السهرة تحلى

زي م قلت، النهاردة أول فصل الشتاء اللعين، كل سنة وانتم طيبين...وكمان يعدي على كتابة أول تدوينة للست نعامة 5 سنين :-) مع إني متوقفة عن الكتابة بقالي فترة بس قلت أكتب كده حاجة في السريع لأحياء الذكرى. وبهذه المناسبة أحب أن أهدي سلاماتي لأبو قردان والقرد حبيبي وطبعا زحلوف والتنين والكوالا وأكيد أبليس ومن بابا وماما وعمو وخالتو والدب واللاما والغزالة والفراشة والفيل أبو زلومة والحَمَارنب واللولفين طبعا كلهم بيسلموا ع الكتعوم والكتعومة وبيقولوهم اسمعوا الكلام واشربوا اللبن واغسلوا رجليكم قبل م تناموا والسلام ختام.

يا ليل يا عين

يا حلو صبّح

كل يوم بصحى بدري أوي شويتين تلاتة أربعة عشان أروح الشغل بدري.



فيه طريقين للذهاب للعمل، من داخل الغابة أو طريق يدور حلوها لزوم تجنب الزحام. أحب أنوّع ساعات عشان الملل برضو، المهم كل طريق له أصدقائه الصباحيين، يعني ناس بقابلهم في الطريق كل يوم في نفس الموعد، ولو مشفتهمش أعرف إني اتأخرت أو هما إللي اتأخروا. على الطريق إللي بيدور حول الغابة (الأرض تلفُ حول نفسِها) بقابل دايما ست موظفة بتبقى ماشية بتعجل وبفتح خطوة كده ومركزة في الطريق وفي خطواتها، بعرفها من ربطة ايشاربها الغريبة، وكمان أخدت بالي منها يوم كانت لابسة طقم زاهي الألوان. هى منتظمة في مواعيدها لدرجة إني عارفة النقطة إللي بقابلها عندها دايما.
في نفس الطريق ده فيه رجل شعره أبيض أوي، بياض ناصع، بس أشُك إنه كبير في السن، مكن أواخر الخمسينات مش أكتر من كده، دايما لما أعدي من أمامه بحس انه بيقولي برافو جيتي في وقتك تمام، ولما في يوم أسلك الطريق الآخر، اليوم إللي بعده بيقول لي كنت فين امبارح؟

الطريق الآخر إللي بيمر خلال الغابة الجميلة ويقطعها من النص، في ساعات الصباح الباكر بيكون فاضي كده وجميل جدا، هنا بقى بقابل دايما عدّاء، شاب في الثلاثينات من عمره بيمارس رياضة العدو، ويرتدي ملابس رياضية جميلة جدا، شكله كده داخل بطولة قريب، عشان شكله بيتمرن جامد وشادد حيله أوي الأيام ديه، نقطة مقابلتنا بتكون عند الميدان قبل الكوبري، النهاردة بقى هو اتأخر عشان قابلته وأنا نازلة الكوبري وهو لسه بيطلع، هاها كنت عايزة أقوله صحيت متأخر ولا إيه؟

ممكن يكون فيه أصدقاء طريق تانيين بياخدوا بالهم مني وأنا بكون مركزة في السواقة مثلا ومش متبعاهم بس كمان إللي عارفاه وعارفة انه عارفني هو عسكري المرور إللي ع الكورنيش، أهو ده بقى فعلا إللي متأكدة انه عارفني، عشان أنا دايما بمشي ع الشمال، وبقف وحظي كده دايما إني بقف في الأشارة على ناحيته وده بيكون الساعة 7 الصبح وقليل م تلاقي الاشارة زحمة الساعة 7، وشكلي يوم الأحد كده هنزل أسلم عليه هاهاها.

نهاركم سعيد

قالك البيض له زيت

البرقوق المتلج أبو قشرة رفيعة كده ولونه داكن بيكون معسل أوي، ومهما اختلف حجم حبّة البرقوق فطريقة أكله عند معشر الزحاليف واحدة، بيطلقوا عليها طريقة التزليط، يزلطوا البرقوقة المسكينة على مرة واحدة تنزل على رأي سكينة مزلقان على طول. يا معشر الزحاليف الرفق بالبرقوق المسكين، قطعوه وكلوه بلاش تزلطوه.

بمناسبة الكلام عن الزحاليف...السيد زحلوف له عندي عزومة على أكلة صيني، طبخة من طبخاتي المعروفة. وإليكم طريقة عمل السويت أند ساور، لعلي لا أستطيع أن أفي بوعدي للزحلوف وأعزمه عليها لظروفه الحالية..فها هى المقادير، إللي يعرف يعملها يعزمه هو بقى ويعزمني معاه يا ريت.
خضار بكل أنواعه (كرنب أحمر، كرنب أبيض، جزر، فلفل أحمر، فلفل أخضر، فلفل أصفر، كوسة وممكن بطاطس يعني) يقطع الخضار إلي شرائح رفيعة ونحطه على جنب. زنجبيل أخضر مبشور (شوية حلوين كده)، كام فص ثوم مبشور، لحمة مقطعة شرائح رفيعة أو صدور فراخ مقطعة شرائح رفيعة أو جمبري وسمك أو ممكن الأكتفاء بالخضار فقط للنباتيين. زيت زيتون، عسل أسود، صوص الصويا الخفيف (الفاتح) وليس الغامق، عشان الغامق درجة ملوحته عالية جدا، فلفل أسود، وممكن اضافة شعرية صيني (رايس نودلز) أو عدم اضافتها.

