الست نعامة: أغسطس 2005

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

جهابزة المنشية

ويقولوا الناس ليه مش بتفهم الصبح، واكلين فول ولاّ ايه. ظالمين الفول، ماله الفول، أكلة شوعبية بتملى البطون لحد تاني يوم وممكن أكتر من يوم كمان لو تقلنا شوية. ماعلينا مش موضوعي النهاردة. كنت باتكلم على الناس اللي مش بتفهم الصبح، طبعاً لازم ماتفهمش حاجة، لماّ انزل الشارع الساعة واحدة بعد منتصف الليل، والاقي الدنيا زحمة كأنها الساعة ثلاثة العصر، وتفضل البلد صاحية لحد تاني يوم، طب بالذمة هاتفهم ازاي بقى ولاّ العيال يجمعوا اللي المدرس بيقولوا ازاي؟

ارجع للعنوان اللي كتبته مش عارفة ليه، اتكلمت من شهر عن منشاة ناصر والحاجات الموجودة هناك، دلوقتي ممكن أكمل واتكلم شوية عن الناس اللي ساكنين في المنطقة الجميلة ديه. بنعمل اليومين دول بحث سريع بالمشاركة هناك عشان نحدد أولويات واحتياجات المجتمع. وخلال اجراء البحث، اكتشفنا ان اللي يقدر يسكن هناك لازم يكون شخصية زكية جداً ومحنك وجهبز زمانه عشان يعرف يتأقلم على المنطقة واسلوب الحياة هناك. ظروف المعيشة صعبة، والناس هناك كمان معاملتهم صعبة جداً، حتى لو مين صعب جداً انهم يأمنوا له بسهولة كده. والملاحظ بقى هو تأثرهم بالأحزاب، وتواجهنا الأن بعض المشاكل بسبب الأحزاب وخصوصاً الحزب الوطني. هانشوف ايه اللي هايحصل وهل سنستمر أم يؤجل البحث بعد الانتخابات أم يلغى خالص؟!
استدراك
اتأجل البحث لبعد الأنتخابات بناءً على رغبة الجماهير!!!! عشان يلحقوا يملوا الكشوف. "احنا معاكم بس برضو الحزب عايزنا فاحنا الأسبوع ده مش هانكون فاضيين".
 15:51  6 هسهسات أرسليها بالبريد  

كلمات سبارتكوس الأخيرة

كنت انظم الحاسوب الخاص بي في مكان عملي، ووجدت ملفات غريبة على القرص دي drive D، ومنها ملف يحمل عنوان أمل دنقل.

فتحته ووجدت التالي:

كلمات سبارتاكوس الاخيرة


(مزج أول):


المجد للشيطان معبود الرياح
من قال لا في وجه من قالوا نعم
من علم الانسان تمزيق العدم
من قال لا فلم يمت
وظل روحا ابدية الالم

(مزج ثان):

معلق انا على مشانق الصباح
وجبهتي –بالموت-محنية
لانني لم احنها حية
يا اخوتي الذين يعبرون في الميدان مطرقين
منحدرين في نهاية المساء
في شارع الاسكندر الاكبر
لا تخجلوا و لترفعوا عيونكم الي
لانكم معلقون جانبي..على مشانق القيصر
فلترفعوا عيونكم الي
لربما..اذا التقت عيونكم بالموت في عيني :
يبتسم الفناء داخلي ..لانكم رفعتم راسكم مرة!
سيزيف لم تعد على اكتافه الصخرة
يحملها الذين يولدون في مخادع الرقيق
والبحر كالصحراء لا يروي العطش
لأن من يقول "لا" لا يرتوي الا من الدموع
فلترفعوا عيونكم للثائر المشنوق
فسوف تنتهون مثله غدا
وقبلوا زوجاتكم هنا على قارعة الطريق
فسوف تنتهون ها هنا غدا
فالانحناء مر
والعنكبوت فوق اعناق الرجال ينسج الردى
فقبلوا زوجاتكم ..اني تركت زوجتي بلا وداع
وان رأيتم طفلي الذي تركته على ذراعيها بلا ذراع
فعلموه الانحناء
علموه الانحناء
الله لم يغفر خطيئة الشيطان حين قال لا!
والودعاء الطيبون هم من يرثون الارض في نهاية المدى
لانهم لا يشنقون
فعلموه الانحناء
وليس ثم من مفر
لا تحلموا بعالم سعيد
فخلف كل قيصر يموت : قيصر جديد!
وخلف كل ثائر يموت احزان بلا جدوى ودمعة سدى!

