* ملحوظة؛ النعامة راجعة تهسس عن حاجات مش بتاعتها.
"وداعاً ايها الغريب.... كانت اقامتك قصيرة، لكنها كانت رائعة."
اقتبست الجملة دي من تسجيل صديق لكتاب. كنت بسمعه النهاردة في العربية، بس المرة دي سمعته بتركيز، ركزت في كل كلمة ومعناها. صوته بيعجبني، اول ما قال وداعاً تأثرت، وجه في دماغي اكتب. سألت نفسي ليه متأثرة؟ معرفتش ارد. مش عايزة اعيد وازيد في نفس الكلام عشان خلاص بجد صفحة وخلصت في حياتي.
زعلانة؟ اه. متضايقة؟ جداً. بس هتعدي زي غيرها. المرة دي اكتر حاجة مضايقاني، اني معملتش حاجة، والقرار اتاخد واتنقل لي في رسالة! وده كان غريب جداً بالنسبة لي. ليه؟ بدون مناقشة، بدون حوار، بدون اي حاجة كده، يتاخد قرار وانا طرف فيه وبعرفه بعديها بفترة. وخلال الفترة دي المعاملة كانت غريبة.
مقدرتش اتقبل الوضع في الاول ورد فعلي كان غريب برضو.
الضغط والزن عشان اعرف في ايه وعدم تقبل الواقع، كل ده رد فعلي. مكنتش بفكر، اللي حساه كنت بعمله. والدنيا تبوظ اكتر واكتر. وفعلاً باظت خالص وحصلت حاجة غريبة، خناقة من طرف واحد. بس خناقة بجد. ومعرفش ازاي مسكت نفسي ومردتش! سبحان الله، بس كويس عشان، الغريب يطلع كل الغضب اللي جواه. بركااااان وانفجر. وتقبلت الموقف ومزعلتش، انا بس اتخضيت.
المؤلم بقى بالنسبة ليا، اني مش فاهمة الغريب. يا ترى هو فعلاً جامد وبالنسبة له عادي؟ يا ترى حاسس بيا؟ يا ترى مبسوط؟ ارجع بالذاكرة شوية، مش كتير اوي، وافتكر ان كان دايماً في وقت ممكن نتكلم، بس دلوقت لازم ابعت اسأل الاول، هل الوقت مناسب؟ كان لازم نتقابل، بس دلوقت مفيش حاجة اسمها لازم اصلاً، ونتقابل ليه؟ نخرج زي ما اي صحاب بيخرجوا. عادي يعني هو لازم يكون في حاجة عشان الناس تخرج مع بعض؟ احاول بالاسابيع وساعات بالشهر اظبط اي حاجة، بس دايماً الرد متوقع ومعروف، اي ظرف يحصل فجأة او مش موجود في المنطقة دي او عندي حاجة تبع الشغل وهكذا.. مقلتش حاجة ومش هقول، ومش بكدبه، عشان اكيد فعلاً بيكون في حاجة، ولكن لو الدنيا ماشية عادي مكنتش هفكر، بس كتر الاعذار وكمان الدنيا مش متظبطة اوي بيخللي الواحد كده يحس بحاجة مش لطيفة. يحس؟!! يا نهاري ده انا بجد غبية، هل ممكن بيتقالي يعني بالمستخبي ابعدي بقى؟ فعلاً؟ ده يبقى غبائي فاق الحدود. بس لا لا، هو قاللي هيقولي في وشي. هو انت ايه؟ لازم يعني تتكبسي ويتقالك في وشك مش عايز اشوفك ولا اعرفك تاني؟ خللي عندك شوية احساس وابعدي انت. طب ما انا اصلاً بعيدة!! وبعدين اقول، طب افرض مثلاً حب واحدة، ممكن صحوبيتنا تضايقها؟ متتقبلش ان حبيبها يكون عنده صديقة بنت، ممكن طبعاً وحصل قبل كده. طب ما يقولي عادي يعني.
