استقلال القضاء حق كل المصريين

الست نعامة

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

شخابيط لخابيط

بقالي كتيير أوي مكتبتش حاجة، عندي كلام كتير، بس مزنوق في حتة مش عايز يطلع. أحداث كتير حصلت وغيَرت الدنيا كلها. آه (تنهيدة).

المهم، بحكم عملي كأم دلوقتي لكتعومين..أخدت الكتاعيم ورحنا مسرح العرائس في العتبة. الحقيقة لم أتوقع ان المسرحية هتكون على مستوى عالي..وعلى عكس توقعاتي، الكتعوم الكبير الذي لا يكل ولايمل من الحركة والقفز كالأرنب، كان جالس طوال المسرحية ومركز جامد في العرض، والكتعومة النمنومة كانت هى الأخرى مركزة جداً.



مش هى ديه القصة، هحكي م الأول. زمان علمونا لما نسمع تحية علم الغابة المجيدة نقوم نقف، اتربينا على كده وديه حاجة معروفة عندنا. ولكني فوجئت في بداية العرض وقبل رفع الستار، عزفت الفرقة موسيقى السلام الوطني للغابة المجيدة، ومفيش غير الست نعامة وكتاعيهما هما إللي قاموا وقفوا تحية للسلام الوطني...استغربت وقلت للفرخة بجانبي، ده السلام الوطني مش هتقومي، نظرت إليّ باستغراب بس قامت الحقيقة، وبدأت الحيوانات تقوم لما أفتكرت، ولكن فيه حيوانات فضلت باركة في مكانها مش واخدين بالهم خالص.

استغربت الحقيقة، هو كل إللي اتعلمناه زمان راح مع إللي راحوا ولا إيه؟!

التسميات: ,

 12:59  18 هسهسات أرسليها بالبريد  

خير اللهم اجعله خير

حالة من الذهول والبلم والنكد نزلت عليا يوم السبت 19 نوفمبر 2011، ومش عارفة اخرج منها من كثرة الأحداث الغيبة والمريبة والأستهتار بعقلية الغابة المجيدة. والله الموفق والمستعان.

التسميات:

 15:01  9 هسهسات أرسليها بالبريد  

السهرة تحلى

زي م قلت، النهاردة أول فصل الشتاء اللعين، كل سنة وانتم طيبين...وكمان يعدي على كتابة أول تدوينة للست نعامة 5 سنين :-) مع إني متوقفة عن الكتابة بقالي فترة بس قلت أكتب كده حاجة في السريع لأحياء الذكرى. وبهذه المناسبة أحب أن أهدي سلاماتي لأبو قردان والقرد حبيبي وطبعا زحلوف والتنين والكوالا وأكيد أبليس ومن بابا وماما وعمو وخالتو والدب واللاما والغزالة والفراشة والفيل أبو زلومة والحَمَارنب واللولفين طبعا كلهم بيسلموا ع الكتعوم والكتعومة وبيقولوهم اسمعوا الكلام واشربوا اللبن واغسلوا رجليكم قبل م تناموا والسلام ختام.

التسميات: , ,

 19:51  21 هسهسات أرسليها بالبريد  

يا ليل يا عين

التسميات: , , , ,

 23:07  15 هسهسات أرسليها بالبريد  

يا حلو صبّح

كل يوم بصحى بدري أوي شويتين تلاتة أربعة عشان أروح الشغل بدري.