يالا خير، ودلوقتي باسمع عبد الحليم حافظ بيغني قول لي حاجة أي حاجة!!!!!
 15:51  7 هسهسات أرسليها بالبريد  

ابليس الملائكي

قالوا لي ابليس موجود النهاردة، قلت في نفسي يا سلام أخيراً هاشوف شكله ايه ابليس، هذا الشيطان الصغير (مع اني لا أحبذ فكرة مقابلة المدونين، أفضل الصورة التي رسمتها في خيالي). وجاء صاحب الأشجار وقدمه الى ألِف، كنت ولولفين نجلس بجانب ألِف نتبادل أطراف الحديث، واقترب منا شاب وسيم، وردة ياخواتي مفتحة وبمعنى أصح ملاك هاهااا. وياسلام على شكله على شكلنا كلنا لماّ اتعرفنا على بعض، ولا أنا متخيلة ان هو ده ابليس ولا هو كمان متخيل ان هى ديه الست نعامة. المهم هو سلّم على ألِف بكل لطف (طبعاً عشان أعتقد ناس كتير بتحب تتعرف عليه)، وسلّم على لولفين وعليا عادي يعني، ناس ما يعفرهمش وزوقياً يلقي التحية، ولكن لماّ عرف الحقيقة ههاهاااا، كان شكله كده

 14:12  14 هسهسات أرسليها بالبريد  

سمع..هُس

ملصق حفل سمع هس في ساقية الصاوي يوم الأحد 21\8

حفل موسيقي ضد العنف والأرهاب....يوم الأحد 21/08 الساعة 17:00 (الخامسة عصرًا) في ساقية الصاوي (قاعة النهر).

تعالوا وساندوا وعبروا عن شعوركم ضد الارهاب والعنف.
 22:25  8 هسهسات أرسليها بالبريد  

صاحي ماتكسرش..مكسور ماتكلش

هو ده الحال في مشروع من مشاريع التنمية تموله الدولة.
نزلوا المجتمع، وسألوا أهالي القرى عن احتياجاتهم، يعني بلغة التنمية عملوا تقدير لأحتياجات المجتمع، ورتبوها حسب الأولوية والأهمية، طب جميل جداً. خلاص عرفنا المجتمع محتاج ايه وهانبتدي بأي مشروع، عايزين مكاتب خدمية زي مثلاً مكتب بريد، الرد كان ممنوع المباني، طب عايزين مكتب اتصالات، بردو ممنوع المباني، طب نعمل ايه؟! هانوصل شبكات مياه وكهرباء، بس احنا اتهرينا مياه وكهرباء، عايزين مكاتب خدمات، لأ ممنوع المباني. طب تعبتم نفسكم ليه وعملتم تقدير احتياجات ودراسات وأبحاث وفي الآخر هاتعملوا اللي في دماغكم؟

افتكرت المثل ده: "صاحي ماتكسرش، ومكسور ماتكلش، وكُل واشبع".
حكاية المثل ده ايه بقى، واحد عزم صديقه على العشاء، وقدم له رغيفين خبز، واحد صاحي (سليم) والتاني مكسور، وقال له عشان انت ضيفي قدمت لك رغيف صاحي، بس فيه واحد تاني مكسور، فحرام تكسر الصاحي وفيه واحد مكسور، وعيب اقدم لك المكسور عشان انت ضيفي، وكل واشبع.

وسلم لي على القرد الرحال.

من أسيوط.
 21:41  3 هسهسات أرسليها بالبريد  

وصفات جدتي

حدث هذا الاسبوع اللي فات أثناء تواجدي في مرسى مطروح مدينتي المفضلة، وقبل ذهابي الى أسيوط الحارة.

قاعدين نشرب الشاي بالنعناع الطازج الجميل، نهضم بعد أكلة السمك التمام (اللي انا باكله غصب عني)، ذُكِر في الكلام زيت الزيتون الهُمام، وهنا قالت جدتي، "عندي وصفة الكحل الطبيعي:
تجيبي قطعة قطن وتحطي عليها زيت زيتون، وبعدين تجيبي طاجن فخار، تشعلي النار في القطنة وتغطيها بالطاجن، بس طبعاً تسيبي حتة للهواء. هايطلع دخان أسود على الطاجن (هَبابة على رأي سكينة)، بعد ما تنطفي القطنة تاخدي الهَبابة من على الطاجن وتحطيها في علبة صغيرة. وهو ده بقى كحل العين اللي تكحلي بيه عينيك الدوبلي."

