم اتغيرتم. وتفكروا هل كان أحسن تفضلوا مع بعض عشان تتغيروا مع بعض، ولاّ أحسن ماكنتوش تتقابلوا عشان تفضل ذكرى الاصدقاء القديمة زي ما هى.

الصندوق الأسود

2006-06-10T03:25:00.000+03:00

بداخل كل انسان صندوق أسود يسجل فيه كل حاجة عنه وعن حياته. والمعلومات داخل الصندوق مش عشان نخبيها ونحجبها عن نفسنا أو عن الآخرين، المعلومات بداخله ممكن استرجاعها في أي وقت ولكن لأشخاص معينيين حسب أهمية المعلومة..هى مش معلومات حربية ولا أسرار يعني، هى ممكن تكون مشاعر وأحاسيس جميلة أو مشاعر ضيق، ذكريات جميلة أو أليمة، أحداث حقيقية أو خيالية. وكل انسان وحسب طبيعته وما يريد أن يسجله في صندوقه الأسود. أنا عندي صندوقي بس مش أسود لونه أحمر.

كان بياخد وقت طويل عشان يُقدم على خطوة جريئة، بس ده وهما صغار في السن. ولكن مع تقدم العمر، يتعلم الأنسان من تجاربه السابقة ويحاول أن يحسن من نفسه ويطورها. عشان ياخد قرار أنه يُقبّل حبيبته كان مضى على علاقتهما 3 سنين...وكانت خطوة جريئة ولكن جميلة وفي يوم لطيف من أيام الشتاء. وحدث ما لم يتوقعاه أن يدخل شخص آخر وياخذه منها..وبالتطور السريع للعلاقة الجديدة بدأت الخطوات والقرارات التي كانت جريئة في وقت مضى وتحتاج لردح من الزمان من التفكير قبل القدوم عليها، سهلة وتحدث في ثواني..برضو العلم تقدم والعولمة والعالم الذي اصبح قرية صغيرة بيأثر علينا.

وسلم لي على العولمة والقرية الصغيرة.

لحظات ممتعة

2006-06-08T17:40:00.000+03:00

دائما اللحظات الممتعة التي نقضيها مع من نحب هى التي نتذكرها، وبعد وقت طويل أو قصير تصبح ذكريات بعيدة ولكن جميلة. وفي بعض الأحيان يعيش المرء في هذه الذكريات وينغلق على نفسه ليهرب من الواقع المرير الذي يمر به ولا يستطيع أن يغيره.

سمعت زمان حكاية اتنين اتفقا على الهرب إلى جزيرة خالية من كل البشر ما عدا هما، وان يعيشا فيها بقية عمرهما مع بعض، وظلا يتخيلان كيف سيكون الحال؟ وهل هايزهقوا من بعض ولا لأ..وكل ده وهما مش بيعملوا حاجة غير انهم بيتخيلوا بس ايه إللي ممكن يحصل وهايعيشوا إزاي. وحدث أن تفرقا بعد زمن ولكن أحدهما مازال يعيش مع اللحظات الممتعة والأوقات الظريفة التي قضياها مع بعض ويرفض الواقع الذي كان سبب فيه والآخر يحاول أن يستكمل حياته بشكل طبيعي وينجح في بعض الأوقات وفي البعض الآخر يحن للماضي الجميل. ومازالا يتقابلا وتجمهعما لحظات ممتعة جديدة ولكن دائما يبقى تأثير الماضي عليهما. ويظهر أشخاص جديدة في حياتهما وينشغلا ويمر وقت دون أن يتقابلا ولكن بمجرد أن يحدث لقاء يعود بهما الزمان كما كان عليه قبل الفراق. وترجع تاني فكرة الجزيرة الخيالية التي لا يعرف مكانها أحد غيرهما.

ولكن هل نستطيع الهروب إلى الأبد لهذه الجزيرة البعيدة التي نعيش فيها مع الذكريات واللحظات الممتعة؟

الأستنساخ

2006-05-30T09:51:00.000+03:00

في طريقي للعمل اليوم، كالعادة استمع للراديو..برنامج قاموس المعرفة. حلقة اليوم كانت عن الاستنساخ.
وفكرت في ما إذا تم استنساخي؟! توءم متطابق وبنفس التركيبة الوراثية ولكن هناك فارق في السن!!!!!! هل من الممكن ان يكون هناك نفس الشخص مرتين؟ حتى التوءم المتطباق بيكون نفس الشكل ولكن تختلف الجينات والصفات (التركيبة الوراثية).
موضوع مثير للتفكير.