طريقة الطهي:

ملوحظة (1): إذا وُجد القدر الخاص بطهي المأكولات الصينية خير، لو مش موجود نستخدم قدر غويط وحويط عشان الخضار بس كتير حبتين.
ملحوظة (2): مش لازم نسلق النودلز قبل استخدمها ممكن اضافتها على طول كده وهى هتتسلق مع الخضار.
ملحوظة (3): عدم استخدام الملح وذلك لأستخدام صوص الصويا عِوضاً عنه.

1- يتم تسخين زيت الزيتون المتين وعليه نحط الثوم المبشور والزنجبيل المبشور، المفروض تنبعث رائحة عطرة وهى رائحة الزنجبيل الأخضر.
2- يتم اضافة كل الخضروات التي تستغرق وقت في الطهي، مثل الجزر والكرنب بكل ألوانه والفلفل بكل ألوانه، ونقلب، نقلب، نقلب، الخضروات هتنزل مايتها وتتدبل، ممكن بقى نضيف قطع اللحم أو الفراخ أو الجمبري أو نسيبه كده. ونرجع نقلب، ونقلب، ونقلب.
3- بعد كده نضيف الخضروات الخفيفة إللي بتستوي بسرعة مثل الكوسة، ونرجع نقلب تاني.
4- وبعدين نضيف صوص الصويا والعسل الأسود والفلفل الأسود حسب التذوق ونضيف كمان النودلز (إن وُجدت) ونرجع نقلب تاني، لحد م نوصل لدرجة الطهي المطلوبة. لو بالحس الفني الطبيخي شعرنا أن الطبخة محتاجة شوية ماء، نديها على طول، بس شوية شوية.
نطلع الأطباق الملونة الأمورة وناكل بالهنا والشفا كلنا كده وننبسط.

وديه كانت القاضية

لأول مرة من 1 نوفمبر 2006 يوم ولادة الكتعوم الجميل أحس إني أمّ فعلا، وان عندي كتعوم كده...يعني كنت أعيش حياتي عادي مع تغيير بسيط وهو ظهور مخلوق تالت في العش السعيد واختفاء كل ما كان يُزيّن العش من أحجار وأخشاب عشان سلامة الكتعوم...تغيرت ملامح العش جدا، ولما بتفرج على صور العش من 3 سنين أستغرب كده وأقول إيه ده الحاجات ديه كانت فين أصلا؟

الحياة كانت عادية جدا وفجأة أن أن أن تشششششششششش...بدأ الكتعوم في الهرش، مش مهم هو لما بياكل موز كتير بيحصله كده، أصله كان مشروع قرد وتحول إلى كتعوم في آخر لحظة. بس شكل الحساسية ديه مش طبيعية..وبعدين الحرارة شكلها برضو فيها كام شَرطَة زيادة..يا خوفي يا بدران يكون إللي م يتسمى الجديري المائي. احنا نروح للدكتور بومة، هو إللي هيجزم.

الدكتور بومة: ماله الكتعوم؟
النعامة: اشتباه جديري.
الدكتور بومة: طب نكشف عليه.
بعد الكشف...
الدكتور بومة: ده مش اشتباه، ده مؤكد.

يا حلاوة الدنيا يا حلاوة، مش وقته خالص أمراض الصيف. هنا بدأت أحس فعلا إن عندي كتعوم صغير وبدأنا مرحلة أمراض الطفولة النعامية إللي كل النعام الأمهات بتشتكي منها وأنا كنت بستمع لهن كده وخلاص ومش في بالي أبدا إن في يوم هتعدي عليا كل الحاجات ديه.

كلمت الدوك نعام الكبير، ضحك وقال لي ألف مبروك مرحلة جديدة، أو كان يقصد اشربي، علقة تفوت ولا حد يموت.

وآه ياني

الجميل النائم (منقول)

قرأت تدوينة الجميلة النائمة عند صديقتي أميرة المسيري في المساحة بتاعتها. عجبتني عشان بتوصف نفس احساسي بالكتعوم مع فارق السن بينه وبين بنتها.

يا صفايح الزبدة السايحة

كل سنة واحنا طيبين، بدأ اليوم فصل الصيف، يا حلولييييييي.

