الست نعامة: ألوان

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

ألوان

دايما أصف الناس وأيام الأسبوع بالألوان.

مثلا يوم السبت لَبَني وتخين كده. يوم الخميس كحلي (ممكن عشان الخروج بيكون بالليل). يوم الأربعاء أحمر (أنا بحب اللون الأحمر بس مش بحب يوم الأربعاء!) يوم الاتنين موف كده أو لون ملخبط، يوم الأحد أزرق على رمادي، يوم الثلاثاء رمادي أمّا يوم الجمعة بقى ف لونه أصفر أو حاجة منورة كده.

الناس بقى مش عارفة ليه لهم صفة الألوان، بس عندي صديق شفاف ملوش لون مش عارفة ليه، وصديق تاني بني زي القرد القرود. أما الغزالة ف لونها أخضر، أنا بقى لوني أحمر (هاهاها)، ولما بقابل حد لأول مرة ألاقيه داخل عليا باللون بتاعه ويفضل معاه على طول، زي الأنطباع الأول بالظبط. بس ده ملوش دعوة بحكمي على الشخصية ديه حاجة بيني وبين نفسي.

التسميات: , ,

 11:15 أرسليها بالبريد  
هسهسات:
أنا لوني قمحي لون نيلك يا مصر
# هسهسة Anonymous غير معرف : 14/8/08 13:20  
أهنئك!

هل تري الحروف والأرقام لهم ألوان أيضا؟

ماتوصفينه هو حالة عصبية نادره حميدة و أن كانت تميز صاحبها أسمها ساينثيشيا Synesthesia

وهي تحدث عنما يدمج نوع حسي أو أدراكي مثل البصر او الأصوات بأدراك أخر مختلف و هذا المزج يحدث في القشرة المخية.

يمكنك القرائة عن الموضوع أكثر هنا:
http://en.wikipedia.org/wiki/Synesthesia
http://www.youtube.com/watch?v=DvwTSEwVBfc
http://scienceblogs.com/neurophilosophy/2007/09/the_neuropsychology_of_synaest.php
# هسهسة Anonymous غير معرف : 14/8/08 21:21  
انا كمانالاشخاص عندي بيرتبطوا بالوان و كمان الاحاسيس.
و بابقى قادرة اخمن ليه كل لون مرتبط بالشخص ده بعينه
بس اللون اللي بيمثللي شخص مش بالضرورة يفضل ثابت طوال الوقت, غالبا بيتأثر بالتغيرات اللي بتطرأ على العلاقة
قليلين اوي الناس اللي الوانهم بتفضل ثابتة عندي,الكائن الغامض مثلا دايما مرتبط باللون الاصفر, و اعز صاحبة ليا لونها ازرق سماوي, و دول من القليلين اللي الوانهم ثابتة جوايا, بقت جزأ منهم بالنسبالي. و عادة اللي بيثبتوابمرور الوقت بيبقوا عناصر اساسية من خيالاتي, بس دي قصة تانية :)

عمري ما ارتبطت الايام عندي بالوان, يمكن عشان عمري ماكان عندي نشاط محدد مرتبط بيوم بعينه
# هسهسة Blogger monasosh : 16/8/08 23:08  
مصطفى حسين: يااه طول عمري عندي هذه الحالة بس مش متضايقة منها خالص :-) شكرا ع التوضيح العلمي والروابط المفيدة. الأرقام والحروف مالهمش لون أوي يعني الحروف لونهم أبيض والأرقام لونهم أسود بس مش كل رقم أو حرف له لون زي الناس وأيام الأسبوع ولكن الشهور كمان لها لون عندي مش عارفة بقى ديه حالة مستعصية ولا إيه؟

معت: الناس ألوان وبيفضل اللون لازق فيهم ومش بيتغير، ما عدا شخص أو شخصين لونهم تغير يعني صديقي ذو اللون الشفاف كان لونه رمادي وأصفر وتحول إلى شفاف :-) ارتباط أيام الأسبوع بالألوان ملهاش دعوة بالأنشطة المرتبطة باليوم هى بتييجي كده برضو لوحدها.
# هسهسة Blogger الست نعامة : 17/8/08 10:40  
مصطفى، أنا فكرت في دا زمان لما عرفت موضوع ألوان الست نعامة، لكن بعد ما قريت شوية عن الموضوع استنتجت أنها مش حالة سنثزايا.