ألف مبروك.
 21:27  5 هسهسات أرسليها بالبريد  

الست نعامة في أسيوط

أكتب من أسيوط الآن.
المحافظة عادية جداً كبقية المحافظات، لا جديد، نفس الناس، نفس الشوارع، وكمان نفس الزحمة والغباء الموجود في كل حتة.

خلصنا الورشة الساعة الواحدة ظهراً، المخطط ان تنتهي الساعة الثالثة والنصف عصراً، ولكن طبعاً الموظفين في المحليات فرصة يروحوا بدري، يالاّ يا عمّ خلص، عايزين نروح، المهم الورشة انتهت قبل ميعادها بساعتين ونصف، ولكن تم تيسير المخطط كله!!!!

أقيم في استراحة كبار الزوار الملحقة بديوان المحافظة، يا سلاااام آخر تمام (مش هاحكي دلوقتي عن الاقامة). بعد الانتهاء من الورشة اليوم، بقية اليوم راحة حتى نجتمع مرة أخرى في المساء عشان نحضّر لليوم التاني، ذهبت لأتجول في أسيوط، ودخلت مهرجان السياحة والتسوق، فرصة مش بادخله في مصر وعندي وقت فاضي، وكانت المفاجأة....أرض فضاء واسعة جداً، مقسمة الى ممرات، والممرات فيها معروضات معلقة، اشي ملابس داخلية حريمي ورجالي، اشي شرابات وملايات، واشي ادوات منزلية ومكتبية، المهم مين بقى اللي بيبيع؟؟ باعة من الصين العظيم!!!

في هذه الأرض الفضاء ناصبين مسرح عشان السياحة بقى وتنشيطها. المفروض ان فرق الموسيقى العربية والفنون الشعبية بتقدم عروضها، هاخطف رجلي تاني دلوقتي عشان ألحق العروض الفنية بقى.

وتأتي البقية قريباً.
 21:13  8 هسهسات أرسليها بالبريد  

ودخل عالم التدوين

أحب ان ارحب بالحَمَارنب في عالم التدوين.

أنا عارفة ان مش كل القراء هايفهموا هو يقصد ايه، بس واحدة واحدة كده، وبتركيز وتمعن فيما هو مكتوب هايتضح قصده على طول.

وتكتمل العائلة في عالم التدوين الكبير جداً.
 11:09  1 هسهسات أرسليها بالبريد  

رسالة من ابليس

اتفقد بريدي الالكتروني في الصباح كعادتي كل يوم، إذ بي أفوجأ برسالة من العزيز ابليس، وكان نصها كالتالي:

"عزيزتى الست نعامة،
اكتب إليك من جبال الشمال التى تطل على غابتكم الكريمة،

أما بعد،،،

فلقد رأينا بالأمس نار تشتعل وسمعنا أصوات صراخات، وبلغنى خبر من طائر اللقلق أن الضباع قد هاجمت الغابة بالأمس أثناء محاولة بعض اصداقئنا مد خطوط المياه من البركة إلى كل بيت، وأنه قد ضرب عدد من صغار الحيوانات كما اعتقل الضباع السود عدد آخر من الحمير البيضاء والمخططة وقد قلقنا نحن سكان جبال الشمال، مما حصل وازعجنا هجمات الضباع المتكررة، لكن ما باليد حيلة واذا قدر الله لكن طمأنينا عن حال الأصحاب.

كما أننا لم نفهم ما حكاية المرسوم الأزرق الذى علقتيه على شنطتك وكتب عليه البرنامج الثقافي،
ارجو ان تشرحى الأمر لو عندك معلومات، لأن الدب القطبي بجوارى مصاب بالمملل ويرغب في قضاء الصيف فيما ينفع وإلا يهدد بنزول الغابة وإثارة القلائل هناك.

تحياتى للحمارنب واللوفين .. وقولي له ألاّ يغيب علينا لأننا نتابع ما يكتبه بشغف."


مش عارفة أرد وأقول ايه!! ممكن في تدوين تانية يا سيد ابليس هارد عليك. وأرجو منك ان تهدي من روع الدب القطبي، بلاش ينزل الغابة، هي مش ناقصة. ممكن يقابلني في مرسى مطروح الاسبوع الجاي إن شاء الله لو عايز يصيف :-)

وأخيراً أهلاً بك في الغابة الجميلة كواحد من حيواناتها الرائعين.
 12:00  0 هسهسات أرسليها بالبريد  
في مرمى البصر
على أشكالها تقع
من الذاكرة