sun smiling

فيه طريقين للذهاب للعمل، من داخل الغابة أو طريق يدور حلوها لزوم تجنب الزحام. أحب أنوّع ساعات عشان الملل برضو، المهم كل طريق له أصدقائه الصباحيين، يعني ناس بقابلهم في الطريق كل يوم في نفس الموعد، ولو مشفتهمش أعرف إني اتأخرت أو هما إللي اتأخروا. على الطريق إللي بيدور حول الغابة (الأرض تلفُ حول نفسِها) بقابل دايما ست موظفة بتبقى ماشية بتعجل وبفتح خطوة كده ومركزة في الطريق وفي خطواتها، بعرفها من ربطة ايشاربها الغريبة، وكمان أخدت بالي منها يوم كانت لابسة طقم زاهي الألوان. هى منتظمة في مواعيدها لدرجة إني عارفة النقطة إللي بقابلها عندها دايما.
في نفس الطريق ده فيه رجل شعره أبيض أوي، بياض ناصع، بس أشُك إنه كبير في السن، مكن أواخر الخمسينات مش أكتر من كده، دايما لما أعدي من أمامه بحس انه بيقولي برافو جيتي في وقتك تمام، ولما في يوم أسلك الطريق الآخر، اليوم إللي بعده بيقول لي كنت فين امبارح؟

الطريق الآخر إللي بيمر خلال الغابة الجميلة ويقطعها من النص، في ساعات الصباح الباكر بيكون فاضي كده وجميل جدا، هنا بقى بقابل دايما عدّاء، شاب في الثلاثينات من عمره بيمارس رياضة العدو، ويرتدي ملابس رياضية جميلة جدا، شكله كده داخل بطولة قريب، عشان شكله بيتمرن جامد وشادد حيله أوي الأيام ديه، نقطة مقابلتنا بتكون عند الميدان قبل الكوبري، النهاردة بقى هو اتأخر عشان قابلته وأنا نازلة الكوبري وهو لسه بيطلع، هاها كنت عايزة أقوله صحيت متأخر ولا إيه؟

ممكن يكون فيه أصدقاء طريق تانيين بياخدوا بالهم مني وأنا بكون مركزة في السواقة مثلا ومش متبعاهم بس كمان إللي عارفاه وعارفة انه عارفني هو عسكري المرور إللي ع الكورنيش، أهو ده بقى فعلا إللي متأكدة انه عارفني، عشان أنا دايما بمشي ع الشمال، وبقف وحظي كده دايما إني بقف في الأشارة على ناحيته وده بيكون الساعة 7 الصبح وقليل م تلاقي الاشارة زحمة الساعة 7، وشكلي يوم الأحد كده هنزل أسلم عليه هاهاها.

نهاركم سعيد

التسميات: , , ,

 10:48  17 هسهسات أرسليها بالبريد  

قالك البيض له زيت

البرقوق المتلج أبو قشرة رفيعة كده ولونه داكن بيكون معسل أوي، ومهما اختلف حجم حبّة البرقوق فطريقة أكله عند معشر الزحاليف واحدة، بيطلقوا عليها طريقة التزليط، يزلطوا البرقوقة المسكينة على مرة واحدة تنزل على رأي سكينة مزلقان على طول. يا معشر الزحاليف الرفق بالبرقوق المسكين، قطعوه وكلوه بلاش تزلطوه.

بمناسبة الكلام عن الزحاليف...السيد زحلوف له عندي عزومة على أكلة صيني، طبخة من طبخاتي المعروفة. وإليكم طريقة عمل السويت أند ساور، لعلي لا أستطيع أن أفي بوعدي للزحلوف وأعزمه عليها لظروفه الحالية..فها هى المقادير، إللي يعرف يعملها يعزمه هو بقى ويعزمني معاه يا ريت.
خضار بكل أنواعه (كرنب أحمر، كرنب أبيض، جزر، فلفل أحمر، فلفل أخضر، فلفل أصفر، كوسة وممكن بطاطس يعني) يقطع الخضار إلي شرائح رفيعة ونحطه على جنب. زنجبيل أخضر مبشور (شوية حلوين كده)، كام فص ثوم مبشور، لحمة مقطعة شرائح رفيعة أو صدور فراخ مقطعة شرائح رفيعة أو جمبري وسمك أو ممكن الأكتفاء بالخضار فقط للنباتيين. زيت زيتون، عسل أسود، صوص الصويا الخفيف (الفاتح) وليس الغامق، عشان الغامق درجة ملوحته عالية جدا، فلفل أسود، وممكن اضافة شعرية صيني (رايس نودلز) أو عدم اضافتها.