حدث في لندن

2006-05-14T10:04:00.000+03:00

التفاصيل هنا.

عظيمة يا......

هل تعلم؟

2006-05-09T15:44:00.000+03:00

هل تعلم شىء عن وثيقة حقوق المواطنة المصرية؟

اللوفنامة

2006-04-16T00:29:00.000+02:00

وصل أخيرا بعد طول انتظار اللولفين الصغير :-) بس الأسم بقى لسه لم يُحدد بعد، يا ملين.
كنت فاكرة أول ما أشوفها هانبهر وأتجنن؛ المشاعر إللي كل الناس بتحكي عنها. بس الحقيقة ولا حاجة من ديه حصلت!
كنت بس خايفة على اللولفين لمّا عرفت أنها نزلت عشان يقشروها، وكانت لوحدها رفضوا دخول أي حد معها. غير كده مافيش احساس.
كنت باتفرج على الست الوالدة والسيد الوالد، وهما قاعدين جنب بنتهم وبنت بنتهم :-) بس برضو مش متخيلة إن ديه بنت أختي..هى ديه أختي إللي كنت بالعب معها واحنا صغيرين؟!

أصبحت ماما كده مرة واحدة.
ألف مبروك، وزادت العايلة واحد.

الروح والجسد

2006-04-04T11:32:00.000+02:00

متلازمان لا يفترقان...وفجأة قررت الروح أن تترك الجسد وحيدا.

الجسد: هاتسبيني؟
الروح: أيوة.
الجسد: يعني مش هاشوفك تاني؟
الروح: ممكن دلوقتي، بس بعد كده مش عارفة هاكون عايزة أشوفك ولا لأ.
الجسد: طب ما ينفعش تفضلي معي على طول، أنا مش هاتغير، أنا عايزك معي.
الروح: لأ، ماينفعش. أنا كنت عايزة أنسى وانت كده هاتفضل فاكر على طول.

ماذا سيحدث للجسد الحزين بعد فراق الروح؟

همّ النمّ

2006-04-03T16:20:00.000+02:00

هبة يوسف سألت عن الأغنية . باهديها لكل الجيل الذي عاصرها :-)

شكرا لعلاء.

ممكن نضيف للأغنية جزء من تأليف راء العظيم، وأعتبر هذا المقطع من أهم مقاطع الأغنية:

والستّ نعامة قلِتِلها
؟جبِتِ الفنّ ده كلّه منين
مالت راسها وطار منديلها
وقالتلي كلّه من العين
عيني تشوف الحاجة الحلوة
واكتِب عنها كلامي الزين

وزمان قالوا الكلام
بيخلّينا سُلام
رُحت أنا كاتبة بخفّة دم

ذكريات.

استكمال عشان خاطر هبة يوسف ما يطلبه المستمعون:
حادي بادي
يا شمس يا شموسة
تاتّا تاتا

معلش يا هبة ماعنديش تاني ممكن تتعبي نفسك وتدوري انت بقى على الباقي :-)

مش بس بنقشره ونأكله

2006-04-03T14:01:00.000+02:00

فيه أغنية قديمة اسمها البرتقال أو حاجة كده،أنا فاكرة حتة منها:
ياللي زرعتوا البرتقال، ياللا اجمعوه
آن الآوان، ياللا اجمعوه، آن الآوان ياللا ياللا

وجدت هذه الصور لأستخدامات أخرى للبرتقال، مش بس عصره أو تقشيره وأكله.

بس لو دققنا النظر ممكن نقول ان ده مش برتقال ولا حتّى ليمون، ممكن تكون كرات ملونة. المهم إن الألوان عجباني جدا.

الدكتور شحاتة وكسوفها

2006-04-02T13:07:00.000+02:00

جالسين منتظرين كسوف الشمس على شاطىء خليج السلوم. ومعنا اختراع الفنكوش.

هضبة السلوم

توجه إلينا أحد الأشخاص: انتم من كلية العلوم؟
أنا: أيوة، وده مشروع التخرج.
أفريكانو: أيوة صحيح.
أنا: ايه يا أفريكانو، انت مش فاكر دكتور شحاتة قال ايه؟ ولا نسيت؟
أفريكانو: يا نعامة، الدكتور شحاتة ساب الجامعة.

