استقلال القضاء حق كل المصريين

الست نعامة: أبريل 2007

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

أنا باحب الرنجة

افتكرت حاجة قبل ماكتب التدوينة ديه؛ أغنية من تأليف عدوية شعبان عبد الرحيم على غرار أغنية العنب:

"فسخاني وباحب الرنجة
لا تقول لي لا موز ولا مانجة
بصراحة أنا عليه باغيير
بيسلك المناخير

هو إيه
البصل البصل البصل

أحمر أخضر
أحمر أخضر"

أرجع للتدوينة بتاعتي:

شم النسيم بالنسبة للقبيلة عندنا عيد نحتفل به، وله طقوسه طبعا زي كل عيد ما له طقوس. واحنا صغار لازم كنا نحط بصل أخضر تحت المخدة أو نعلقه على باب الأوضة ليلة شم النسيم عشان الشمامة(هى وحش بياكل الرجلين ليلة شم النسيم) متعرفش .تدخل الأوضة وتشم رجلينا
بس بطّلنا القصة ديه لما كبرنا، وكنا نشتري هدوم جديدة (برضو بطّلنا، غلب بقى)، وليلة شم النسيم بقى نلون البيض ونتباهى مين رسمه أحلى من التاني ونستنى الصبح عشان نتفرج ع البيض الملون وناكل الطعمية السخنة والخلطبيصة والترمس والفول وتتوج هذه المائدة الكبيرة الحاجة رنجة هانم كعب الغزال.
يا سلام ع الرنجة وجمال الرنجة..يا حلاوتها لما شويتها.
الله جعت أنا دلوقتي بقى..ننزل حتتك بتتك ع الرنجة والبصل الأخضر ونلعب لعبة البيض (نكسر البيض في رأس بعض). السنة ديه بقى أضافت عمتي ضيف للمائدة وهو الفطير..آآآه حدث انقلاب وهجوم زائد من القبيلة على المائدة بسبب الفطير الخطير.

وشوية ويهجم النعاس على أفراد القبيلة المتخمين بالمأكولات ولكن يلحقوهم بالشاي والذي منه، يفوقوا تاني ولا كأن حاجة حصلت ويفضل أفراد القبيلة يتكلموا ويحكوا الذكريات ويحكوا عن ناس انقرضوا في الأغلب من زمان.
وينتهي شم النسيم على خير.

ولاحظت أن يوم شم النسيم غالبا الجو بيكون هايل جدا..وديه حاجة ظريفة برضو..السنة ديه كان أحلى وأحلى شمس ساطعة ونسمة لطيفة فيها شعرة برودة كده تخبط في الواحد مع الرنجة والبصل تعمل عمايل.

نشوفكم السنة الجاية.

التسميات:

 14:25  2 هسهسات أرسليها بالبريد  

حرامية رجب

المشهد الأول
الست نعامة تذهب لمحل النضارات لأستلام النضارة الجديدة بتاعتها وتلبسها وتحط القديمة في جراب الجديدة وتمشي.

المشهد التاني
الست نعامة عايزة تشتري شوية حاجات من البقال الكبير إللي اسمه اولاد رجب، معها الكيس إللي فيه النضارة، تسلمه للأمانات وتاخد رقم وتدخل البقال الكبير وتتبضع.

المشهد الثالث
خرجت الست نعامة بعد م اشترت كل إللي عايزاه. تذهب بالرقم للأمانات لأستلام كيس النضارة. وكانت المفاجأة أن أن أن تشششش.

النعامة: اتفضل الرقم.
العامل: الدرج فاضي حضرتك.
النعامة: يعني ايه فاضي فين الحاجات بتاعتي؟
العامل: ماعرفش بس الدرج رقم 7 فاضي. حضرتك متأكدة انك سبتي الكيس هنا؟
النعامة: يعني انا جبت رقم من بتنا عشان اتبلى عليكم هنا يعني ولا إيه؟
العامل: هو الكيس كان فيه ايه؟ أكيد حد أخده بالغلط وهيرجعه بكرة.
النعامة: وياخده بالغلط ليه؟ وازاي يستلم الكيس وهو مش معاه الرقم أصلا؟
العامل: اصل فيه زباين بتقول الرقم ضاع مني.

يدور نقاش حاد حول الأمانة وانهم مشغلين قرآن طول النهار والليل وآيات قرآنية قبل الدخول والبضاعة المباعة لا ترد ولاتستبدل إلا بالوصل وحاجات من ديه . وبعدبن يتكلموا عن شخص مجهول سرق حاجة.

النعامة: هل هو الشخص إللي سرق الكيس بتاعي؟
العامل: لأ ده واحد تاني؛ أصل حضرتك هنا بيحصل حاجة؛ العمّال بيخبّوا مسروقات في أكياس ويخرجوا بها على انها بتاعة زباين، ودلوقتي حضرتك هتشوفي كمين لواحد من العمال.
النعامة: يا حلولي وبتقول لي الكلام ده دلوقتي وانا حاجاتي مسروقة..يعني انتم بتشغلوا عندكم حرامية بقى.
عامل آخر: بس حضرتك المفروض كنت تاخدي بالك من أخد منك الكيس.
النعامة: يا سلام، لأ طبعا. انا مش ملزمة إني أبحلق في الناس، أنا اديته الكيس وهو اداني رقم أعرف منين انه حرامي؟ ومن تاني اصلا بيقف هنا غيرك؟
العامل: ماحدش والله!!!
المدير يتدخل: هدّي نفسك حضرتك، حقك هيوصلك لحد عندك.

المشهد الرابع:
كمين للعامل الحرامي إللي سرق ملابس داخلية وخارج بها. والست نعامة واقفة تتفرج ومحروق دمها والضغط عليّ عندها وصدعت وتعبت من الخناق.

المشهد الخامس والأخير:
المدير: حضرتك ممكن تنتظري لحد بكرة وبعدين لو مفيش حاجة رجعت هندفع لحضرتك الفلوس.
النعامة: أنا عايزة أعمل محضر، كده حقي هيضيع.
المدير: بلاش يا هانم محضر، انا هحلهالك ان شاء الله بكرة.

النعامة واقفة جنب الأمانات وتحذر الناس من ترك أشيائهم. واحد عايز يسيب كيس عيش، النعامة تقوله: ليه حضرتك تسيبه؟ خده معك أضمن من هنا..وهكذا وهكذا.

الست نعامة تاخد مشترياتها وتقف تسأل العاملين، يا ترى من الجاني، عامل الأمانات، ولاّ زبون محترف ولاّ النعامة نفسها؟

الجاني هو....

إذا عرفتم الحل اتصلوا ب 747120 إذاعة.

تحديث

حتى هذه اللحظة مازال الجاني حر طليق يتمتع بالنظارات بتاعة النعام ويشوف كويس وغيره يا حرام حولان.

 10:19  14 هسهسات أرسليها بالبريد  

كتاكيتي

لاحظت ان كتاكيتي بتتركني شوية بشوية وهفضل أنا هنا لوحدي :-(

من شهرين طار طائر الرَخ الأسطوري إلى غابة اسكندنافية..وبعده هرب الراكون إلى حتة بعيدة برضو كده. وشوية والغزالة هتجري بعيييد..وكمان النمر يوسف برضو بدأ يتحول إلى حيوان غريب مشفتوش قبل كده.
ليه يا كتاكيتي بتجروا بعيد عني؟ خليكوا في الغابة الأليفة.

يا ترى ايه تاني هيحصل!!
 14:29  4 هسهسات أرسليها بالبريد  
في مرمى البصر
على أشكالها تقع
من الذاكرة