يا حلاوة يا ولاد

امبارح المياه كانت قاطعة طول اليوم، انا كنت خرج المنزل ورجعت متأخر بالليل واكتشفت القصة ديه الساعة 1 صباحًا، ولازم آخد الدوش المسائي.
كلمت الحارس:
ـ المياه قاطعة، لو سمحت شغّل الموتور.
ـ لأ يا فندم، ديه قاطعة من الصبح، وكلمنا المرفق وقالوا كمان شوية.
ـ طيب شكرًا

طبعًا أنا مش هاسكت، طلبت الدليل 140 عشان آخد منهم نمرة مرفق مياه المعادي. وكانت مفاجأة.
ردّ عليا صوت نسائي ناعم:
"لقد اتصلتم بالمصرية للأتصالات دليل....."
وسمعت موسيقى لطيفة وأنا مذهولة على التليفون (فعًلا كنت مذهولة) يا حلوليييييييي، ايه الجمال ده كله.
ردّ عليا واحد بقى:
ـ المصرية للاتصالات، محمد اسماعيل، السلام عليكم.
ـ وعليكم السلام، ممكن لو سمحت نمرة مرفق مياه المعادي.
ـ هاتعب حضرتك وتنتظري معايا شوية على الخط.
ـ طيب مافيش مشاكل.

واشتغلت موسيقى تاني، وانتظرت والله حوالي دقيقة أو ممكن أقل كمان، ورجع لي تاني الأخ محمد اسماعيل:
ـ آسف يا فندم وشكرًا على الانتظار.
ـ مافيش مشكلة.
ـ هو فيه نمرة لشكاوي المياه هى 125 ولو حضرتك عايزة نمرة المرفق هاوصلك به دلوقتي. أي خدمة تاني؟
ـ شكرًا جزيلاً بس ممكن أقول لك ملاحظة.
ـ اتفضلي.
ـ الحقيقة أنا منبهرة بالخدمة جدًا.
ـ شكرًا يا فندم، مع السلامة.

بعد كده رجع تاني الصوت النسائي الناعم تقول:
إذا كنت ترغب بالاتصال بالرقم المطلوب اصغط 1، اذا كنت ترغب في الاستفسار عن رقم آخر اضغط 2.
ضغط على 1 لقيتني باكلم مرفق المياه!! ايه ده يا حلاوة يا ولاد، احنا فين يا سلاااااام عظيمة يا مصر :-)