طريقة الطهي:

ملوحظة (1): إذا وُجد القدر الخاص بطهي المأكولات الصينية خير، لو مش موجود نستخدم قدر غويط وحويط عشان الخضار بس كتير حبتين.
ملحوظة (2): مش لازم نسلق النودلز قبل استخدمها ممكن اضافتها على طول كده وهى هتتسلق مع الخضار.
ملحوظة (3): عدم استخدام الملح وذلك لأستخدام صوص الصويا عِوضاً عنه.

1- يتم تسخين زيت الزيتون المتين وعليه نحط الثوم المبشور والزنجبيل المبشور، المفروض تنبعث رائحة عطرة وهى رائحة الزنجبيل الأخضر.
2- يتم اضافة كل الخضروات التي تستغرق وقت في الطهي، مثل الجزر والكرنب بكل ألوانه والفلفل بكل ألوانه، ونقلب، نقلب، نقلب، الخضروات هتنزل مايتها وتتدبل، ممكن بقى نضيف قطع اللحم أو الفراخ أو الجمبري أو نسيبه كده. ونرجع نقلب، ونقلب، ونقلب.
3- بعد كده نضيف الخضروات الخفيفة إللي بتستوي بسرعة مثل الكوسة، ونرجع نقلب تاني.
4- وبعدين نضيف صوص الصويا والعسل الأسود والفلفل الأسود حسب التذوق ونضيف كمان النودلز (إن وُجدت) ونرجع نقلب تاني، لحد م نوصل لدرجة الطهي المطلوبة. لو بالحس الفني الطبيخي شعرنا أن الطبخة محتاجة شوية ماء، نديها على طول، بس شوية شوية.
نطلع الأطباق الملونة الأمورة وناكل بالهنا والشفا كلنا كده وننبسط.

التسميات: , ,

 13:26  16 هسهسات أرسليها بالبريد  

وديه كانت القاضية

لأول مرة من 1 نوفمبر 2006 يوم ولادة الكتعوم الجميل أحس إني أمّ فعلا، وان عندي كتعوم كده...يعني كنت أعيش حياتي عادي مع تغيير بسيط وهو ظهور مخلوق تالت في العش السعيد واختفاء كل ما كان يُزيّن العش من أحجار وأخشاب عشان سلامة الكتعوم...تغيرت ملامح العش جدا، ولما بتفرج على صور العش من 3 سنين أستغرب كده وأقول إيه ده الحاجات ديه كانت فين أصلا؟

الحياة كانت عادية جدا وفجأة أن أن أن تشششششششششش...بدأ الكتعوم في الهرش، مش مهم هو لما بياكل موز كتير بيحصله كده، أصله كان مشروع قرد وتحول إلى كتعوم في آخر لحظة. بس شكل الحساسية ديه مش طبيعية..وبعدين الحرارة شكلها برضو فيها كام شَرطَة زيادة..يا خوفي يا بدران يكون إللي م يتسمى الجديري المائي. احنا نروح للدكتور بومة، هو إللي هيجزم.

الدكتور بومة: ماله الكتعوم؟
النعامة: اشتباه جديري.
الدكتور بومة: طب نكشف عليه.
بعد الكشف...
الدكتور بومة: ده مش اشتباه، ده مؤكد.

يا حلاوة الدنيا يا حلاوة، مش وقته خالص أمراض الصيف. هنا بدأت أحس فعلا إن عندي كتعوم صغير وبدأنا مرحلة أمراض الطفولة النعامية إللي كل النعام الأمهات بتشتكي منها وأنا كنت بستمع لهن كده وخلاص ومش في بالي أبدا إن في يوم هتعدي عليا كل الحاجات ديه.

كلمت الدوك نعام الكبير، ضحك وقال لي ألف مبروك مرحلة جديدة، أو كان يقصد اشربي، علقة تفوت ولا حد يموت.

وآه ياني

التسميات: , ,

 09:32  19 هسهسات أرسليها بالبريد  
في مرمى البصر
على أشكالها تقع
من الذاكرة