استقلال القضاء حق كل المصريين

الست نعامة: مايو 2005

الست نعامة تعبر عن ما تتخيله وتعيشه ويحدث لها كل يوم أو كل شهر أو ربما كل عام.

جهاز المذياع



كنت مع أصدقائي في جلسة أصحاب أحباب تحت الشجرة الكبيرة في آخر الغابة. اتكلمنا في موضوعات كتير عن الفرق بين زمان ودلوقتي، وكيف أصبحت الحياة مزدحمة بأحداث كتيرة والوقت بيجري واليوم مش بيقضي نعمل كل اللي في نفسنا. وسألتهم حدّ فيكم بيقرأ الجريدة اليومية؟ أغلبيتهم قالوا لأ. ردت الفرسة وقالت: أنا باسمع الراديو.
أنا برضه، اتعودت من زمان أسمع الراديو على طول، الأخبار بتكون مختصرة وبتعطي فكرة عماّ يدور في الدنيا. والمسلسلات الاذاعية، مع انها ممكن تكون هايفة، ولكن بتخللي الواحد يتخيل المشهد حسب ما خياله يكون، واسع أم ضيق. أنا عن نفسي كنت باحب أوي اسمع مسلسل ألف ليلة وليلة في الراديو، كان بيذاع على اذاعة البرنامج العام الساعة 22:15، كنت باتخيل شكل الأشكيف المخيف ممكن يكون ازاي، وكمان شكل شهرزاد وشهريار، وصوت زوزو نبيل :-) والساعة 17:00 هو ده ميعاد اذاعة أم كلثوم، في الصيف كنت باستمع اليها. والبرنامج الثقافي وكمان البرنامج الأوروبي.

استخدام الأذن يطلق العنان للخيال، ويا سلام لماّ الخيال يشتغل، بتبقى حاجة فُل أوي، يعني لو ماكنتش شوفت الأسد شكله ايه، وسمعت بس زئيره كان ممكن اتخيله حاجة تانية خالص.



كان زمان الناس بتتلم حوالين المذياع عشان يسهروا وكمان يسمعوا حفلة الست يوم الخميس، وخُطَب الرؤساء. دلوقتي مش كل الناس بستمع المذياع، منجذبين أكتر للتلفاز، أو كما تطلق عليه أمي المفسديون :-)

ووجدنا ان جيلنا (جيل السبعينات) همّ آخر أجيال المذياع، مع إن فيه اتجاه دلوقتي لأفتتاح اذاعات جديدة، بس بالنسبة لي مزعجة أوي، أفضل القديم عن الجديد.

ومع التقدم الحادث في العالم حولنا، تغير شكل المذياع وتطور جداً، بالنسبة للحجم أصبح هناك احجام صغيرة وممكن نشيلها في جيبنا.



وكمان نعلقها في الأذن (ده مخصوص لأصدقائنا الحمار، الحصان، اللاما، الفيل، القرد، الأرنب...)



ولسه ياما نشوف.

استكمال
اكتشفت إني الأيام ديه أفضل العيش في الماضي، وهذه حالة الهروب من الواقع.
 17:09  10 هسهسات أرسليها بالبريد  

ورفض أن يوقع

ذهبت لساقية الصاوي لحضور ندوة الكاتب البرازيلي باولو كويلو.



ماكنتش متحمسة لحضور الندوة ولكن ذهبت لأحصل على توقيع الكاتب على كتابه "الكيميائي" أو كما أطلقوا عليه "ساحر الصحراء".



قاعة النهر كانت ممتلئة ومزدحمة جداً، وجدنا بصعوبة مكان للجلوس، أجاب الكاتب على بعض الأسئلة ثم انسحب بهدوء.

انتهزت الفرصة وجريت عشان أحصل على توقيعه، ولكن قابلني بكل برود ورفض أن يوقع بحجة الزحام وضيق الوقت، طبعاً دمي اتحرق وغضبت عليه، وقررت تأجيل قراءة رواية 11 دقيقة التي كنت أريد شراءها لحدّ ما أنسى اللي حصل.

بعد الكبسة، قابلت بالصدفة صديق قديم، وقلتله على اللي حصل، وعشان يخفف عليا، أخد مني الكتاب ووقع هو بدلاً من الكاتب المشهور.

