الست نعامة: الأحلام...

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

الأحلام...

هنا مكتوب حاجة فكرتني بكلام كنت باتكلم فيه مع نفسي من فترة.

هل ممكن اتنين يتقابلوا في الحلم قبل ما يتقابلوا في الحقيقة، وبعد فترة يشوفوا بعض صدفة ويفضلوا يفكروا "انا شوفتك فين قبل كده" ويفكروا ويفكروا ومافيش فايدة.

طب ممكن اتنين يحلموا نفس الحلم في نفس الوقت مع انهم بعاد عن بعض؟ ارواحهم بتتقابل في الفضاء وبيقضوا مع بعض أحلى الأوقات. ويا سلام لو حكوا لبعض عن الحلم وتكون المفاجأة "ايه ده انا كمان حلمت كده".

وكمان حلم جوه حلم، اتنين اتقابلوا في الحلم، وكانوا عارفين بعض، وبيتكلموا عن انهم شافوا بعض قبل كده (برضو جوه الحلم).

حلمت هى بحبيبها، قاعدين في قصر ملك روماني، وكانوا بيحتفلوا بالنصر. بعض من أصدقائهم المقربين كانوا معاهم وناس تانية غريبة. بس كل ده مش مهم، أهم حاجة انهم قاعدين مع بعض وبيتكلموا عن أول مرة اتقابلوا فيها. ومش حاسّين ايه اللي بيحصل، غناء وموسيقى وشرب وفرح وناس بتضحك وناس بترقص.
هما نايمين على سرير حرير وحواليهم الستائر الهفهافة. ومرة واحدة يدخل الجيش المنتصر ويحكي عن المغامرات في القرى الغريبة، وكيف حدث الانتصار.

وتصحى من النوم، تحكي له عن حلمها، يا ترى ديه الجنة اللي اتقابلنا فيها قبل ما نشوف بعض.
 11:38 أرسليها بالبريد  
هسهسات:
بتحصل في احسن العائلات
و مع احسن الابالسة

:-(
# هسهسة Blogger أحمد : 17/10/05 16:49  
"هل ممكن اتنين يتقابلوا في الحلم قبل ما يتقابلوا في الحقيقة"

أنا دى حصلتلى قبل كدة، كان عندى ميعاد مهم و كنت متوترة حبتين، و حلمت بالست اللى قابلتها تانى يوم و أنا كنت ما أعرفش شكلها أصلاُ
طبعاً أنا لما وقفت قدامها و إفتكرت أنها هية هية اللى شفتها فى الحلم، إتثبت من الخضًة
بس دى كدة تعتبر من طرف واحد طبعاً
# هسهسة Blogger Eman M : 17/10/05 19:17  
أنتى باين عليكى رايقة و ظريفة..:)التدوينة اضحكتنى . انا كل ما حد يشوفنى يقوللى " هو أنا شفتك فين قبل كدة؟"..بقى عندى إقتناع ان انا شخصية عامة فى حياتى الأخرى
من أسبوعين اتعرفت على واحد استرالى..بيقوللى انه شافنى قبل كدة ؟:) بس مش فاكر فين..هاها, الكارثة إن انا كمان باشبه عليه .و حاجات من النوع دا كتييييييي,
Deja Vu ..!!!!!!
ظاهرة معروفة بتحصل بشكل
متكرر للناس اصحاب البركة و الكرامــات..هاها..حاسبى يعنى
# هسهسة Anonymous غير معرف : 18/10/05 03:00  
ظاهرة ال deja vu دي حصلتلي كظا مرة قبل كدة بس فيها بتكرر الموقف كله إلي في الحلم بالناس والكلام مرة تانية في الحقيقة حتى لو الناس الواحد ماشفهومش قبل كده.
غريبة أوي سبحان الله
# هسهسة Blogger لولفين : 19/10/05 14:28  
على أشكالها تقع
من الذاكرة