استقلال القضاء حق كل المصريين

الست نعامة: ع الرصيف

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

ع الرصيف

المفروض ان مكان عملي عبارة عن مبنى من 4 أدوار..ولكن لزيادة عدد الموظفين في المشروع إللي باشتغل فيه؛ انتقل المشروع إلى مبنى يقع خلف المبني الأصلي مباشرة..وبحكم عملي باتنقل بين المبنيين. في الطريق اقابل سيدتين، واحدة في منتصف العمر أو هى شكلها كده من الغلب وممكن تكون صغيرة السن، والثانية مسنة وده واضح جدا. ومن كثرة مروري بهما، اصبحنا أصدقاء..نصبح على بعض في الصباح ولو غبت يسألوني تاني يوم حضرتك مجتيش امبارح، خير؟
النهاردة بقى، وأنا رايحة للمبنى التاني ع الساعة 11 كده، كانوا بيشربوا شاي، عزمت علي السيدة المسنة بكوب من الشاي، كان شكله حلو جدا ومشجع، بس أنا كان عندي اجتماع، ف اعتذرت بأدب. وأنا راجعة بقى كانوا لسه بيشربوا شاي وكمان عائلة السيدة التانية (إللي شكلها كبير) وعزمت عليا بكوب شاي تاني، قلت في نفسي بقى مبدهاش، وأنا أصلا باحب الشاي زي عينيا وكمان شكله حلو كده وظريف، وقعدت معاهم ع الرصيف وشربت الشاي، اللله. أحب أنا الشاي إللي معمول في الكوز ده بيكون طعمه مختلف تماما عن إللي بنشربه في البيت الحقيقة.
أفتكرت لما كنت في زيارة من زياراتي لأسوان الجميلة، كنت في مقياس النيل في جزيرة أسوان، وعزم علي العسكري والحارس بكوب شاي أحمر تقيل، قعدت معاهم تحت الضليلة وفضلنا نتكلم ونشرب الشاي ببطء كده وتأني..كانت لطيفة جدا.
هروح أعمل شاي بقى.

التسميات: ,

 18:15 أرسليها بالبريد  
هسهسات:
الله على شاى اسوان بالنعناع والله على ناس اسوان..

ياه
نفسى من دا تانى
# هسهسة Blogger Lasto-adri *Blue* : 31/7/07 16:07  
و يا ترى بتحبي الشاي الأحمر أكتر و الا الأخضر؟

مش هتيجي تاخدي الجاز بتاعك؟
# هسهسة Anonymous غير معرف : 31/7/07 16:47  
هو فيه شاي أحمر، طب نجربه بقى المرة ديه هاهاهاهاهاهااااااا.
باحب الأحمر أكتر، بس ساعات كده ممكن أشرب شاي أخضر طبيعي بالنعناع (مش إللي في أكياس يعني).
حاضر هآجي أخده بس ياريت م تطمعش فيه يا غير معرّف لو سمحت.
# هسهسة Blogger الست نعامة : 31/7/07 16:50  
shai ahmar wala shai akhdar :)))
bgad howa feeh shai ahmar.. tab ngarabo el mara di;;;
wahashenti el 2a3dat di awiiiiiiii :)))
# هسهسة Blogger Mimi : 25/8/07 23:45  
على أشكالها تقع
من الذاكرة