استقلال القضاء حق كل المصريين

الست نعامة: جهابزة المنشية

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

جهابزة المنشية

ويقولوا الناس ليه مش بتفهم الصبح، واكلين فول ولاّ ايه. ظالمين الفول، ماله الفول، أكلة شوعبية بتملى البطون لحد تاني يوم وممكن أكتر من يوم كمان لو تقلنا شوية. ماعلينا مش موضوعي النهاردة. كنت باتكلم على الناس اللي مش بتفهم الصبح، طبعاً لازم ماتفهمش حاجة، لماّ انزل الشارع الساعة واحدة بعد منتصف الليل، والاقي الدنيا زحمة كأنها الساعة ثلاثة العصر، وتفضل البلد صاحية لحد تاني يوم، طب بالذمة هاتفهم ازاي بقى ولاّ العيال يجمعوا اللي المدرس بيقولوا ازاي؟

ارجع للعنوان اللي كتبته مش عارفة ليه، اتكلمت من شهر عن منشاة ناصر والحاجات الموجودة هناك، دلوقتي ممكن أكمل واتكلم شوية عن الناس اللي ساكنين في المنطقة الجميلة ديه. بنعمل اليومين دول بحث سريع بالمشاركة هناك عشان نحدد أولويات واحتياجات المجتمع. وخلال اجراء البحث، اكتشفنا ان اللي يقدر يسكن هناك لازم يكون شخصية زكية جداً ومحنك وجهبز زمانه عشان يعرف يتأقلم على المنطقة واسلوب الحياة هناك. ظروف المعيشة صعبة، والناس هناك كمان معاملتهم صعبة جداً، حتى لو مين صعب جداً انهم يأمنوا له بسهولة كده. والملاحظ بقى هو تأثرهم بالأحزاب، وتواجهنا الأن بعض المشاكل بسبب الأحزاب وخصوصاً الحزب الوطني. هانشوف ايه اللي هايحصل وهل سنستمر أم يؤجل البحث بعد الانتخابات أم يلغى خالص؟!
استدراك
اتأجل البحث لبعد الأنتخابات بناءً على رغبة الجماهير!!!! عشان يلحقوا يملوا الكشوف. "احنا معاكم بس برضو الحزب عايزنا فاحنا الأسبوع ده مش هانكون فاضيين".
 15:51 أرسليها بالبريد  
هسهسات:
هل منشية ناصر ممكن تعد منطقة "عشوائية" ؟
أنا بس لفت نظري موضوع الحزب الوطني الزفت ده

كان لي تجربة قصيرة جدا للأسف في منطقة عشوائية
لفت نظري في المنطقة دي حرص الحزب الوطني ان الناس دول اللي مش عايشين أساسا و غالبيتهم الساحقة أميين يبقوا أعضاء فيه او على الاقل عندهم بطاقات انتخابية

الراجل و الست بتوع الحزب الوطني في المنطقة دي و اللي الناس كانت بتعاملهم على انهم انصاف آلهة بيوزعوا العطايا كانوا السبب في طردنا و منعنا من مواصلة نشاطنا في المنطقة دي

امتى يغوروا بقى...
# هسهسة Blogger Mohammed : 31/8/05 17:05  
أتمنى أن يمر البحث دون مشاكل من الأحزاب اللى الناس متأثره بيها خصوصا-وخلى بالك من خصوصا دى - الحزب الوطنى الديموقراطى
أما بخصوص الفول فانا شخصيا من المؤمنين بان الفول مظلوم معاناوهذا المعنى جسده أحد الشعراء لما قال
أيــوب يا فول أيــوب
ياصابر علىالخلايق وراضى بالمكتوب
أيــوووب يافول بزيتك
مهروووس.... ومين يغيتك؟؟
# هسهسة Blogger ايــــــــــــــــــوب : 2/9/05 06:02  
أكيد الحزب الوطني يحب أن يظهر كأنه وحده المهتم بشؤون الناس في الأماكن دي لأنه محتاج بطاقاتهم الانتاخبية ليستعملها في التصويت نيابة عنهم.

لذلك لن أستغرب أن يحارب الحزب متمثلا في أشخاصه المسؤولين في المناطق أي مجهودات للتنمية ما لم يكونوا طرفا مستفيدا فيها إما بالظهور على قفا التنمويين أو حتى بالهبش العلني من مخصصات برامج التنمية التي يعتبرونها مالا سائبا و حلالا لهم.
# هسهسة Anonymous ألِف : 3/9/05 16:22  
لامؤاخذه بأه .. الناس دى بتوع منشيه ناصر واخده حقها تالت ومتلت ..أنا بأه من سكان مدينه نصر والميه بتضعف من الساعه 2 الصبح لغايه الساعه 6 الصبح وتيجى تسأل يقوللك أصلهم بيودوا الميه الوقت ده لمنشيه ناصر ؟
طيب حد يقوللى أنا لما أصحى الساعه 3 الصبح من النوم وأروح الحمام .. أعمل بيبى إزاى ...!!؟؟
# هسهسة Blogger Ahmed Shokeir : 3/9/05 19:29  
انت عامل كرنيه الحزب الوطني؟
لأ ...ليه؟
انت عبيط يابني ده انت ممكن تطلع رحلة لاسكندرية اسبوع بعشرة جنيه بس!

ينم الحوار السابق عن مدى أهمية عضوية الحزب الوطني لفئة تجد من رفاهية غير متاحة حقيقة ماثلة بمجرد إصدار بطاقة عضوية لن تكلفهم أكثر من خمسة جنيهات وصورتان شخصيتان

نعامة

عند الحديث عن الذكاء المطلوب من ساكني المنشية استخدمتي عبارات مثل: يعرف يتأقلم، ظروف المعيشة صعبة، الناس معاملتهم صعبة جداً

اتساءل لماذا تبدين وكأن حديثك عمن يترك حياً راقيا ليعيش في المنشية؟

من رأيتهم هناك لم يروا حياة أخرى حتى يتأقلموا مع حياتهم تلك، ظروفهم المعيشية تلك هي أقصى ما استطاعوا الحصول علية طيلة حياتهم، الناس صعبة المعاملة هم أنفسهم من يحتاجون لظروف أفضل حتى تتحسن معاملتعم لبعضهم
# هسهسة Blogger المليجي : 7/9/05 00:29  
فهمتني غلط يا مليجي، انا مش قصدي أتعالى على سكان منشأة ناصر ولا حاجة، بالعكس انا باحييهم على قدرتهم على العيشة هناك في هذه المنطقة العشوائية. وبعدين همّ على فكرة كلهم مهاجرين من محافظات تانية مثل أسيوط وسوهاج والفيوم، وكمان من مناطق وأحياء أخرى، زيي الجمالية ومنطقة قايتباي التي تقع أمام منشأة ناصر على الناحية التانية من خط السكة الحديد. كنت باتكلم مع واحدة من الأهالي، هى كانت عايشة في قايتباي وعزلوا للمنشية، قالت لي: "منشية ناصر دي بيئة؛ انا بناتي مش ممكن أجوزهم من هنا ولا حتى الفرح هاعمله هنا، هو في أحسن من قايتباي." يعني همّ عارفين ان الحالة مش ولابد، انا بس كنت بانقل اللي شفته من غير أي آراء شخصية أو انطباعات.
# هسهسة Blogger الست نعامة : 7/9/05 10:17  
على أشكالها تقع
من الذاكرة