ومع بداية الصيف تنفرج الأسارير وتنطلق المشاعر المكبوتة وتلاقي نفسك كده نشيط ومش عارف تعمل إيه من كتر الطاقة الموجودة. أصحى الصبح بدري، نسمات صيفية فجرية جميلة تتخلل الرئتين تعطيني احساس بالحيوية، وتشجعني على الذهاب للعمل والأنطلاق من جديد. هو ده يومي في الصيف، بغض النظر عن فترة الظهيرة إللي بيكون فيها الجو حاااار ونار يا حبيبي نار ولكن ع المغرب يا حلاوة المغربية مع كوباية شاي كده في الفراندة (بلكونة يعني) وبعدين الأستعداد للأنطلاق الليلي والسهر والأنبساط.

بمناسبة الزبدة إللي بتسيح برة التلاجة بسرعة في فصل الصيف، كانت جدتي ومازالت بتجيب كور (جمع كرة) الزبدة البيضاء وتسيّحها عشان تطَّلع منها السمن البلدي الجميل إللي طعمه في الأكل بيبان، ولكن تأثيره ع المعدة مش ولابد عشان تقيل أوي. تجيب حلة الديك الرومي الكبيرة أوي وتحط فيها بقى كور الزبدة وتسيح الزبدة ع النار. هنا بقى تبدأ مرحلة المُرتة، وفيه نوعان من المُرتة، 1-مُرتة بيضاء؛ وبتكون ع الوش (زي القشدة ع اللبن كده) وديه بتكون ملح خفيف وطعم الزبدة باين فيها أوي، 2- مُرتة بني؛ وبتكون في قاع الحلة وديه بقى المتينة جدا، ملحها قوي أوي بس طعمها لذيييذ جدا، الله عليها بالعيش بالبلدي (إللي بخمس قروش ومتحمص ع النار)، لقمة ورا لقمة ورا لقمة تلاقي الطبق خلص وانت مش واخدة بالك، وبعد كده نشرب 7لتر ماء هاهاهاها. لسه السيد الوالد الدوك نعام بيقوم بهذا الطقس المتوارث، بس مش عشان السمن البلدي (ده سبب برضو) ولكن عشان بلاص المِش يتغذى كويس، هتكلم ع المِش ده مرة تاني عشان ده حكايته حكاية.

بيظهر في فصل الصيف برضو الذرة المشوي، تلاقي على كل ناصية وكل شارع عيلة قاعدة بتشوي درة، وسيلة للربح في فصل الصيف وتسلية برضو، أهو نتفرج ع الناس إللي جاية تشتري الدرة.

شخصية دخلت عليا دلوقت وأنا بكتب التدوينة ضيعت كل الأفكار من المخيخ بتاع النعامة الأمورة، سوف أنسحب الأن وأعود في وقت لاحق لأكمل كتابتي عن الصيف وجماله وحمام السباحة وقعدته والبحر ورماله.

قنديل القناوي

النهاردة أطول يوم في السنة عشان النهاردة الذكرى السنوية يا ترى؟

لأ، النهاردة أول أيام الشتاء الحزين، هذا الفصل من العام مستفز ويثير الأعصاب بجد؛ ملل، وجو نكدي ولبس تقيل، وجزم طويلة، وتقشف في الأيادي والسيقان مع كل المحاولات لتلافي هذا التقشف الغتت، واستخدام كل أنواع الوصفات والمساحيق، ربنا يسهّل بقى وتنجح الوصفات البلدي المرة ديه.

وقنديل كان بيحتفل بعيد ميلاده من كام يوم، تعالي يا أم هاشم واتفرجي على قنديل بيعمل إيه. والكل كان منوّر مصطفى مستور وسهى البرشومي ومعاهم عبد السلام سمك قلبوا الدنيا بحكاياتهم عن الكنبة وقعدتهم عليها.

المهم ان محمد منير بقى بيدوّر ع اللولي يا لولي، وحبسوني وحبسوه.

كيفَك انتَ

ملحوظة: للأستمتاع بالتدوينة ديه، لازم تكون فيروز بتغني كيفك انت في الخلفية.

تذكر أخر مرة شفتك سنته؟ تذكر وقته آخر كلمة قلته؟ تغني فيروز وهى قاعدة بتسمعها وتفتكر معاها حكايتها معاه. بتشوفه بس مش كتير، بتكلمه بس مش كتير برضو. مفيش جديد يتقال أو يتحكي عنه، مع انها كانت بتكلمه عن أي حاجة ممكن تحصلها ولو صغيرة وفي أي وقت، بس خلاص معندهاش طاقة عشان تطلعها ولا في قوة عشان تبذل مجهود، بتتكلم في مخها جوة دماغها كأنها بتتكلم معاه هو. حواليها ناس كتير وناس كويسين، بس خلاص مش قادرة. تحتفظ بداخلها بذكرياتها الجميلة معاه ونفسها تعمل حاجات تاني عشان يكون عندها ذكريات كتيرة ولكن ....

