استقلال القضاء حق كل المصريين

الست نعامة: كيفَك انتَ

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

كيفَك انتَ

ملحوظة: للأستمتاع بالتدوينة ديه، لازم تكون فيروز بتغني كيفك انت في الخلفية.

تذكر أخر مرة شفتك سنته؟ تذكر وقته آخر كلمة قلته؟
تغني فيروز وهى قاعدة بتسمعها وتفتكر معاها حكايتها معاه. بتشوفه بس مش كتير، بتكلمه بس مش كتير برضو. مفيش جديد يتقال أو يتحكي عنه، مع انها كانت بتكلمه عن أي حاجة ممكن تحصلها ولو صغيرة وفي أي وقت، بس خلاص معندهاش طاقة عشان تطلعها ولا في قوة عشان تبذل مجهود، بتتكلم في مخها جوة دماغها كأنها بتتكلم معاه هو. حواليها ناس كتير وناس كويسين، بس خلاص مش قادرة. تحتفظ بداخلها بذكرياتها الجميلة معاه ونفسها تعمل حاجات تاني عشان يكون عندها ذكريات كتيرة ولكن ....

"إرجع أنا وياك".."تذكر آخر مرة شو قلتلي...زعلت بوقته...هيدا انت"..."انت الأساسي وبحبك بالأساس" بتكمل سماع الأغنية وتتخيل لو كانوا مع بعض لحد دلوقت، يا ترى هيكونوا إزاي؟ ولما يكبروا ويتقدم بهما السن، هيكونوا زي الرجل والست العجوز إللي شافوهم مرة في وسط البلد وهما بيتمشوا وتخيلوا نفسهم في مثل هذا الموقف؟

وترجع بالذاكرة، أول يوم اتقابلوا أو شافته هى، قابلوا بعض في مكان ضيق، عدوا من جنب بعض وخلاص. بعد يومين اتقابلوا تاني قالتله صباح الخير ورد عليها وخلاص، مكانش هناك أي نوع من المشاعر، واحد بتشوفه كل يوم وخلاص، بس ظريف وغريب. هو كمان فكّر فيها نفس التفكير، واحدة ظريفة ييجي منها.

فجأة نشأت صداقة غريبة بينهم. إيه إللي حصل مش عارفين، بس كانوا أصحاب، وعلى طول مع بعض وبيعملوا كل حاجة مع بعض وابتدى يتصاحب على صاحباتها وهى كمان تتصاحب على أصحابه وتسمع حكياته إللي كانت بالنسبة لها غريبة وجديدة، وهو كمان بيسمع حكاياتها إللي مش بتخلص أبدا وعن ناس عمره م شافهم ولا سمع عنهم.

اكتشفوا ان فيه حاجة غريبة تجمعهم، حاجات كتير مشتركة بينهم وبين كل حاجة حواليهم. نفس الأهتمامات، نفس الحكاوي. اشتركوا في أنشطة جديدة مع بعض، رحلات واجتماعات وندوات. عرفوا ناس كتير مع بعض، وكمان بعدوا عن ناس كتير مع بعض. ناس راحت وناس جت وهما مع بعض. كبروا مع بعض، وفهموا بعض أكتر وأكتر. مواقف كانت بتحصل زمان، كانت هى بتزعل منها وتغضب، عشان لسه مَكَنتش فاهماه أوي، ولما يفضل ساكت مبقتش تسأله انت ساكت ليه، عشان عرفت انه مش لازم يتكلم، ممكن يسكت عشان هو مبسوط، مبقتش تزعل، نضجت، كبرت، فهمت. هو كمان كان بيزعل أو يسكت وميتكلمش، بس خلاص دلوقت مفيش كلام، سكوت على طول.

تحلم بحلم، تصحى الصبح تكلمه على طول وتحكي له، رد هو باستغراب، أنا كمان حلمت نفس الحلم!! اتخضت، سكتت، بس كانت حسّة وعارفة انه ممكن يحصل. وهو كمان كان عارف. كمان كانت أيام بتحلم بحاجة هتحصل وتكلمه تحكيله عنها ويقولها أيوة ده حصل لي امبارح، حلمك اتحقق. وصلوا لدرجة تواصل وتوارد خواطر وأحلام غير طبيعية. ساعات كانوا يسكتوا ولما يبتدوا يتكلموا، يبتدوا في نفس الوقت وبنفس الكلمة عن نفس الموضوع. في الشتاء، كانت تجري عليه وتقضي معاه ساعات طويلة من الليل، وتنام في حضنه عشان بردانة وتدفّى بحبه لها.