برضو لما افتكر زمان اللي مش من بعيد اوي، الغريب كان بيحكيلي حاجات عنه وعن شغله وكان بيتكلم كتير، دلوقت ششششششششش مفيش وانا اللي بحكي وده غريب. عشان معاه انا مكنتش بتكلم، كنت بحب اسمع بس، وده مش انا، انا رغاية جداً وزي ما هو قاللي مرة، انت مش بتسمعي غير نفسك بس :-( زعلت ساعتها بس ممكن هو صح، معرفش.
مبحبش اسيب صحابي، مبحبش ابعد عن حد ولا حد يبعد عني، عشان كده بخاف من الموت. بخاف حبايبي يسيبوني وافضل عايشة على ذكراهم ومعرفش ارجعهم تاني :-(
بحاول اقول كل حاجة انا عايزاها عشان لو حصل حاجة مفضلش اقول يا ريتني قلت كل اللي انا عايزاه، بحاول اعمل كل حاجة انا عايزاها عشان نفس السبب.
انا والغريب مختلفين مش زي بعض، معرفش ازاي انجذبنا لبعض، حببني في شكلي (مكنتش بحب شكلي، مع ان كان في ناس بتقولي شكلي حلو)، كنت بحب لما يقولي شكلك حلو او ضحكتك حلوة. معرفش ده كان بجد ولا سحر اللحظة؟ ممكن كان حاسس كده وقتها، معرفش.
الغريب بقى اني حكيتله حكايات كتيرة، انا كل ما افتكر اني حكيت كده، اللي مش كل الناس تعرف تفاصيله، ابلم!!! حكيت كل حاجة، حتى الاحلام اللي كنت بحلمها. ده كان في الصيف، انا فاكرة، كان من احلى الصيفيات اللي عدت عليا، مش عشان الغريب بس، ولكن الاحداث كانت كتيرة ومثيرة.
مع الغريب كنت بعيش شخصية تانية خالص، وقلتله الكلام ده، انا مكنتش بخبي حاجة، وده كنت بحبه ومازلت بحبه في علاقاتي مع اصحابي، بحب اقول كل حاجة بصراحة، في ناس بتتقبل وناس لأ، بس ده انا. ومرة قريت كلمة غلط "براحتك"...معرفش كنت نايمة ولا ايه مش فاكرة، قريتها "بحبك"... مفهمتش، ومعلقتش بس بعد كده ضحكت وقلتله والغريب انه كمان ضحك، ومن ساعتها بقت "براحتك" هى كلمة السر. واتكلمنا في مواضيع كتيرة واول مرة خرجنا مع بعض حكالي عن حياته وتفاصيلها، مع ان دلوقت اللي المفروض اننا بقالنا مدة نعرف بعض، مبقاش يحكي حاجة.
ده اللي مضايقني بجد، ليه مبقتش زي الاول؟! ليه؟ حصلت حاجة؟ اه حصل، بس خلاص عرفنا ان مش هينفع تحصل تاني. وشرحت مبدئي، انا لو عملت حاجة وكنت ساعتها مبسوطة مش هتضايق ولا هندم عليها، خلاص بقى عديها.
بس للأسف، هى دي الحاجة اللي واقفة بينا، صح؟
انت مش قادر تنسى؟ ليه؟ طيب طريقتك دي في معاملتك ليا عشان ايه؟ عايزني ابعد حاضر هبعد. بس انا مش عايزة، انا اقدر، بس ده معناه اني هختفي كتير اوي، وممكن ابقى اظهر وممكن لأ. بجد أثرت فيا ومش عايزة امشي واسيبك. ابتديت افكر في الهجرة، ده حل؟ لأ، ده هروب. عارف لو فهمتني انت ليه كده معايا هرتاح وهعرف آخد قرار سليم، بدل الهبل اللي انا بعمله ده.
ليه منبقاش صحاب؟ انا سألتك قبل كده، انت عندك صحاب بنات قلتلي اه، طيب ليه مكونش زيهم؟ بحبك وانت رايق وبتكلمني زي زمان، اقول الحمد لله الحاجات الغريبة راحت، بس للأسف بتبقى حالة لحظية وترجع تاني للحالة الغريبة.
بجد بجد نفسي نفضل صحاب قريبين تحكيلي واحكيلك ونغلس على بعض، بدل ما اقول "وداعاً أيها الغريب" في يوم من الايام.