"إرجع أنا وياك".."تذكر آخر مرة شو قلتلي...زعلت بوقته...هيدا انت"..."انت الأساسي وبحبك بالأساس" بتكمل سماع الأغنية وتتخيل لو كانوا مع بعض لحد دلوقت، يا ترى هيكونوا إزاي؟ ولما يكبروا ويتقدم بهما السن، هيكونوا زي الرجل والست العجوز إللي شافوهم مرة في وسط البلد وهما بيتمشوا وتخيلوا نفسهم في مثل هذا الموقف؟

وترجع بالذاكرة، أول يوم اتقابلوا أو شافته هى، قابلوا بعض في مكان ضيق، عدوا من جنب بعض وخلاص. بعد يومين اتقابلوا تاني قالتله صباح الخير ورد عليها وخلاص، مكانش هناك أي نوع من المشاعر، واحد بتشوفه كل يوم وخلاص، بس ظريف وغريب. هو كمان فكّر فيها نفس التفكير، واحدة ظريفة ييجي منها.

فجأة نشأت صداقة غريبة بينهم. إيه إللي حصل مش عارفين، بس كانوا أصحاب، وعلى طول مع بعض وبيعملوا كل حاجة مع بعض وابتدى يتصاحب على صاحباتها وهى كمان تتصاحب على أصحابه وتسمع حكياته إللي كانت بالنسبة لها غريبة وجديدة، وهو كمان بيسمع حكاياتها إللي مش بتخلص أبدا وعن ناس عمره م شافهم ولا سمع عنهم.

اكتشفوا ان فيه حاجة غريبة تجمعهم، حاجات كتير مشتركة بينهم وبين كل حاجة حواليهم. نفس الأهتمامات، نفس الحكاوي. اشتركوا في أنشطة جديدة مع بعض، رحلات واجتماعات وندوات. عرفوا ناس كتير مع بعض، وكمان بعدوا عن ناس كتير مع بعض. ناس راحت وناس جت وهما مع بعض. كبروا مع بعض، وفهموا بعض أكتر وأكتر. مواقف كانت بتحصل زمان، كانت هى بتزعل منها وتغضب، عشان لسه مَكَنتش فاهماه أوي، ولما يفضل ساكت مبقتش تسأله انت ساكت ليه، عشان عرفت انه مش لازم يتكلم، ممكن يسكت عشان هو مبسوط، مبقتش تزعل، نضجت، كبرت، فهمت. هو كمان كان بيزعل أو يسكت وميتكلمش، بس خلاص دلوقت مفيش كلام، سكوت على طول.

تحلم بحلم، تصحى الصبح تكلمه على طول وتحكي له، رد هو باستغراب، أنا كمان حلمت نفس الحلم!! اتخضت، سكتت، بس كانت حسّة وعارفة انه ممكن يحصل. وهو كمان كان عارف. كمان كانت أيام بتحلم بحاجة هتحصل وتكلمه تحكيله عنها ويقولها أيوة ده حصل لي امبارح، حلمك اتحقق. وصلوا لدرجة تواصل وتوارد خواطر وأحلام غير طبيعية. ساعات كانوا يسكتوا ولما يبتدوا يتكلموا، يبتدوا في نفس الوقت وبنفس الكلمة عن نفس الموضوع. في الشتاء، كانت تجري عليه وتقضي معاه ساعات طويلة من الليل، وتنام في حضنه عشان بردانة وتدفّى بحبه لها.

حلموا بجزيرة بعيدة، يعيشوا فيها مع بعض من غير مضايقات من حواليهم، ولا التزامات لأي حد. هما الأتنين بس، يعملوا كل حاجة هما عايزينها وفي أي وقت، كل حاجة نفسهم فيها موجودة، هما الأتنين بس. يكبروا مع بعض، ينضجوا أكتر مع بعض، يخلفوا أطفالهم، إللي كانت اساميهم متحددة لوحدها من غير تدخل من أي واحد منهم.

وجه اليوم إللي كانت هى خايفة منه، هو كمان كان بيفكر في اليوم ده، بس عمره م قال لها عن إللي كان خايف منه، ولا هى كمان. يوم الفراق. كان يوم صعب عليها وعليه. دموعها كانت بتسيل لوحدها، حتى لو هى مش عايزة تبكي. إزاي هتعيش من غيره؟ هتكلم مين أول م تصحى من النوم، هتكلم مين قبل م تنام بالليل؟ من إللي هتخرج معاه أو تقعد معاه في أيام الشتاء الباردة. من إللي هيكلمها عن حاجات عمرها م عرفتها قبل كده. يا ترى هو كان احساسه إيه، نفسها تعرف كان بيفكر في إيه يومها. يوم الفراق، مكنش فيه تواصل ولا توارد أفكار. كان يوم مبهم، السحاب كان كتير والدنيا مغيّمة. يا ترى السماء كانت عارفة ان ده اليوم الموعود؟

فضلت لوحدها، مش عارفة تبتدي تاني من جديد، بتحاول تتعرف على ناس تانية ومش قادرة، خلاص كل النشاط إللي كانت فيه راح معاه. وفضلت هى مع الذكريات من الماضي الجميل، تفكر في الجزيرة البعيدة وذكرياتهم هناك مع بعض وعن الذكرى السنوية الخاصة بهما هما بس.

إلاّ الكرسي...