مع الاختراع

الكسوف الكلي الساعة واحدة وخمسة ظهرا

وعلى رأي أفريكانو "تبدو الرّحلة طويلة في بدايتها، و الطريق مرهقةً. على أن الواقع كان على النقيض؛ لأن وجود هذه الصحبة الرائعة قد جعل المسافةَ هينة. أفكر في هذا الجمع، منذ شهور لم أكن اعرف نصفَ المسافرين معي... لو أنني مررتُ بهم لما بادلتهم السلام." فعلاً ماكنتش أعرفهم من فترة ومنهم شموسة إللي شوفتها لأول مرة في السلوم :-)

الصورة فيها كل الناس مش لازم بقى أقول هما مين :-)

صورتين من عند ميلاد

أمّا براوة

2006-03-23T11:39:00.000+02:00

أمّا بَراوة بَراوة...أمّا بَراوة
دوّار حبيبي تَراوة...آخر تَراوة

قُلة حبيبي ملانة وعطشانة يانا...أروح له؟ ولاّ أروَح أشرب حَدَانا
أروح له؟ ولاّ أروَح...وبلاش شقاوة
أمّا بَراوة بَراوة...على الشقاوة

هاهاهاها ياختي عليها وعلى الشقاوة. أغينة كوميدية جدا. عارفاها من زمان، بس مش باخد بالي من كلماتها خالص.
النهاردة الصبح وأنا في الطريق إلى العمل، الراديو كان مظبوط على البرنامج العام، وديه اذاعة الصباح بالنسبة لي :-) وكانوا بيتكلموا عن نجاة الصغيرة، وذاعوا جزء من هذه الأغنية الكوميدية :-)

وخافت من خيالها

2006-03-21T16:15:00.000+02:00

شوفت الكليب ده وضحكت جدا.

يا عيني غلبانة قوي.

صباح الخير يا مولاتي

2006-03-21T09:37:00.000+02:00

يا ماما يامّا يامّاتي.

وبابا كمان مش ماما بس :-)

يوم الجمعة

2006-03-14T13:31:00.000+02:00

كل عائلة في الغابة حِدانا عندها طقوس خاصة بها. احنا بقى عندنا طقوس ليوم الجمعة.
أنه يوم الفووووووووووول العالمي.
لازم العائلة تفطر فول الصبح. يعني نصحى بدري كلنا، وناكل فول.
فيه فول بالزبدة والكمون (وده حبيبي)، فول بالزيت والليمون، فول السلطة (وده بقى إللي مش باحبه خالص، ولكن الاب مصمم إني باحبه وبيعمله لي على طول)، وفول بالثوم والمقدونس (ده مش بطّال). فيه بقى أنواع تاني بس احنا مش بنعملها؛ زي الفول المطبوخ .
جنب الفول طبعا بيكون فيه مأكولات أخرى، مثل البيض (المقلي، أو المسلوق). وكمان طبق الخلطبيصة.

ايه بقى الخلطبيصة ديه؟ أن أن أن تششش.
ديه إللي بقية الحيوانات يطلقون عليها الجبنة بالطماطم. ولكن عندنا بتكون لها طريقة مخصوصة وسحرية. ماحدش بيعرف يعملها زيينا كده. نضيف إلي الجبنة البيضاء الطماطم والجرجير والبصل الأخضر والخيار وشوية زيت زيتون أو زيت عادي ونقلب. لو الملح زيادة ممكن اضافة زبادي. بس برضو مهما قلت مش هاتطلع زي بتاعتنا.

وياسلام بقى لو فيه ناس كتير على الافطار (ساعات بيكون تجمع عائلي كبير من العم وأولاد العم، والخال والخالة والجدة، وكل مين عايز ياكل ويبلّم طول اليوم)، يضاف إلى كل ده الفطير الشهي والطعمية (ويا سلام لو بيتي مافيش أحسن من كده) والبطاطس المحمرة. الله يا حلولي على الفطير والعسل الأسود بالطحينة. طبعا فيه عسل أبيض بس أنا لا أفضله عشان كده مش باتكلم عنه خالص.
وأكيد كوب (أحسن أقول جردل) الشاي بالحليب بيتشرب مع الكلام ده كله.
ونفضل نتكلم نتكلم وناكل ناكل لحد ما ننفجر كلنا ونبلّم، والشاطر إللي يقوم ويعرف يعمل أي حاجة بقية يوم الجمعة. ماما بتكون دايخة دايما بعد الأكلة ديه وبابا كمان وكل واحد بيدوّر على كنبة أو سرير يترمي عليهم ويتنّح. لدرجة ان السيد الوالد جاب لنا دواء لهضم الفول عشان نعرف نستمر.

