حوار

دخل عليه فجأة: ياللا تعالى معايا، وقتك دلوقتي.
- أرجوك سيبني شوية، أنا لسه مش مستعد دلوقتي خالص.
- لأ، أنا عندي أوامر، لازم تيجي دلوقتي.
- إزاي؟! انا كنت بادعي على طول ان ربنا يديني علامات منها أفهم انك هاتيجي قريب.
- يعني عايز ايه؟
- سيبني شوية.
- كام يوم؟ ولاّ أسبوع؟ ولاّ شهر؟ طب هتعمل فيهم ايه؟ هتغير حاجة؟! أشك.
- مش عارف، ممكن برضُه.
- انت مافهمتش العلامات؟
- لأ، أنا ماخدتش بالي، الدنيا أخدتني.
- ضهرك انحنى؟
- أيوه.
- شعرك شاب؟
- أيوه.
- بقيت تمشي بعصيان؟
- أيوه صحيح.
- عايز ايه أكتر من كده اشارات أو علامات؟!

مستوحاة من قصص الأنبياء