وصلني ع البريد الألكتروني هذه الفتوة، حتى الكرسي لم يسلم، والله ده حرام.

"الجلوس على الكرسي حرام وزنا!
أما أم أنس السلفية فانفردت بفتوى تحريم الجلوس على الكرسي. وإليكم نص الفتوى كما وردت على موقعها، قالت ''...إن من أخطر المفاسد التي بليت بها أمتنا العظيمة ما يسمى- بالكرسي- وما يشبهه من الكنبات وخلافها مما هو شر عظيم يخرج من الملة كما يخرج السهم من الرمية، نسأل الله العافية! وإليكم بيان حركة استخدام الكراسي واقتنائها والجلوس عليها، والنظر إليها وفق تأصيل شرعي من الكتاب والسنة، ومن لنا يا أمة الإسلام غير الكتاب والسنة ثم العلماء الربانيين الذي يعلمون ما لا تعلمون؟ الدليل الأول: إن السلف الصالح وأوائل هذه الأمة وهم خير خلق الله- كانوا يجلسون على الأرض، ولم يستخدموا الكراسي ولم يجلسوا عليها، ولو كان فيها خير لفعله النبي صلى الله عليه وسلم. قال جل من قائل ''وما آتاكم الرسول فخذوه وما نهاكم عنه فانتهوا''. الدليل الثاني: أن هذه الكراسي وما شابهها صناعة غربية، وفي استخدامها والإعجاب بها ما يوحي بالإعجاب بصانعها وهم الغرب. وهذا والعياذ بالله يهدم ركنا عظيما من الإسلام وهو الولاء والبراء، من أحب الكفرة حشر معهم. الأمر جلل يا أمة الإسلام فكيف نرضى بالغرب ونعجب بهم وهم العدو ''هم العدو فاحذرهم قاتلهم الله أنى يؤفكون''.
الوقفة الثالثة: وهي ما يجلبه الكرسي أو الأريكة من راحة تجعل الجالس يسترخي وتجعل المرأة خاصة تفرج رجليها، وفي هذا مدعاة للفتنة والتبرج، فالمرأة بهذا العمل تمكن نفسها من الرجل لينكحها، وقد يكون الرجل من الجن أو من الإنس، والغالب أن الجن ينكحون النساء وهن على الكراسي، فلكم من مرة شعرت المرأة بالهيجان والشبق الجنسي المحرم، وذلك بعد جلوسها على الكرسي، أي والله، ولكم من مرة وجدت المرأة روائح قذرة في فرجها، كما خبرت وكما حدثتني بذلك بعض الصالحات التائبات من الجلوس على الكراسي، لهذا فالجلوس على الكرسي رذيلة وزنا لا شبهة فيه، ولهذا وجب على الأمة حماية أعراضها وشرفها ودينها وعقيدتها قبل ذلك! الدليل الرابع والأخير: أن الجلوس على الأرض يذكر المسلم بخالق الأرض، وهو الله جل جلاله، وهذا يزيد في التعبد والتهجد والإقرار بعظمته سبحانه، قال العلامة الشيخ صالح الفوزان قدس الله ذكره: الجلوس على الأرض يجلب البركة والخير كله. اهـ.
أما الجلوس على الكرسي فهو ينسي الجالس خالق الأرض ويجعله يعجب بصانع الكرسي الغربي، مما يخرج من الملة، وقد سبق بيانه في باب الولاء والبراء، وبعد هذا البيان والتوضيح والتأصيل الشرعي لحكم الإسلام من الجلوس على الكراسي وما أشبهها- هل يرضى أحد أن يعصي أمر الله ويرتد عن دينه؟ قال تعالى ''ومن يرتدد عن دينه فأولئك الذين حبطت أعمالهم في الدنيا وليس لهم في الآخرة من خلاق''. والآن يا أمة الإسلام بعد أن بلغتكم الحجة الشرعية المؤصلة بالأدلة من كتاب الله وسنة رسوله وسير سلفنا الصالح من آراء علماء الأمة الربانيين- حين بلغكم ذلك ليس لكم عذر في الجهل، وقوموا بواجبكم الجهادي في الإنكار، بإرسال البرقيات إلى ولي الأمر وتكسير الكراسي في المدارس والمستشفيات والصالونات وغيرها من الأماكن التي يضع العلمانيون والفسقة والكفرة والملاحدة فيها الكراسي لإغواء الأمة وإفساد عقيدتها الصحيحة، وأن تكسيرها وحرقها من أعظم أبواب الجهاد وذروة سنامة- الله أكبر ولله الحمد وسبحان الله ولا عدوان إلا على الظالمين. حررت الفتوى لسبع ليال بقين من شهر شعبان- العلامة الداعية أم أنس السلفية- جزى الله خيرا من ساعد على نشرها"

يالا بقى نعمل كلنا ثورة الكراسي، ونقول "كلنا كرسي"

وماله يا خويا وماله نقول تاني

قال لي صديقي القرد م تحكي تاني عن الغابة وما فيها. ف قلت نحكي منحكيش ليه. الغابة غابتنا والحيوانات ولاد عشتنا والأسد بيحب الغزالة والفيل مصاحب النعامة. ومحدش بيضايق حد ولا حتى ذكر بيغلس على أنثى ولا يبصلها بصة وحشة. ده حتى الذئب هرب من ليلى واتخنق منها.