وفي النهاية حصلت على توقيع على كتابي :-)

ظللنا بعض الوقت للأستمتاع بالهواء المنعش ومنظر النيل في الليل وانعكاسات الأضواء الملونة على مياهه الملوثة.
وفعلاً استمتعت.
 14:56  8 هسهسات أرسليها بالبريد  

نسمات الموسيقى الجميلة

مر عام على أول حفلة حضرتها بالصدفة مع أصدقائي في القلعة، فكرنا في استرجاع ذكريات العام الماضي.

السنة اللي فاتت كنا تلاتة، بالصدفة فكرنا في الذهاب للقلعة، وجدنا حفل يحيه جورج موستاكي، هو مغني فرنساوي أو جريجي أنا مش عارفة، المهم كانت الموسيقى لطيفة وخفيفة، والصحبة كانت جميلة جداً. وموستاكي نفسه كان ظريف، الأغاني كانت جميلة مع انها باللغة الفرنسية التي نسيتها، بس برضو كانت مؤثرة.

السنة ديه كان معانا أصدقاء أكتر، ولكن....صوت موستاكي كان غريب شوية، يظهر من السنة للسنة ومع تقدم السن كمان يحدث تغير في الأحبال الصوتية. الجو كان برد شوية وده كان له أثره على المتفرجين اللي انسحبوا شوية شوية من الهواء البارد. أغلبية الأصدقاء انسحبوا كمان لأسباب عديدة وبقيت مع صديقي زحلوف نستمتع بالموسيقى والصوت المحشرج، ونسمات الهواء البارد، والقمر مكتمل ومنير مع خلفية القلعة والأضاءة المزعجة أحياناً.

وانطلق خيالي وتركت له العنان ليسرح بعيد في دنيا تانية وعالم تاني مش عندنا بعيد عن هنا.
 15:06  1 هسهسات أرسليها بالبريد  

أبو البقاء الرندي

كل ما أعرفه عنه قبل البحث في الشبكة العنكبوتية انه شاعر اندلسي، له بيت شعر معروف، الحقيقة هو الوحيد اللي أعرفه:

لـكل شـيء إذامـاتم نـقصان فـلا يُـغَرُ بـطيبِ العيشِ إنسان
 10:52  0 هسهسات أرسليها بالبريد  

الحمامة والصياد

مستوحاة من كتاب كليلة ودمنة



الحيوانات في الغابة كانت متضايقة وعاملين اجتماع عشان يشوفوا حل لحكاية صيد الحيوانات، ملك الغابة الأسد قال: "لازم نشوف الحل يا جماعة، الصيادين نازلين صيد، احنا أزكى منهم، لازم نضحك عليهم، بس على شرط نلتزم كلنا بما نتفق عليه."

الحيوانات كلها اتفقت على الآتي، لماّ الصياد يدخل الغابة وينادي على الحيوانات، ما حدّش يرُد عليه، وبالتالي يعرف ان مافيش حدّ، وياخد بعضه ويمشي.

المهم، تاني يوم دخل الصياد الغابة، وفضل ماشي ماشي ماشي، وينادي ويقول: "فيه حيوانات هنا؟" طبعاً كل الحيوانات ملتزمة بالأتفاق وماحدّش رد عليه.

فضل الصياد ماشي ماشي ماشي ماشي، ووقف تحت الشجرة اللي عليها عش الحمامة، ونادى من جديد على الحيوانات، ردت عليه الحمامة الطيبة: "لأ، مافيش هنا حيوانات."

عرف الصياد مكان عشّها واصطاد الحمامة المسكينة.
 12:30  0 هسهسات أرسليها بالبريد  

زغروتة

لولوليييييييييييييي لولوليييييييييييييي لولوليييييييييي.

اشتغل الهاللو اشتغل الهاللو وعرفت أضيف صور كمان وكمان وكمااااااااااان.


