اختفاء

قررت اختفي عن الظهور (أنا أصلا قليلا ما أظهر) واعتكف واتقوقع في عشّي في الغابة. لا أعتقد ان حدّ هياخد باله من اختفائي عامة.

أنيمال

شخصية أنيمال في المابيت شو كانت هايلة جدا. أصلا مش بيتكلم، هو كل إللي بيعمله في الحلقات إللي بيظهر فيها انه يكسر، يتخانق أو يعمل مشاكل وخلاص. ديه أكتر شخصية بحبها، وكمان بحب الرجلين العواجيز المتفرجين إللي بيتريقوا على كل حاجة ويضحكوا عليها. وطبعا الضفدع حبيب الملايين :-)
الحقيقة كل شخصيات المابيت شو مش سهلين خالص، بس أنيمال الحقيقة مفيش زييه.
كان المابيت شو بييجي زمان ع القناة التانية في التليفزيون المصري، افتقدها فعلا، الحلقة قصيرة وخفيفة. ومن أشهر الحلقات إللي انيمال أبدع فيها هى الحلقة ديه. حتى الأغنية بتاعتها مشهورة جدا ولسه الناس بتغنيها لحد دلوقتي، مع إن ملهاش معنى أصلا.

يجعل من الحبّة....فوطة

شريط فيه حبوب، دواء؟ ممكن. ناخد حبّة من الشريط، نحطها في نص كوب ماء..هِنج بِنج فِنج..تطلع فوطة.

وحدي قاعدة في الغابة

متكلمناش من أسبوع، وده غريب علينا احنا الاتنين..عادة بنتكلم كل يوم في التليفون أو نتقابل كمان.

سافرت الغزالة من أسبوع بالظبط..كنت فاكرة هنشغل بقى في حياتي والشغل والكتعوم، بس محصلش.

وحشتيني على فكرة.

الصحراوي رايح جاي

بما إن الصيف دخل علينا من شهرين...وجَبْ علينا بقى زيارة البحر.
وبالتالي ناخد الصحراوي كل أسبوع رايح جاي.
الاسبوع ده بقى بيوزعوا نشرة اعلانية عن تحديث الطريق الصحراوي وتطويره ليكون مثل طريق القاهرة/العين السخنة؛ طريق مفتوح..اللهم صلي ع النبي. لما نشوف ده هيحصل امتى كده كمان خمس سنين ولاّ في السريع ع الصيف الجاي؟