طبعا أنت أدرى، لكن دا كان ال أنا وصلت له لأني لقيت تعريف السنثزاسا مرتبط بالأشكال البصرية المجردة (و الحروف طبعا) و الأصوات، و الطعوم، مش بالناس كشخصيات. إلا إن كان الموضوع مرتبط بصوت اسم الشخص \يوم الاسبوع أو كتابته و أن اللون بيستنتج من دا في عملية غير مباشرة. و دا نسأل فيه النعامة.
# هسهسة Blogger ألِف : 17/8/08 20:37  
ألف: ديه حاجة صعبة أوي أوي أنا نفسي مش عارفة بقى هل الموضوع ده مرتبط بصوت اسم الشخص أو يوم الأسبوع أو كتابته أنا مش عارفة، ديه حاجة بتحصل كده تلقائيا لوحدها. عامة 1000 شكر.
# هسهسة Blogger الست نعامة : 18/8/08 08:21  
انا المواقف بس هى اللى عندى الوان

وبعدين يعنى انت متعرفيش تفوتى ولا تصلحيلى على جنب لازم تسيحيلى ادام كل حيوانات الغابة ، ثم منتظره ايه من واحد لسه فاكر امل وعمر يعنى كويس أوى انى مكتبتهاش بال "ظ"
# هسهسة Blogger محمد عبد الغفار : 18/8/08 08:57  
لامؤاخذة يا أستاذ محمد عبد الغفار، بس عيب برضو يعني تكتبها بال"ز" وكمان عايز تكتبها بال"ظاظ" لا لا كده كتير أوي، فين لغتنا العربية الجميلة.
# هسهسة Blogger الست نعامة : 18/8/08 09:08  
حتى انتي يا نعامة بتكتبي اسمي "معت" مش "ماعت"!!!! واضح اني لازم اتخلص من ساكني الهضبة قبل اما تأثيرهم ينتشر اكتر من كدة
:)
# هسهسة Blogger monasosh : 18/8/08 13:59  
معت: بس هى فعلا مش بال"ألِف". عشان لو أضفنا حرف "أ" للأسم هكون فيه مدّ وكده ينطق الأسم خطأ والله أعلم :-)
# هسهسة Blogger الست نعامة : 18/8/08 14:09  
فيه خلاف على النطق الصحيح ليها ازاي, و بالتالي الاسم بيتكتب بالطريقتين
لكن ايا كان, ده اسمي في الفراغ السيبيري, واسم مدونتي , المفروض الناس تلتزم بكتابته زي ماانا عايزاه
اررررر
واضح اني لازم اعمل حملة للحفاظ على اسمي
:)
# هسهسة Blogger monasosh : 19/8/08 00:09  
معت: أعتقد انك كاتبة في وصف مدونتك انك تحاكي معت الألهة. ممكن أنا فهمت غلط. بس لو انت اسمك بالمد، إذن لا تغضبي يا ماعت.
# هسهسة Blogger الست نعامة : 19/8/08 09:13  
هيهي بادياها ب "معت" و قافلاها ب " ماعت"

ايوة طابعا انا الهة التوازن و العدل , بس مع اضافات حديثة , حبة فراشات و الوان كدةعالماشيي
و لا يهمك يا نعامة انا هاستسلم خلاص و كل حد يكتبها بالطريقة اللي يشوفها

صباحك فل
"موعت" :)
# هسهسة Blogger monasosh : 19/8/08 11:38  
يظهر أن اسم معت كانت تنطق فعلا بإمالة الألف إلى الواو، يعني بالعربي تنكتب بحرف "الظاذ" :)

و قريت كمان أنه في الكوزمولوجيا المصرية موٰعت لم تكن إلهة، بل "مفهوما مجردا و مطلقا للعدالة وجد في نفس لحظة خلق الكون".
# هسهسة Blogger ألِف : 20/8/08 21:14  
على أشكالها تقع
من الذاكرة