الحب وسنينه

خرجوا مع بعض واتبسطوا، الأمسية كانت لطيفة، مع ان الجو حر شوية بس مش مشكلة، احنا مع بعض مبسوطين والناس حوالينا دمهم خفيف، ومرة واحدة يتقلب كل ده، وتبلّم وهو كمان يبلّم، ويجلسوا ساكتين، مافيش حوار، طب أحسن نمشي بقى، ليه نقعد مع بعض واحنا ساكتين؟ ممكن الواحد يكون ساكت بس مبسوط، مش لازم نتكلم على طول، طيب أسألك هو بنك الكلام خلص؟ مايردّش.
تروّح، وهى مش مبسوطة، الليلة اتقلبت في الآخر، على غير ما كانت متوقعة، قررت ما تتكلمش، قررت ماتبعتش إيميل (بريد الكتروني)، هاها على مين مش هاتقدري، لأ هاقدر وهامسك نفسي، عشان أنا عارفاه، هو مش هيتكلم، ولا حتى هايفكر إن فيه حاجة مش طبيعية، عادي يعني، انت اللي مشيتي، حتى من غير ماتقوليلي إنك ماشية أصلاً، خلاص براحتك.
اليوم خلص، ولكن النهاية ماكنتش من أسعد النهايات، وفي الصباح، فضلت ماسكة نفسها، ولكن بعد فترة نسيت اللي حصل امبارح، وكتبت إيميل، وبعتته.
ونرجع ونقول الحب وسنينه :-)