استقلال القضاء حق كل المصريين

الست نعامة: همّ وانزاح

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

همّ وانزاح

يا سلام، أخيرًا رميتها في وشهم.
مارتاحتش قوي، بس برضو همّ وانزاح.

كنت مترددة شوية، اكتبها ازاي واقدمها لمين؛ بما إني ماعنديش مدير والحكاية سلطة شوية؟
ومرة واحدة اتخذت القرار وكتبت الاستقالة ويالا.

ألف مبروك.
 14:48 أرسليها بالبريد  
هسهسات:
انا مش باكتب ورق مادام مامضيتش على ورق لما اشتغلت!

بادخل زى الملك للمدير اقول له انا عايز اسيب الشغل و اخرى معاك يوم كذا او اخرى معاك لما اخلص اللى تحت ايدى
لقيتوا بديل او لا مش شغلى!!!

اهلا بيكى فى حلف اصحاب الاطيان :-)
# هسهسة Anonymous Mohammed Sameer : 8/11/05 23:13  
بس انا مضيت على عقد لمّا اشتغلت وبالتالي لازم امضي على استقالة لمّا اسيبهم. وكمان التزام علي أخلص شوية شغل كده ع الماشي واقولهم الخطة القادمة ايه :-(
استنزاف.
# هسهسة Blogger الست نعامة : 9/11/05 11:20  
ألف مبروك بجد.
بتفكريني لما استقلت من أول شغلانة اشتغلتها وفضلت محبوس فيها 4 سنوات متواصلة.
تقديم الاستقالة يساوي إحساس عجيب بالخلاص.
حتى لو كانت الشغلانة اللي الواحد بيشتغلها حلوة، برضه تركها ليه لذة غريبة. خصوصا لما تمشي وتسيبهم محتاسين!!
# هسهسة Blogger ميشيل حنا : 9/11/05 14:59  
أيوة فعًلا احساس عجيب جدًا. أنا استقلت قبل كده مرتين يعني مش جديدة عليا بس المرة ديه كان احساس الخلاااااااااص قوي جدًا.
والمفاجأة كمان ان زميلة لي استقالت في نفس الوقت الحوسة بقى قوية جدًا، يا عيني صعبانيني عليا.
# هسهسة Blogger الست نعامة : 9/11/05 16:42  
انا أول مرة استقلت سبت المكتب اللي كنت فيه من غير ما اقولهم ، و لما اتصلوا بيا ماردتش
تاني مرة دخلت لمدير الشكرة و اتخانقت معاه خناقة لرب السما ، كان ناقص نضرب بعض ، و بعد وصلة من الشتيمة المعتبرة اخدت بعضي و مشيت
تالت مرة مشيت بطريقة محترة شوية ، دخلت لصاحب الشركة و كلمته بهدوء و هو تقبل الموضوع بهدوء
و يا رب تكون اخر مرة ، انا دلوقتي حر و شغال لوحدي من غير ريس ولا نيلة و يا رب ما ترجع ايام الوظيفة تاني
طيب وانتي بتعملي ايه دلوقتي؟ لقيتي حاجة تانية؟ لو عايزة ممكن اساعدك ، بس قوليلي انتي عايزة تشتغلي ايه و انا احاول اساعدك
# هسهسة Blogger SPRING : 10/11/05 01:28  
شكرًا يا سبرنج :-)
انت بقى بتعمل ايه ممكن اشتغل معاك؟ والله مش باهزر.

ابعتلي على الايميل لو سمحت.
# هسهسة Blogger الست نعامة : 10/11/05 12:23  
ألف مبروك يا نعومة
عقبالي يا رب بقى
# هسهسة Blogger Shamoussa : 10/11/05 13:27  
فرحنالك قوي يا ست :)
أتمنى تنبسطي في شغلك القادم، و برضو تستقيلي منه لما تزهقي.، و تروحي للأحسن منه.
# هسهسة Anonymous ألِف : 10/11/05 15:37  
الله يبارك فيكم كلكم :-)

يااه ده الشغل مسبب ارق للكل، طب ليه بنخنق نفسنا، انا مش عارفة. ياللا خير.
# هسهسة Blogger الست نعامة : 10/11/05 17:15  
انتي نسيتي تكتب الميل بتاعك
و ماعرفتش اجيبه من فين لأنه موش موجود في البروفايل
لو عايزه تبعتيلي الميل بتاعي اهو
SPRING456 at YAHOO.COM
SPRING1478932 at HOTMAIL.COM
مستني ردك
# هسهسة Blogger SPRING : 10/11/05 20:05  
مبروك بجد
دي علامة أن قيد الشغل مش بيقيدك من جوه
علامة حياة... علامة رجاء
# هسهسة Blogger African Doctor : 11/11/05 17:46  
الناس بتباركلك كأنها مناسبة سعيدة :)
ممممم .. هوة الحقيقة لو الواحد فعلاً كاره شغله كدة، بيبقى زى المحبوس فى قمقم
و إنتى دلوقتى أخدتى حريتك
يبقى مبروك عليكى "حريتك"
# هسهسة Blogger Eman M : 11/11/05 17:58  
خسارة، كل مرة بعدي جنب شغلك كنت أعدي جنب شغلك (المعهد المعرفش إيه للشرق الأدنى) كنت أتخيل إني هاشوفك
وطبعاً أنا معرفكيش فأتخيل إني أروح لواحدة ماشية في حالها أقولها "سيادتك الست نعامة؟؟"

عموماً مش مبروك على الإستقالة لكن ألف مبروك إنك مستريحة
# هسهسة Blogger Ensan Kadim : 21/11/05 23:31  
يعني عرفت مكان المعهد، طب ليه مش بتيجي تسلم عليا؟ وبعدين هو اسمه "معهد الشئون الثقافية -الشرق الأوسط وشمال أفريقيا" مالهاش دعوة بالشرق الأدنى.
المهم تعالي واسأل على دينا في تنمية الموارد.
# هسهسة Blogger الست نعامة : 22/11/05 11:24  
على أشكالها تقع
من الذاكرة