وهى ديه حكايتنا، حكاية حيوانات غابتنا.

قائمة ال30

فاضل 27 يوم وأجفّل العقد ال30 من عمري!!!! كبرتي يا نعامة ودخلتي عالم ال30. ياخوفي يا بدران من ال30 وتوابعها. المهم ننسى توابعها ونفكر فيها نفسها.
رقم برضو بس مش هكتب عن هذا الرقم غير لما أوصله، لسه فاضل كام يوم، ألحق استمتع بالعشرينات.

فيه حاجات كان نفسي أخلصها وأعملها قبل م أتم ال30 من عمري وعند قائمة منسدلة بالحاجات ديه.
نرجع للقائمة بتاعتي، الحقيقة مش فاكرة فيها حاجة، هاهاهاها مش عارفة ايه اللي حصل لي. كان فيها على ما أتذكر:

1-اشتري عربية (هع جبت واحدة من زمان)
2- أحوش فلوس واسافر رحلة طويلة (سافرت، بس رحلات قصيرة ومحوتش حاجة وعندي ديون)
3- أروح نيبال (ولا شكلي ههوب ناحيتها)
4- اتسلق الهيمالايا وافرست (عمر سمرة عملها قبلي في افرست وشكلي برضو ولا ههوب ناحيتهم)
5-أسافر أسبانيا لزيارة صديق عزيز (قريب إن شاء الله)
6- أحلق شعري زلبطة (لما طول رجعت في كلامي)
7- أخلص رسالة الماجيستير (هع)
8- أشتري حاسوب محمول (اشتريت واحد هايل ومبسوطة به)

مش فاكرة بقى بقية القائمة، هزود الباقي لما أفتكر.

عندي برضو فكرتين عشان احتفل بعيد ميلادي ال30، أصلي بحب الأحتفالات والمفاجآت كمان، بس لسه موصلتش لفكرة وكمان حالة الغابة وكل الأحداث السريعة المتتالية إللي بتحصل بسرعة أوي ومش بتلحق الحيوانات انها تفوق منها لا تشجع اطلاقا على الأحتفال.

كل سنة وأنتم يا أهل الغابة الكرام طيبين.

كمالة من عند أبوطارق

هزوّد كمان أمنيتين ملهمش علاقة بال30 بس هما أمنيتين بتوعي وخلاص:
1- أحضر حفلة ل بينك فلويد وده برضو من عاشر المستحيلات
2- أحضر حفلة لفيروز وأتمنى يحدث قبل م أتم ال70 من عمري وربنا يديها الصحة والنشاط والحيوية

أخيرا ربطت الشبه

من أول يوم قابلت فيه مصطفى حسين وأنا بشبه عليه ومش عارفة هو شبه مين أعرفه. لحد امبارح بالصدفة بتفرج على أو تي برنامج عن البورصة المصرية، وكان ضيف البرنامج ماجد شوقي رئيس بورصتي القاهرة والأسكندرية. قلت بس عرفت مصطفى شبه من، ياااااااه أتاري أنا في مخي بشبه عليه وأنا مش واخدة بالي.

أول مرة تقابلت مع ماجد شوقي كان في كلية الأقتصاد والعلوم السياسية في أواخر تسعينيات القرن الماضي، كنت بدرس الأقتصاد وكان فيه محاكاة للبورصة المصرية، كان الأستاذ ماجد من المحاضرين. الحقيقة أُعجبت جدا بطريقة شرحه للبورصة ولقيت ان طريقة تفكيره كويسة وكمان بيفهم. وتخرجت من الجامعة ونسيته.

بعد سنين قابلت مصطفى حسين مش فاكرة امتى ولكن في بدايات القرن الحالي ومش فاكرة فين. لقيته بيدرس الطب النفسي وكان فيه حوار مشترك بيننا عشان أمي كمان طبيبة نفسية. وكمان تقابلنا اتقابلنا في معرض الكتاب في سنة من السنين ومن ساعة م قابلته وانا بشبه عليه.

ألوان

دايما أصف الناس وأيام الأسبوع بالألوان.

مثلا يوم السبت لَبَني وتخين كده. يوم الخميس كحلي (ممكن عشان الخروج بيكون بالليل). يوم الأربعاء أحمر (أنا بحب اللون الأحمر بس مش بحب يوم الأربعاء!) يوم الاتنين موف كده أو لون ملخبط، يوم الأحد أزرق على رمادي، يوم الثلاثاء رمادي أمّا يوم الجمعة بقى ف لونه أصفر أو حاجة منورة كده.