مرة كنت مسافرة في زيارة لغابة في قارة تاني، وفات عليّ يوم جمعة مافطرتش فيه فول معاهم، وصلتني رسالة على التليفون المحمول، محتواها كان كلمة واحدة طويلة: فوووووووووووووووووول.
وبالهنا والشفا.

شوفته النهاردة

2006-03-13T12:08:00.000+02:00

في طريقي صباحا للعمل (عادي زي كل يوم)، وانا معديّة من جنب بيت أهل الغوريلا، لقيت صف طويييييييييييل واقف مرصوص ورا بعض، يا حلولي، هو اشتغل؟
مش قالوا اجلّوه لحد منتصف شهر مارس 2006.
ألف مبروك تاكسي العاصمة انتشر في المعادي، ولا كأننا في نيويورك..أنا مارحتش عمري بس باشوف في الافلام.

الصورة مش نيويورك ولا حاجة

صف طويل من السيارات الصفراء مكتوب عليها باللغة الانجليزية Cairo Cab (مش عارفة ليه يعني) .
وياسلام على نوع السيارات باراتي من فولكس فاجن، يا حلاوة يا ولاد، بافكر بقى بكرة أروّح بتاكسي القاهرة ده ولا مش عارفة اسمه ايه.

يفرق عن الصورة بس، ان السرعة مش هاتكون عالية قوي كده، وكمان عليه مربعات سوداء كده مالهاش لازمة. وافرحوا وغنّوا وهللوا، اتحلت المشاكل وهاندفع ببطاقات الائتمان، هى ديه كانت المشكلة الوحيدة.

سؤال يخطر على بالي؛ ليه لونه أصفر، مش أبيض وأسود زي ما اتعودنا؟

هاجربه وأحكي عن تجربتي مع السائق والسيارة نفسها وطريقة تحصيل الاجرة.

أي كلام

2006-03-06T11:57:00.000+02:00

ماعنديش حاجة أكتبها...بس زقهت من التدوينة إللي فاتت.

قلت أغير.

فلّة

حقيقة الحياة

2006-02-27T15:15:00.000+02:00

يااااه لو أدرك الانسان حقيقة الحياة...كم هى قصيرة...لا تستحق كل هذا العناء.
أيجب علينا أن نعيش حياتنا كما فرضها علينا القدر...أم نغيرها لما هو أفضل لنا ونستمتع بها؟
آه لو كنت أعرف ما يخبئه الدهر لي.
ما عليّ إلا الإنتظار.

أحزاني

2006-02-24T21:57:00.000+02:00

حداداً على الطيور المدبوحة في مجزر الحكومة وعلى شهداء انفلونزا الطيور، سوف اختفي لفترة خوفاً على نفسي الحقيقة من العدوى. ويا عالِم هارجع امتى. ممكن اموت في الغربة وممكن أعود سليمة.
خلّي بالك من العيال يا باتعة.

آخر حركات شعبولّة

2006-02-16T14:05:00.000+02:00

إهداء للدوك

خلصنا الصبر كله ..

وبردو مفيش حلول ..

اهى وصلت الاهانة للدين وللرسول

رسول الله محمد.. إمام الأنبياء..

عايزين يهزوا صورته ..السفلة الأغبياء

كل الأديان بريئة من اللى هانوا النبي ..

عشان دي ناس مجنونة أكبر ما فيهم غبي

لو يقرأ عن محمد هيعرف هو مين ..

رسول الانسانية الصادق الأمين

دنمارك ايه يا عالم ..

حتى بتوع العجول ..مين دول عشان يقولوا كلام على الرسول

هقول ومش رح اسكت ..والناس هتقول معايا.. عايزين مقاطعة شاملة ..

وبردو مش كفاية

لو كل الناس هتسكت ..في رب اسمه الحسيب..

عاوزين نعمل حاجة .. في خدمة الحبيب .

صور قديمة

2006-02-15T14:08:00.000+02:00

وجدت هذه الصفحة.

وادي الذئاب

2006-02-13T10:48:00.000+02:00

يا ترى يا هل ترى، هل هانشوف الفيلم ده في مصر؟