لولولييييييييييييي

ودلوقتي ممكن نتعرف على شكل الحمارنب الحيوان الأسطوري ، وكمان نشوف كان شكلهم ايه وهماّ متحولين الى فئران.
 10:21  1 هسهسات أرسليها بالبريد  

لحظات ممتعة

كان يوم شم النسيم، عيد الربيع، وفيه تتفتح الأزهار وتخضر الأشجار، وكمان تنتشر الأبتسامات على الوجوه العابسة، ومعروف انه موسم الحب برضه.

اتقابلوا من غير معاد، وكان أحلى معاد، الأول كان لقاء عادي، تبادلوا أطراف الحديث مع الموجودين حواليهم، وكمان الأبتسامات ما بينهم وبين بعض، وبعد الأبتسامات تبادلوا النظرات ومن هنا ابتدت الحكاية...

نسيوا انهم خارجين مع الأصدقاء، ودخلوا في حالة من اللاشعور بالآخرين، هما الأتنين بس، في جزيرة بعيدة لوحدهم، ماحدش بيزعجهم، عايشين حياتهم بطريقتهم الخاصة. يصحوا، يناموا، ياكلوا ويشربوا، ويناموا تاني، يتكلموا، يسكتوا، يضحكوا شوية مع بعض، أو حتى يغلسوا على بعض، ما فيش مشكلة.
يدخلوا في مناقشات عميقة وكمان سطحية، المهم انهم مع بعض وبس.

تبادلا القبلات والأحضان، واعترفوا بمدى حبهم لبعض، ومدى ادمانهم لبعض، كل ده والأصدقاء معاهم مش حاسّين بالعالم الخاص بيهم، ده سحر ولاّ ايه؟ مش عارفين نتخلص منه، وليه خلينا كده مبسوطين.

وفجأة أخدوا بالهم انهم مش لوحدهم، لازم يرجعوا تاني للحقيقة والعالم الواقعي.
ولكن تبقى دايماً لحظات ممتعة بينهم هما الأتنين بس في عالمهم الخاص اللي ماحدش يعرف عنه حاجة.
 16:29  2 هسهسات أرسليها بالبريد  

عكننة الهاللو

لحد دلوقتي مش عارفة أضيف صور للمدونة، ومش عارفة أعمل ايه.
عندي صور جميلة ومعبرة عن كل المواضيع اللي باكتبها، وأول ما أحاول أضيف صورة اصطدم بهاللو ويعكنن عليا، أزهق ,اقفل البرنامج وأروح أقرأ الكتبا الشيق اللي لسه ماخلصتوش ومش عايزة أخلصه.
حدّ ينصحني أعمل ايه.
 15:50  6 هسهسات أرسليها بالبريد  

مدينة الشمس

حضرت احتفال مدينة الشمس بمرور 100 عام على انشاءها، ومن حظي إني كنت موجودة في أول 100 سنة :-)
كالعادة اجتمع الأصدقاء زحلوف والقرد والفرسة وكمان الفيل أبو زلومة ومعاهم الست نعامة وراحوا يحتفلوا. وبالصدفة قابلوا مين هناك، الغراب وكمان ميمون (مش القرد) ظهر شوية ومشي كالعادة على طول.

ولأول مرة في تاريخ مدينة الشمس، يكون هناك طريق خالي من العربيات اللي بتخنقنا، ولكن مليان بالورود والألوان المرحة والبالونات وكمان كل الحاضرين كانوا مبسوطين جداً. استمعنا الى نغمات الموسيقى الجميلة ولعبنا، وقابلت أصدقاء من الزمن الجميل، وتذكرت معاهم الأيام القديمة.

مع إني مش من عشاق مدينة الشمس، بس اليوم ده كان ظريف جداً، وكما وصفه ألف كان حلم قصير استمر لساعات.

كان لي ملاحظة مع القرد، نسبة السيدات الحوامل عالية جداً، يعني يوم الاحتفال قابلنا ما لا يقل عن 15 واحدة حامل، وكلهم هيفقسوا في الأغلب في نفس الوقت. خير ربنا يزيد ويبارك. يا ترى نستنتج ايه من الملاحظة ديه؟

استكمال
هذه هى المرة الخامسة التي أحاول ان أضيف فيها بعض الصور للتدوينة ولكن للأسف مش عارفة. أفكر في الحل الآخر وهو الأنتقال من هذا المكان.