الناس بقى مش عارفة ليه لهم صفة الألوان، بس عندي صديق شفاف ملوش لون مش عارفة ليه، وصديق تاني بني زي القرد القرود. أما الغزالة ف لونها أخضر، أنا بقى لوني أحمر (هاهاها)، ولما بقابل حد لأول مرة ألاقيه داخل عليا باللون بتاعه ويفضل معاه على طول، زي الأنطباع الأول بالظبط. بس ده ملوش دعوة بحكمي على الشخصية ديه حاجة بيني وبين نفسي.

أمل وعمر

درسنا في سنة أولى ابتدائي كتاب أمل وعمر واستمرت دراسة حياة أمل وعمر وبقية الأقارب لسنة ثانية ابتدائي أو ثالثة مش فاكرة الحقيقة. وكنت بعيش بقى مع أمل وعمر وسعاد وفريد قرايبهم إللي بييجوا يزوروهم في الأجازة.



وكان فيه درس عن ساعي البريد:

"افتح الباب فريد،انه عمي سعيد، انه ساعي البريد، انه جاء إلينا ....مرحبا عمي سعيد"

مش فاكرة البقية.

ودرس عن البطة إللي فوق الشجرة، هاهاها



وديه شوية صفحات من الكتاب إللي اختفى من مناهج التعليم في مرحلة التعليم الأساسي. ويُعتبر هذا الكتاب ثروة علمية ونادر الوجود الأن وإللي لسه عنده ومحتفظ به هيكوّن ثروة مع الزمن.

صباح البطيخ

قريت هنا ان البطيخ مفيد جدا للبتنجان..وعلى رأي المثل "إذا أسمكتم ف ابطخوا".

الحنة

هو نبات جذوره حمراء، أخشابه تستخدم لصبغ الشعر باللون الأحمر وللرسم على الجسم.

وفن نقش الحنة ده حكاية لوحده، ساعات بيخلطوا الحنة بالصبغة عشان تثبت على الجسم، بس ده بيسبب التهاب للبشرة الحساسة، وفي أحيان تانية بيستخدموا الحنة الخالصة.

تحتفل العروس قبل ليلة الزفاف بليلة الحنة، عادة كانت قبل الفرح بليلة واحدة، ولكن مع المجهود المبذول في هذه الليلة المفترجة جرت العادة على ان تكون ليلة الحنة قبل الزفاف بليلتين أو بفترة عشان العروس تستريح وتستعيد لياقتها.



وفي ليلة الحنة تضاء الأنوار وتعلق الزينة وتتبخر الملابس ويبقى منها القليل الخفيف الهفهاف ويعلو صوت الموسيقى لتتمايل الاجسام والعيدان النحيفة والممتلئة منها. واديها رقص طول الليل وتظهر المواهب المدفونة عند البنات والسيدات الحاضرات. ومعروف ان الليلة ديه مخصصة لصديقات العروس وأقاربها من الجنس اللطيف فقط، وبالتالي الأب ولو كان لها أخ بيتسربوا برة البيت عشان المعزومات يأخذن راحتهن.

كان زمان ليلة الحنة تييجي فيها سيدة سودانية ترسم للبنات والسيدات والعروس طبعا، وتقوم الصديقات بأحياء الليلة. بعد كده تطورت الليلة، بقى فيه فرقة تقوم باحياء الليلة مكونة من دي جي بنت طبعا وسيدة رسم الحنة وبنتين أو بنت واحدة لزوم الأستعراض وتكون الليلة مكونة من فقرات. تقوم بنتين الاستعراض بمساعدة العروس على تغيير الملابس، مرة تلبس توب سوداني وترقص ومعاها المساعدات (لو محتاجة مساعدة طبعا فيه مش محتاجين خالص) ومرة تلبس بدلة رقص شرقي، وفقرة لجلابية تحية كاريوكا وهكذا. وفي نفس الوقت بتكون سيدة الحنة بترسم للموجودات. وتفضل البنات ترقص لحد م رجليهم تفأفأ.



وتختلف أماكن الرسم من بنت للتانية، فيه بيرسموا على الكف، وفيه بيرسموا على العرقوب، على الدراع، على الصدر، على الظهر، على الكتف، وأي منطقة في الجسم ممكن يترسم عليها.



ليلتكم فل

راس العمل

مكنتش هكتب عن هذه التجربة ولكن الأرنوب قال لي طب ليه متكتبيش، ف هاحكي عن الكعب ومغامراته.
من الأوراق المطلوبة للالتحاق بوظيفة جديدة "كعب العمل"، مش فاهمة هما ليه سموه كعب العمل مع ان الواحد بيكون لسه في البداية، ليه مايكونش راس العمل. المهم كعب العمل ده ورقة رفيعة طويلة كده فيها بيانات الملتحق بالوظيفة.
بما إني اشتغلت تاني وبالتالي لازم اعمل كعب عمل جديد، المرة ديه سهلة بقى أنا بقيت خبيرة في مكاتب العمل ومش هياخد مني وقت. طيب أروح الصبح بدري قبل الشغل، كنت هناك الساعة 8 ونص الصبح، الموظفة لسه بتفتح الباب.
صباح الخير، لو سمحتِ أنا عايزة أعمل كعب عمل.
مش هنا، في مكتب العمل.
معلش أومال أنا فين؟
أيوة، ده مكتب عمل بس الكعوب مش بتطلع من هنا. عارفة محطة اوتوبيس 166 هو هناك عمارة لونها احمر.
أخد بعضي وانطلق ع المنطقة إللي هى قالتلي عليها، وإللي أنا أصلا ماعرفهاش..ألف وأدور حولين نفسي، وأدخل في مجاهل البساتين. الشارع ضيق ومكسر، وماشي فيه ناس وعربيات واوتوبيسات ومايكروباصات وميني باصات وعجل وكل وسائل الأنتقال إللي عرفتها في حياتي.
طبعا اتخنقت و استفزيت ف أخدت بعضي ورحت ع الشغل.