حلموا بجزيرة بعيدة، يعيشوا فيها مع بعض من غير مضايقات من حواليهم، ولا التزامات لأي حد. هما الأتنين بس، يعملوا كل حاجة هما عايزينها وفي أي وقت، كل حاجة نفسهم فيها موجودة، هما الأتنين بس. يكبروا مع بعض، ينضجوا أكتر مع بعض، يخلفوا أطفالهم، إللي كانت اساميهم متحددة لوحدها من غير تدخل من أي واحد منهم.

وجه اليوم إللي كانت هى خايفة منه، هو كمان كان بيفكر في اليوم ده، بس عمره م قال لها عن إللي كان خايف منه، ولا هى كمان. يوم الفراق. كان يوم صعب عليها وعليه. دموعها كانت بتسيل لوحدها، حتى لو هى مش عايزة تبكي. إزاي هتعيش من غيره؟ هتكلم مين أول م تصحى من النوم، هتكلم مين قبل م تنام بالليل؟ من إللي هتخرج معاه أو تقعد معاه في أيام الشتاء الباردة. من إللي هيكلمها عن حاجات عمرها م عرفتها قبل كده. يا ترى هو كان احساسه إيه، نفسها تعرف كان بيفكر في إيه يومها. يوم الفراق، مكنش فيه تواصل ولا توارد أفكار. كان يوم مبهم، السحاب كان كتير والدنيا مغيّمة. يا ترى السماء كانت عارفة ان ده اليوم الموعود؟

فضلت لوحدها، مش عارفة تبتدي تاني من جديد، بتحاول تتعرف على ناس تانية ومش قادرة، خلاص كل النشاط إللي كانت فيه راح معاه. وفضلت هى مع الذكريات من الماضي الجميل، تفكر في الجزيرة البعيدة وذكرياتهم هناك مع بعض وعن الذكرى السنوية الخاصة بهما هما بس.


التسميات: , ,

 11:22 أرسليها بالبريد  
هسهسات:
هنعمل ايه طيب يا ست نعامه
فيه حاجات من الواضح
أنها أقدار لا يمكن تعديلها او تخطيها
# هسهسة Blogger أحمد : 4/12/08 18:51  
اكتبي الملحوظة بتاعة سماع أغنية فيروز في اول التدوينة
# هسهسة Blogger Ma3t : 5/12/08 12:57  
modawena ra2a3ea we elkalam belzabt e7sas el song
2etnen 2et2ablo 3asho we sabo ba3d
bas howa kamel 7ayato we 3ashn , 3eref ye3esh, enama heya fedlet wa2fa fe nafs el no2ta mesh 2adra temshy
2a3da we basa waraha we kol malayam tefot
weshaha yetshad lewara akter we ka2eno kan rabetha be 7abl tarfo eltany fe 2edo
i like it alot
we a7'eran asfa 3ala el franco arab, bas el comp. el mal3oon
# هسهسة Blogger HopiZ : 5/12/08 23:36  
how el post da 3an ahmed gharbeia?
# هسهسة Anonymous غير معرف : 8/12/08 12:37  
ماعت: هغيّرها.

هوبيز: شكرا جدا.

غير معرف: مين البشمهندس؟
# هسهسة Blogger الست نعامة : 16/12/08 12:13  
i wanted to post a comment here, but i'll have to ask you first.
is it ok to criticize a little bit, without you being upset?
i'd hate to upset you, you're obviously a sensitive human being.
# هسهسة Anonymous Koroviev : 29/12/08 17:26  
كوروفيف: اتفضل براحتك
# هسهسة Blogger الست نعامة : 30/12/08 10:51  
i'm sure you receive much praising for your prose.
but i happened to read this one, and i followed your advice and i turned on the song while reading.
what i was reading was sadly ruining the song for me, so i read it once again without the song. and i started getting the same impression, my mind was starting to learn to dislike a song that i can't dislike.

i know this is not really what you might call criticizing, but i thought i'd share my personal impressions over your prose.
i'm sure you have sensitive feelings, and i admit it's obvious here, but maybe somethings are meant to just be felt, not written, or at least not by you.

please don't take no offense, i was just sharing, or maybe i should just felt and kept my silence?
# هسهسة Anonymous Koroviev : 31/12/08 05:24  
كوروفيف: أنا مش بزعل ولا حاجة، كل واحد من حقه يعجبه أو م يعجبوش المكتوب، وبعدين عرفت منين إني حساسة؟ مش لازم أصلا الكلام المكتوب ده يكون حصل لي، يعني المدونة بتاعتي مش لازم كل حاجة مكتوبة فيها تكون حصلتلي بالضبط، ممكن برضو تهيؤات المدون. عايز تعبر عن رأيك براحتك، عايز تكتمه في نفسك برضو براحتك.
# هسهسة Blogger الست نعامة : 31/12/08 07:58  
على أشكالها تقع
من الذاكرة