استكمال تاني
لسه عارفة ان الاحتفالات بمئوية مدينة الشمس مازالت مستمرة حتى شهر يونيو، برنامج الاحتفال طويل جداً.
 04:50  10 هسهسات أرسليها بالبريد  

الحيوان الأسطوري

انضم للغابة لفترة قصيرة حيوان أسطوري وخرافي ألا وهو الحَمَارنب، ايه هو الحَمَارنب ده؟!!
هو حيوان في حجم الأرنب بس شكل الحمار. وله أذنان طويلة، ورجليه اللي قدام قصيرة واللي في الخلف طويلة، ولونه رمادي على أبيض. بس أمور أوي، وشعره منكوش مع انه ناعم بس بيحب ينكُشُه بطريقة غجرية.
كان زائر وسافر بس وعد انه هييجي تاني.

 16:25  15 هسهسات أرسليها بالبريد  

حجاب برج القاهرة

يا سلااام، الناس فاضية في القاهرة والله، خلّصوا كل الموضوعات اللى ممكن يفتوا فيها، وفجأة وجدوا برج القاهرة واقف لوحده مش متغطي، فكتبوا عنه هنا وضحّكوا الناس عليهم كمان. واربط الفتوى ديه بفتوى النقاب اللي اتكلمت عنها من فترة وسببت بلبلة في مناطق كثيرة.
 14:39  8 هسهسات أرسليها بالبريد  

آخر الأنباء

نُشرعلى كل أوراق الشجر في الغابة ما يلي:
النبأ الأول: الأرنب الجميل اللي كل الحيوانات بيحبوه عدّت سحلية على رقبته وهو سرحان، نام وصحّي وتحول الى سحلفاة، يا لهوووووييييي
النبأ التاني: الفراشة جاتلها صدمة نفسية لماّ عرفت انها حشرة مش طير زي ما كانوا مفَهمينها، يا حبيبتي يا فراشة ربنا معاكي
النبأ التالت والأخير: التور الأحمر الناري خطف الغزالة الجميلة ومش عارفين هايروح بيها على فين، يا تلحقوها يا متلحقوهاش

استكمال

الفراشة يا عيني من الصدمة افتكرت نفسها خفّاش (عشان تتلزق في الطيور برضو)، المهم بتخرخ بس في الليل وتختفي في النهار، مع إن الفراشات بتحب النور وبتجري علىه وعلى الأزهار المتفتحة في ضوء الصباح. ادعولها ربنا يشفيها ويرجعلها مخها النمنم.
 00:49  21 هسهسات أرسليها بالبريد  

الحكيم، الملك والحمار

قصة قديمة سمعتها كتير زمان ولسّه لحد دلوقتي باسمعها.

حرامي حكيم، تظلم عند الملك عشان يعفو عنه.
الملك عَقَد الديوان عشان ينظروا في أمر هذا المجرم عشان يشوفوا هيعملوا معاه ايه.
وبعد حوارات كتيرة وهات وخُد، وخُد وهات، تَوَصَلوا الى حل، اشترط الملك على الحرامي أن يعلم الحمار بتاعه القراءة والكتابة.
طبعاً كل الحاضرين اتخطفوا وقالوا راح الحرامي في خبر كان.
وبعد لحظة تفكير، رد الحرامي على الملك بالموافقة.
وزاد ذهول الحاضرين لأن الحرامي وافق على كلام الملك.
وبعد فضّ الديوان، سأل بعض الحاضرين الحرامي: ازاي قبلت عرض الملك؟ انت مجنون!!!
وكان رده: يا سيدي، أنا عشان أقبل العرض ده أنا كمان طلبت حاجات من الملك، قلتله إني هاعلّم الحمار خلال عشرين سنة، ويوفّر لي مرتب دائم خلال هذه الفترة وكمان قصر أعيش فيه. وبعد عشرين سنة ييجي يحاسبني، وهاتكون النتيجة حاجة من تلاتة: يا الحمار يموت، يا أنا أموت، يا الملك يموت.

وبس كده يا ترى مين اللي هيموت الأول؟
 17:20  6 هسهسات أرسليها بالبريد  
في مرمى البصر
على أشكالها تقع
من الذاكرة