يوم أجازة قررت أقضيه مع الموظفات في مكتب العمل، ألف وأدور من الأول في المنطقة، وسبحان الله تظهر العمارة الحمراء بقدرة قادر وتنور في الشارع الضيق ده. أدخل الشقة (مكتب القوى العاملة).
صباح الخير، عايزة أعمل كعب عمل لو سمحت.
ملحوظة: الجو حر والشقة خنقة والموظفة منقبة والدنيا زحمة عليها.
معاك صورة المؤهل؟
ماهو موجود ع الرقم القومي.
لازم المؤهل.
حضرتك، ماهو موجود ع الرقم القومي، والموظف إللي اصدر الرقم اطلع على المؤهل وأخد منه صورة.
أنا هدخله ع الكمبيوتر.
ماهو لو حضرتك كتبت رقمي القومي هيطلعلك اسمي وصورتي وكمان المؤهل.
لازم صورة المؤهل.
هو حضرتك بتجمعي ورق وخلاص؟
أيوة.
طب مع السلامة.
ومشيت أجرجر في رجليا وأنا محروق دمي.

كلاكيت تالت مرة.
يوم تالت عشان الكعب. معايا كل حاجة ممكن يسألوا عنها. وكمان الورق جوة ملف جديد.
صباح الخير، لو سمحت عايزة أعمل كعب عمل.
مليتي الأستمارة؟
أيوة، اتفضلي وصورة البطاقة وصورة المؤهل.
يا دينا طلعي الورق من الملف
الحق عليا أنا غلطانة عشان حطيت الورق في ملف المرة الجاية هجيبه كده.

واخدت الورق وبدأت تكتب في الكعب كل البيانات إللي انا كتباها في الاستمارة ومشفتش ولا البطاقة ولا صورة المؤهل. طب م كان من الأول أكتب أنا البيانات في كعب العمل وهى تمضي وتختم ونخلص.

وأخيرا زفت وطلع كعبي وكوعي وصباع رجلي.

ايه اللي جوة الشنطة

زمان كنت باشيل شنط حسب المناسبة وحسب لون اللبس أو الجزمة وحسب المكان طبعا. ولو فتحت شنطتي تلاقي فيها:
-المحفظة (إللي كان فيها كل صور الأصدقاء تقريبا وكل الكروت إللي موجودة في العالم بتاعي وأي ورقة ممكن نتخيلها وطبعا كارنيه النادي وكارنيه الجامعة وفلوس (على أدّي) والبطاقة
-مراية صغيرة (بتتفتح وكان فيها كمان مشط أحمر جميل)
-روج أو ملمع للشفايف
-كريم مرطب
-برفان
-مناديل ورقية
-قلم
-ميداليات مفاتيح (مفاتيح أبواب العالم كله)
ولما ظهر التليفون المحمول كان بيكون جوة كمان.

ولما كبرت شوبة أضفت نوتة للشنطة، والمفاتيح قلت شوبة وبقت ميدالية واحدة بس على شكل هيكل سمكة وكمان المحفظة طلع منها الصور عشان 3/4 الناس اللي في الصور اختفوا من حياتي. طبعا زادت الكروت والكارنيهات.

ولما كبرت اكتر، هيكل السمكة اتكسر والميدالية بقت واحدة بس، والمفاتيح هى مفاتيح البيت ومفاتيح العربية وكفاية أوي كده. والروج هرب وملمع الشفايف أصبح وحيد، أما الكريم المرطب بقى مكانه تابلوه العربية ومعاه المناديل الورقية والقلم.

ولما كبرت تاني، مبقاش في شنطة لي أصلا عشان بقيت باشيل شنطة السيس وفيها محفظتي (إللي حجمها كبر وتضخم جدا) ومفاتيحي والموبايل وخلاص.

بسبوسة - ننوسة

هى: بتحبني؟
هو: أيوة يا ننوسة.
هى: طب أد إيه؟
هو: أد البسبوسة.
هى: متحبنيش بالشكل ده.
هو: مبحبكيش بالشكل ده.
هى: أهو قاللي مش بيحبني، يا ناس يخلصكوم كده؟*

ـــــــــــــــــــــــــــــــــــــــ
*أشعار صلاح جاهين